VIDEO / ઓપરેશન સિંદૂરમાં જે રાફેલથી નાપાકના છક્કા છોડાવ્યા, તે ફાઈટર જેટમાં રાષ્ટ્રપતિ દ્રૌપદી મૂર્મુંએ ભરી ઉડાન

Draupadi Murmu In Rafale : ભારતના રાષ્ટ્રપતિ દ્રૌપદી મુર્મુ આજે અંબાલા એરફોર્સ સ્ટેશન પર પહોંચ્યા હતા. આ દરમિયાન અહીં તેમને ભારતીય વાયુસેનાના જવાનો દ્વારા ગાર્ડ ઓફ ઓનર આપવામાં આવ્યું.

આ પ્રસંગે રાષ્ટ્રપતિ મુર્મુએ અત્યાધુનિક રાફેલ ફાઇટર એરક્રાફ્ટમાં ઐતિહાસિક ઉડાન ભરી, જે ભારતીય વાયુસેનાના ઇતિહાસમાં એક મહત્વપૂર્ણ ક્ષણ બની રહી છે. આ પહેલા રાષ્ટ્રપતિ મુર્મુએ સુખોઈ-30 MKI ફાઇટર જેટમાં પણ ઉડાન ભરી હતી. રાષ્ટ્રપતિ તરીકે ફાઇટર એરક્રાફ્ટમાં ઉડાન ભરનારા તેઓ ત્રીજા અને મહિલા રાષ્ટ્રપતિ તરીકે બીજા છે.

પૂર્વ રાષ્ટ્રપતિઓનો ઉલ્લેખ

આ પહેલાં ભારતના પૂર્વ રાષ્ટ્રપતિ અને વિખ્યાત વૈજ્ઞાનિક ડૉ. એ.પી.જે. અબ્દુલ કલામે 8 જૂન, 2006ના રોજ સુખોઈ-30 MKI ફાઇટર એરક્રાફ્ટમાં ઉડાન ભરી હતી. ત્યારબાદ 25 નવેમ્બર, 2009ના રોજ રાષ્ટ્રપતિ પ્રતિભા પાટીલે પુણે નજીકના લોહેગાંવ એરફોર્સ સ્ટેશન પરથી સુખોઈ-30 MKIમાં ઐતિહાસિક ઉડાન ભરી હતી.

રાફેલની શક્તિ અને ઓપરેશન સિંદૂર

રાફેલ જેટ ભારતીય વાયુસેનાનો સૌથી અદ્યતન ફાઇટર એરક્રાફ્ટ છે, જે અત્યાધુનિક ટેક્નોલોજી, લાંબી રેન્જ અને મલ્ટીરોલ ક્ષમતાઓ માટે જાણીતો છે. તાજેતરમાં ઓપરેશન સિંદૂર દરમિયાન ભારતે રાફેલ ફાઇટર જેટનો અસરકારક ઉપયોગ કર્યો હતો. 22 એપ્રિલે પહેલગામ ખાતે થયેલા આતંકવાદી હુમલા બાદ 6 થી 7 મે વચ્ચે ભારતે પાકિસ્તાન અને પાકિસ્તાની કબ્જાવાળા જમ્મુ-કાશ્મીર વિસ્તારમાં આવેલા નવ આતંકવાદી ઠેકાણાઓનો નાશ કર્યો હતો. જ્યારે પાકિસ્તાને ભારતના લશ્કરી ઠેકાણાઓ પર હુમલો કરવાનો પ્રયાસ કર્યો, ત્યારે ભારતીય સેના અને વાયુસેનાએ તાત્કાલિક જવાબી કાર્યવાહી કરતા અનેક પાકિસ્તાની ચોકીઓનો નાશ કર્યો. ચાર દિવસ ચાલેલી આ લડાઈ બાદ, પાકિસ્તાનની વિનંતિ પર ભારતે 10 મેના રોજ લશ્કરી કાર્યવાહી તાત્કાલિક રીતે સ્થગિત કરી હતી.

આ પણ વાંચો : VIDEO : 'હે પ્રભુ દરવાજો ખોલો' લિફ્ટમાં ફસાયેલા ટેણિયાએ ભગવાનને પ્રાર્થના કરતાં જ થયો ચમત્કાર, જુઓ શું બન્યું?

રાષ્ટ્રપતિના ઉડાનનું મહત્વ

રાષ્ટ્રપતિ દ્રૌપદી મુર્મુની આ ઐતિહાસિક ઉડાન માત્ર સન્માનનો વિષય નથી પરંતુ તે દેશના સશસ્ત્ર દળો પ્રત્યેના વિશ્વાસ, સમર્પણ અને ગર્વનું પ્રતિક છે. તેમના આ ઉડાન સાથે ભારતીય વાયુસેનાના ઇતિહાસમાં એક નવો અધ્યાય લખાયો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ