Video / માનવતા મરી પરવારી! રસ્તા વચ્ચોવચ વૃદ્ધને ઢોરની જેમ ઢીબી નાખ્યા, મહિલા વચ્ચે પડી તોય...!

Viral Video : રાજધાની દિલ્હીમાં ધોળા દિવસે દબંગાઈનો ચોંકાવનારો કિસ્સો સામે આવ્યો છે. વાસ્તવમાં દક્ષિણ પૂર્વ દિલ્હીના અલીગાંવ વિસ્તારમાં એક યુવાને ગુસ્સામાં આવીને એક વૃદ્ધ વ્યક્તિને તેમની કારમાંથી ખેંચી કાઢી મધ્ય રસ્તે જ બેફામ માર માર્યો. આ સમગ્ર ઘટના આસપાસના લોકોએ મોબાઇલમાં કેદ કરી લીધી અને તેનો વીડિયો હવે સોશિયલ મીડિયામાં વાયરલ થઈ રહ્યો છે.

કાચ તોડી કારમાંથી ખેંચી બહાર કાઢ્યા અને પછી...

પોલીસના જણાવ્યા મુજબ 24 ઑક્ટોબરના રોજ રઘુરાજ નામના વૃદ્ધ વ્યક્તિ પોતાના ઘરેથી ઓફિસ તરફ જઈ રહ્યા હતા. એ દરમિયાન મોહિત અને તેના મિત્રો ત્યાં પહોંચ્યા અને રઘુરાજની કારનો કાચ તોડી નાખ્યો. ત્યારબાદ, તેઓએ રઘુરાજને કારમાંથી ખેંચી બહાર કાઢ્યા અને લાકડીથી તેમની પર હુમલો કર્યો. હુમલામાં રઘુરાજના બંને પગમાં ફ્રેક્ચર થયાનું કહેવાય છે અને હાલ તેઓ સારવાર હેઠળ છે.

જૂના વિવાદના કારણે હુમલો

પ્રાથમિક તપાસમાં જાણવા મળ્યું છે કે, આરોપી મોહિતે બે વર્ષ પહેલા અલીગાંવ વિસ્તારમાં એક પ્લોટ ખરીદ્યો હતો. તે જગ્યા પર બાંધકામ ચાલી રહ્યું હતું, પરંતુ ડીડીએ (Delhi Development Authority) એ એક મહિના પછી જ એ બાંધકામ તોડી પાડ્યું હતું. મોહિતને શંકા હતી કે, રઘુરાજે ડીડીએમાં તેની વિરુદ્ધ ફરિયાદ કરી હતી. આ જ શંકાના કારણે તેણે આ હિંસક કૃત્ય અંજામ આપ્યું હોવાની સંભાવના છે.

વિડિયો વાયરલ, આસપાસના લોકોને પણ ધમકી

સોશિયલ મીડિયામાં વાયરલ થયેલા વીડિયોમાં સ્પષ્ટ રીતે જોવા મળે છે કે રઘુરાજને રસ્તાની વચ્ચે લાકડીઓથી માર મારવામાં આવી રહ્યો છે. જ્યારે આસપાસના લોકોએ વચ્ચે પડવાનો પ્રયાસ કર્યો ત્યારે આરોપીઓએ તેમને પણ ધમકી આપી હતી. લોકોમાં આ ઘટનાને લઈને ભારે રોષ છે અને લોકો કાયદો-વ્યવસ્થા પર સવાલ ઉઠાવી રહ્યા છે.

આ પણ વાંચો : બિહારમાં ભાજપને જીતાડવા માટે મથશે આ ગુજરાતી નેતાઓ, પક્ષે 8 MP-MLAને મોકલ્યા બિહાર

આરોપીઓની શોધ ચાલુ

આ મામલે સરિતા વિહાર પોલીસ સ્ટેશનમાં ગુનો નોંધવામાં આવ્યો છે. પોલીસે આરોપી મોહિત અને તેના સાથીઓની ઓળખ કરી લીધી છે અને તેમની ધરપકડ માટે તલાશી શરૂ કરી છે. પોલીસનું કહેવું છે કે આરોપીઓને જલદી જ પકડી લેવામાં આવશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ