Monsoon 2026 / ગુજરાતમાં મેઘરાજાના મંડાણ: ક્યાંક ખેડૂતો માટે બની આશીર્વાદ તો ક્યાંક દબાણોને કારણે રસ્તા બન્યા તળાવ

ગુજરાતમાં ચોમાસાનું વિધિવત આગમન થતાં જ વાતાવરણમાં ધરખમ ફેરફારો જોવા મળી રહ્યા છે. એક તરફ સૌરાષ્ટ્રના ચોટીલા અને લીલીયા પંથકમાં મેઘરાજાની મહેરથી જગતનો તાત ખુશખુશાલ બન્યો છે, તો બીજી તરફ દક્ષિણ ગુજરાતમાં માળખાકીય સુવિધા અને દબાણોને કારણે સામાન્ય નાગરિકો મુશ્કેલીમાં મુકાયા છે.

સૌરાષ્ટ્રના યાત્રાધામ ચોટીલામાં લાંબા સમયના અસહ્ય ઉકળાટ બાદ વરસાદનું આગમન થતાં લોકોએ ગરમીમાંથી રાહતનો શ્વાસ લીધો છે. સિઝનના આ પ્રથમ સારા વરસાદે ખેડૂતોના મુખ પર સ્મિત લાવી દીધું છે, તો અમરેલીના લીલીયામાં બપોર બાદ શરૂ થયેલા ધોધમાર વરસાદને પગલે નાવલી નદીમાં પૂરના નવા નીર આવ્યા છે. આ દ્રશ્યો ખેડૂતો માટે આગામી વાવણીના મંગલ સંકેત સમાન છે.

જોકે, આ વરસાદની સાથે જ દક્ષિણ ગુજરાતના બારડોલી-નવસારી સ્ટેટ હાઈવે પર તંત્રની બેદરકારી અને આડેધડ દબાણો સામે રોષ પણ જોવા મળી રહ્યો છે. તરભોણ પાટિયા નજીક રસ્તા પર એટલા પાણી ભરાઈ ગયા છે કે નાના વાહનોના પૈડાં સંપૂર્ણપણે ડૂબી જાય છે.

આ પણ વાંચોઃ પંચમહાલના પાવાગઢમાં વરસાદી માહોલ વચ્ચે ભક્તિમય વાતાવરણ, પગથિયાં પર વહેતા ઝરણાં સમા દૃશ્યો

સ્થાનિકો અને વાહનચાલકોના જણાવ્યા અનુસાર, સરભોણ ગામની સીમમાં આવેલી કેટલીક ફેક્ટરીઓ દ્વારા કુદરતી પાણીના નિકાલના માર્ગો પર દબાણ કરવામાં આવ્યું છે, જેના કારણે વરસાદી પાણી ભરાઈ રહે છે. આ જોખમી સ્થિતિ વચ્ચે વાહનચાલકો જીવના જોખમે પાણીમાંથી પસાર થવા મજબૂર બન્યા છે. હાઈવે પરની આ જળબંબાકાર સ્થિતિને પગલે સ્થાનિક વહીવટી તંત્ર તાત્કાલિક અસરથી દબાણો દૂર કરી નિકાલની વ્યવસ્થા કરે તેવી માંગ ઉઠી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ