એંધાણ / મોદી કેબિનેટમાં ધરખમ ફેરફારની શક્યતા, દિગ્ગજ મંત્રીઓ કપાશે જ્યારે પેરાશૂટ દિગ્ગજ નેતાને મળશે મંત્રાલય

• મોદી કેબિનેટના વિસ્તરણનું અનુમાન 
• સપ્ટેમ્બરમાં થઈ શકે છે પ્રથમ વિસ્તરણ 
• ઘણા નવા ચહેરા છે રેસમાં સામેલ 

ભાજપના સૂત્રો કહે છે કે જ્યોતિરાદિત્ય સિંધિયા, મુકુલ રોય, સુરેશ પ્રભુ અને હેમંત બિસ્વા સરમા જેવા નવા ચહેરા મંત્રી પદના પદની રેસમાં છે, રાજ્યસભાની ચૂંટણીઓના પરિણામ બાદ નવા આગંતુકોને સમાવવા માટે કદાચ એક મોટા મિનીસ્ટર ડાઉનગ્રેડ પણ કરવામાં આવી શકે છે. 

જ્યોતિરાદિત્ય સિંધિયાને કરેલું પ્રોમિસ શું મોદી પાળશે? 

મધ્યપ્રદેશમાં કમલનાથની સરકાર ઊથલાવીને ભાજપનું કમળ ખીલવવામાં મદદ કરનાર સિંધિયાને હવે ભાજપે આપેલું વચન પૂર્ણ કરવાનો સમય આવ્યો છે. જો કે ભાજપના સૂત્રોનું માનવું છે કે સિંધિયાને મંત્રી બનાવવામાં ગૃહમંત્રી અમિત શાહ વધુ રસ લઈ રહ્યાં છે. જેનું એક એવું કારણ માનવામાં આવે છે કે જ્યારે શાહ 'શહેનશાહ' નહોતા તે વખતે જૂના શિવરાજસિંહ સાથેની ખટપટ હોઈ શકે છે. MPમાં હાલમાં આગામી 23 સપ્ટેમ્બર સુધીમાં 24 વિધાનસભા બેઠકો પર પેટા ચૂંટણીઓ થવાની છે, જેમાં 22 સીટો સિંધિયા જૂથના લોકોની છે જેમણે કોંગ્રેસથી છેડો ફાડીને ભાજપ ગમન કરેલું અને જેના લીધે શિવરાજ સરકાર સત્તામાં આવી હતી. વધુ 2 સીટો બે વિધાનસભ્યોનાં નિધનથી ખાલી પડી છે. 

અહીં આ જગ્યાએ સિંધિયાને ખુશ રાખવા પણ જરૂરી છે કેમ કે 24 માંથી 16 સીટો ગ્વાલિયર-ચંબલના એ ક્ષેત્રની છે જે સિંધિયાનો ગઢ ગણાય છે. રાજ્યસભા ચૂંટણી જીત્યા બાદ હવે જોવાનું એ રહે છે કે મોદી સિંધિયાની અપેક્ષા પ્રમાણે કોઈ મોટો પોર્ટફોલિયો તેને આપે છે કે નહીં?

સિંધિયાએ ફરી દેખાડવો પડશે પોતાનો દમ 

જો કે સિંધિયાએ એક વાર પોતાના બળે ભાજપની સરકાર રચાવીને ભાજપને પોતાની તાકાતનો પરચો આપી જ દીધો છે, પરંતુ હવે ફરીથી તેમને પેટાચૂંટણીઓમાં એ કરિશ્મા ફરી કરી દેખાડવો પડશે. કદાચ એટલે જ તેઓ ચૂંટણીઓ પહેલા પોતાને કેન્દ્રીય મંત્રીમંડળમાં સામેલ કરવાનું દબાણ કરી રહ્યા હોય તે સંભવ છે. હવે પરિસ્થિતિ માત્ર કોંગ્રેસ માટે વિપરીત નથી, સિંધિયા કેમ્પ પણ એટલું જ ચિંતામાં હશે કેમ કે પેટાચૂંટણીઓમાં અગાઉ આ ક્ષેત્રોમાં દબદબો ધરાવતા ભાજપના નેતાઓ પણ દાવેદારી નોંધાવી શકે છે, અને તે ન મળે તો ચૂંટણીઓમાં નુકસાન પણ પહોંચાડી શકે છે આવી સ્થિતિમાં પોતાને ફરીથી પ્રુવ કરવું એ સિંધિયા પર દબાણ રહેશે. 

કયા કયા નવા ચહેરા ઓ છે રેસમાં?

હાલમાં સૂત્રોએ જણાવ્યા પ્રમાણે આસામના હેમંત બિસ્વા સરમા આ રેસમાં છે, સાથે જ TMC ગોત્ર ધરાવતા બંગાળના મુકુલ રૉય અને અગાઉ મંત્રી રહી ચૂકેલા સુરેશ પ્રભુ પણ ફરી રેસમાં છે. 
આસામના હેમંત સરમા ભાજપ માટે પોતાની યોગ્યતા ક્યારની સાબિત કરી ચૂક્યા છે, એ કોઈનાથી અજાણ્યું નથી કે તેઓ છેલ્લા ઘણા સમયથી પોતાના ઇનામની રાહ જોઈ રહ્યા છે. તેઓ 2019 ની લોકસભા ચૂંટણી લડવા માંગતા હતા પરંતુ તેમને રાજ્ય સ્તરે ધ્યાન આપવા માટે કહેવામાં આવ્યું અહતું અને 2021 માં આસામમાં ફરી ચૂંટણી છે ત્યારે બની શકે છે હજી પણ તેમને રાજ્ય સ્તરે જ રાખવામાં આવે. આ દરમિયાન સિંધિયાની બાબતે સરમા કેવો પ્રતિભાવ આપે છે તે જોવું રસપ્રદ રહેશે.

 

એક બંગાળ અને એક મહરાષ્ટ્રનું નામ 

બંગાળમાં દીદીના ગઢમાં ગાબડાં પાડવા માટે ભાજપમાં લવાયેલા ઇમ્પોર્ટેડ ઉમેદવાર મુકુલ રૉય હવે સંપૂર્ણ પણે ભાજપના થઈ ચૂક્યા છે, ટીએમસીને અત્યાર સુધીમાં રોયે ઘણી ઇજાઓ પહોંચાડી છે, બંગાળમાં તેમના અને કૈલાશ વિજયવર્ગીયના સમીકરણે ભાજપને 2014 ના લોકસભાની 2 સીટથી 18 સુધી પહોંચાડી દીધી, સ્વાભાવિક છે કે હવે રૉય પોતાના ઇનામની રાહમાં છે.

જ્યારે એકઉન્ટન્ટ રહી ચૂકેલા સુરેશ પ્રભુની આંકડા શાસ્ત્રની સમજ અને તેના પરની પકડ મોદીને હાલમાં કેન્દ્રીય સ્તરે વધુ ઉપયોગી લાગી શકે છે. 

ફાઇનાન્સ મિનિસ્ટર રહેશે કે જશે?

જો કે દિલ્લીના લૂટીયન્સ કહેવાતા સર્કલ્સમાં આ વાતની ચર્ચા સૌથી વધુ છે કે શું નાણાં મંત્રી રહેશે કે જશે? જો કે ભાજપના આંતરિક સૂત્રો કહે છે કે મોદી દિલ્લી માટે આઉટ સાઇડર છે, અને જે પ્રકારની વાતો લૂટીયન્સ દિલ્હીમાં થતી હોય છે, મોદી તેનાથી સાવ જ ઊલટ નિર્ણયો કરતાં હોય છે અને હવે તો આ મોદી શાહની જોડી છે જેમના નિર્ણયોનું કોઈ પણ અનુમાન કરી શકતું નથી. મોદી બહારથી કોઈ ટેકનોક્રેટને લાવવા માટે વધુ ઉત્સાહી છે. જો કે એ વાત નિશ્ચિત મનાય છે કે નિર્મલા સીતારમણના સંભવિત હરીફોને તેમની હાલની કક્ષાએથી ડાઉનગ્રેડ કરવામાં આવી શકે છે. 

રાજસ્થાનની શું રહેશે હાલચાલ?

હાલમાં સૌથી વધુ કોઈ રાજ્ય નેશનલ મીડિયામાં અગર લાઈમ લાઇટમાં હતું તો તે રાજસ્થાન હતું અને આખરે રાજસ્થાનમાં ફરીથી કોંગ્રેસ માટે સારા સમાચાર આવ્યા હતા. સચિન પાયલોટ એન્ડ ગ્રુપ ફરીથી કોંગ્રેસમાં પાછા ફરતા ભાજપ માટે ઊભેલી તક ધોવાઈ ગઈ હતી. 

સૂત્રોના જણાવ્યા પ્રમાણે એવા અહેવાલો છે કે રાજસ્થાનના કોઈ રાજ્ય કક્ષાના મંત્રીનો અહીં ભોગ લેવાઈ શકે છે. હાલમાં મોદી કેબિનેટમાં રાજસ્થાનથી કૈલાશ ચૌધરી અને અર્જુન રામ મેઘવાલ રાજય કક્ષાના પ્રધાન છે. ભાજપે ગુમાવેલી તકથી કદાચ બની શકે છે કે મોદી આ મામલે તેમણતી ખફા હોય અને તેનું સારૂ એવું ઈનામ પણ તેમને મળે.