રાજકારણ / ગુજરાત કોંગ્રેસમાં અંદરોઅંદર મોટાપાયે ડખો, રાહુલ ગાંધી સમર્થન કાર્યક્રમમાં ડોકિયું દેવા પણ ન આવ્યા આ ધારાસભ્ય, પ્રદેશ પ્રમુખના આદેશને અવગણ્યો

• પાટણમાં કોંગ્રેસના કાર્યક્રમમાં ધારાસભ્ય કિરીટ પટેલ ગેરહાજર
• ભારત સત્યાગ્રહ સંમેલનમાં ધારાસભ્ય કિરીટ પટેલ ગેરહાજર
• પ્રદેશ પ્રમુખ જગદીશ ઠાકોરની અધ્યક્ષતામાં હતો કાર્યક્રમ 

ગુજરાત કોંગ્રેસમાં ફરી ખેચાતાણ સર્જાઈ હોય તેવું જણાઈ રહ્યું છે. પાટણમાં કોંગ્રેસના કાર્યક્રમમાં ધારાસભ્ય કિરીટ પટેલ ગેરહાજર રહ્યાં છે. કોંગ્રેસના ભારત સત્યાગ્રહ સંમેલનમાં ધારાસભ્ય કિરીટ પટેલ ગેરહાજર રહેતા અનેક રાજકીય ચર્ચાઓ શરૂ થઈ છે. પાટણના પદ્મનાભ ચાર રસ્તા પાસેના એક ખાનગી પાર્ટી પ્લોટમાં કોંગ્રેસનું ભારત સત્યાગ્રહ સંમેલન યોજાયું હતું જેમાં ગુજરાત પ્રદેશના પ્રમુખ જગદીશ ઠાકોર પૂર્વ અધ્યક્ષ ભરતસિંહ સોલંકી સહિતના આગેવાનો કાર્યકરો તેમજ ધારાસભ્ય જોડાયા હતા આ સંમેલનમાં જગદીશ ઠાકોર વિદ્યાર્થી નેતા યુવરાજસિંહના સમર્થનમાં આવ્યા હતા અને ભાજપને સલાહ આપી હતી કે યુવરાજસિંહ જેવા માટે તો રેડ કાર્પેટ પાથરવી જોઈએ તો વધુમાં જગદીશ ઠાકોરે ભાજપ ઉપર આકરા પ્રહાર કરતાં જણાવ્યું હતું કે, આઝાદી વખતે ભાજપના વડવાઓ અંગ્રેજો સાથે હતા.

જગદીશ ઠાકરોના ભાજપ પર પ્રહાર
ગુજરાતમાં અને દેશમાં તાનાશાહી તેમજ હિટલરશાહીની સરકાર ચાલી રહી છે તેની સામે બંડ પોકારવા અમે નીકળ્યા છીએ તે પ્રકારની વાત કરી હતી આગામી સમયમાં કોંગ્રેસ આક્રમક કાર્યક્રમો ભાજપ સરકાર સમક્ષ આપશે તે પ્રકારની વાત પણ કરી હતી જો કે મહત્વની બાબતએ હતી કે, આ સમગ્ર કાર્યક્રમમાં ખુદ પાટણ કોંગ્રેસના ધારાસભ્ય કિરીટ પટેલ ગેરહાજર રહ્યાં હતા સાથે જ રાધનપુર કોંગ્રેસના પૂર્વ ધારાસભ્ય રઘુ દેસાઈ પણ ગેરહાજર રહેવ્યાં હતા. એક બાજુ સંગઠન અને એકતાની વાતો કરતી કોંગ્રેસના ખુદ ધારાસભ્ય ગેરહાજર રહેતા પાટણના રાજકારણમાં અનેક તર્ક વિતર્કો સર્જાવા પામ્યા છે.
કિરીટ પટેલ ગેરહાજર રહેતા અનેક તર્ક વિતર્ક 
પાટણ ખાતે કોંગ્રેસનો ભારત સત્યાગ્રહ કાર્યક્રમ પ્રદેશ પ્રમુખ જગદીશ ઠાકોરની અધ્યક્ષતામાં યોજાયો હતો. જે કાર્યક્રમમાં પાટણના ધારાસભ્ય કિરીટ પટેલ ગેરહાજર રહેતા રાજકીય ચર્ચાનો વિષય બન્યો છે. કોંગ્રેસે રાહુલ ગાંધી સામે થયેલા કેસ મામલે કાર્યક્રમ યોજ્યો હતો તેમજ આ કાર્યક્રમમાં પાટણ જિલ્લાના તમામ કોંગ્રેસના ધારાસભ્યને હાજર રહેવા ફરમાન પણ હતું. જેમાં કિરીટ પટેલ ગેરહાજર રહેતા અનેક તર્ક વિતર્ક શરૂ થયો છે. કિરીટ પટેલ સાથે રઘુ દેસાઇ પણ ગેરહાજર રહ્યા છે. જો કે, તમને જણાવી દઈએ કે, જગદીશ ઠાકોર સામે અગાઉ રઘુ દેસાઈએ આક્ષેપ કર્યા હતાં. 

અગાઉ રઘુ દેસાઈએ જગદીશ ઠાકોર પર આક્ષેપો કર્યા હતાં.
વિધાનસભાની ચૂંટણી બાદ રાધનપુર કોંગ્રેસના ઉમેદવાર રઘુ દેસાઈએ ગુજરાત કોંગ્રેસના પ્રમુખ જગદીશ ઠાકોર પર ગંભીર આક્ષેપો લગાવતા રાજકારણ ગરમાયું હતું. તેમણે કોંગ્રેસના રાષ્ટ્રીય અધ્યક્ષ મલ્લિકાર્જુન ખડગેને પત્ર લખ્યો હતો. સાથે જ તેમણે સોનિયા ગાંધી, રાહુલ ગાંધી અને પ્રિયંકા ગાંધીને પણ પત્ર લખ્યો હતો. જેમાં તેઓએ તેમની હારની પાછળ કોંગ્રેસના માણસો જ જવાબદાર હોવાનું કહ્યું હતું. તેમજ  ગુજરાત કોંગ્રેસના પ્રમુખ જગદીશ ઠાકોર પર ગંભીર આક્ષેપો લગાવતા કોંગ્રેસમાં રાજકીય હલચલ વધી હતી. રઘુ દેસાઈએ તેમની હાર માટે જગદીશ ઠાકોરના માણસોએ કામ કર્યું હોવાનો આક્ષેપ કર્યો હતો અને આથી જગદીશ ઠાકોરને સસ્પેન્ડ કરવાની માગ કરી હતી જો કે જગદીશ ઠાકોરે આ આક્ષેપોને ફગાવ્યા હતા.