આક્ષેપો / 'કોના માટે કાયદો અને કોના માટે ફાયદો..' મનિષ દોશીએ PSI જે.એમ. પઠાણના મોત પર ઉઠાવ્યા સવાલ

સુરેન્દ્રનગરનાં દસાડા પાસેથી પસાર થઈ રહેલ દારૂની ગાડી રોકવાનો પ્રયાસ સ્ટેટ મોનિંટરીંગ સેલનાં પીએસઆઈ જે.એમ.પઠાણ કરી રહ્યા હતા. તે દરમ્યાન બુટલેગરે દારૂ ભરેલ ગાડી પીએસઆઈ પર ચડાવી દીધી હતી. ત્યારે આ સમગ્ર ઘટનાની જાણ પોલીસને થતા પોલીસ તાત્કાલીક ઘટના સ્થળે પહોંચી પીએસઆઈને સારવાર અર્થે ખસેડાયા હતા. જ્યાં સારવાર દરમ્યાન તેઓનું મોત નિપજ્યું હતું. આ સમગ્ર ઘટનાને લઈ હવે ભાજપ તેમજ કોંગ્રેસ દ્વારા એકબીજા પર આક્ષેપોનો મારો શરૂ કર્યો છે.

ભ્રષ્ટ્રાચારનાં કારણે બુટલેગરને કોઈ ડર રહ્યો નથીઃ ડો.મનીષ દોશી (કોંગ્રેસ પ્રદેશ પ્રમુખ)

આ સમગ્ર ઘટના બાબતે કોંગ્રેસ પ્રદેશ પ્રમુખ ડો. મનીષ દોશીએ ગૃહ વિભાગ પર આકરા પ્રહાર કર્યા હતા. મનીષ દોશીએ જણાવ્યું હતું કે, ભાજપ સરકારે ચૂંટણી જીતવા અને હવે સત્તા બચાવવા બુટલેગરોને લૂંટનો પરવાનો આપ્યો હોવાનો આરોપ લગાવ્યો છે. તેમજ કાયદામાં રહેશો તો ફાયદામાં રહેશો કહેનાર ગૃહમંત્રી જવાબ આપે કોના માટે કાયદો અને કોના માટે ફાયદો છે. રાજકીય આશ્રય અને ભ્રષ્ટ્રાચારનાં કારણે બુટલેગરને કોઈનો ડર રહ્યો નથી. જે ગામમાં દૂધનાં ટેન્કર ફરતા હતા ત્યાં હવે દારૂનાં ટેન્કરો ઠલવાઈ રહ્યા છે. તેમજ સરકાર બુટલેગરો સામે કડક કાર્યવાહી કરે તેવી કોંગ્રેસે માંગ કરી છે.

વધુ વાંચોઃ દસાડામાં કેવી રીતે થયું PSIનું મોત? બાતમી..બુટલેગર..અને ટેલરની ટક્કર, DIG નિર્લિપ્ત રાયે જણાવી ઘટના

કોંગ્રેસ પણ પરિવારજનોને સાંત્વના આપે : યજ્ઞેશ દવે

આ સમગ્ર મામલે ભાજપનાં યજ્ઞેશ દવેએ કોંગ્રેસ પર આક્ષેપ કરતા જણાવ્યું હતું કે, આવી ઘટનામાં કોંગ્રેસ પક્ષે રાજકારણ ના કરવું જોઈએ. કોંગ્રેસ ખોટી રાજનીતિ કરે છે, પરિવારને સાંત્વનાં આપવી જોઈએ. ગુજરાત સરકાર દારૂબંધી અને ડ્રગ્સ પર મુહિમ ચલાવી રહી છે. જેમાં ગુજરાત સરકારને સફળતા મળી છે. સુરેન્દ્રનગરમાં દશાડા ખાતે SMC ના PSI નું મૃત્યું થયું છે. ગુનેગારોને પકડવા જતા પીએસઆઈ ટ્રેલરની પાછળનાં ભાગમાં આવી ગયા હતા. દેશ અને ગુજરાત માટે પઠાણ શહીદ થયા છે. શહીદ થાય તો આમાં રાજકારણનાં રંગ ના આપવા જોઈએ. ભાજપ પરિવારજનોને સાંત્વનાં પાઠવી રહી છે. કોંગ્રેસ પણ પરિવારજનોને સાંત્વના આપે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ