મહારાષ્ટ્ર / શિવસેના UBTના 6 બળવાખોર સાંસદોને મળી Y+ સિક્યુરીટી, રસ્તા પર ઉતર્યા ઉદ્ધવના કાર્યકરો

મહારાષ્ટ્રના રાજકીય મેદાન પરથી આ સમયના સૌથી સનસનાટીપૂર્ણ અને મોટા સમાચાર સામે આવી રહ્યા છે. શિવસેના (UBT) માં એકવાર ફરી વર્ષ 2022 જેવો જ મોટો બળવો થવાની અટકળોએ જોર પકડ્યું છે. ઉદ્ધવ ઠાકરે જૂથના 6 સાંસદો પક્ષ બદલીને મુખ્યમંત્રી એકનાથ શિંદેની શિવસેનામાં જોડાવા માટે તૈયાર બેઠા હોવાના અહેવાલો વચ્ચે કેન્દ્રીય ગૃહ મંત્રાલયે મોટું કદમ ઉઠાવ્યું છે. સંભવિત સુરક્ષા જોખમો અને આંતરિક રોષને ધ્યાનમાં રાખીને કેન્દ્ર સરકારના નિર્દેશ પર મહારાષ્ટ્ર પોલીસે આ તમામ 6 બળવાખોર સાંસદોને તાત્કાલિક પ્રભાવથી Y+ શ્રેણી સમાન સ્થાનિક સુરક્ષા વ્યવસ્થા ઉપલબ્ધ કરાવી દીધી છે. આ હિલચાલની સામે ઉદ્ધવ ઠાકરે જૂથના ગુસ્સે ભરાયેલા કાર્યકરો પક્ષમાં ચાલી રહેલા આ આંતરિક બળવા વિરૂદ્ધ રસ્તા પર ઉતરી આવ્યા છે.

સત્તાવાર માહિતી અનુસાર, 17 જૂન 2026 ના રોજ જાહેર કરાયેલા એક હાઈપ્રોફાઈલ વાયરલેસ મેસેજમાં મહારાષ્ટ્રના વિવિધ પોલીસ વડાઓ અને ગુપ્તચર (ઇન્ટેલિજન્સ) અધિકારીઓને કડક આદેશ આપવામાં આવ્યા છે. તાજેતરના રાજકીય સમીકરણો અને સાંસદો પરના સંભવિત સુરક્ષા ખતરાની સમીક્ષા કર્યા બાદ આ નિર્ણય લેવાયો છે.

સરકારી આદેશમાં સ્પષ્ટ કહેવામાં આવ્યું છે કે સંબંધિત જિલ્લા અને પોલીસ યુનિટો સ્થાનિક પરિસ્થિતિઓ અને જોખમોના મૂલ્યાંકનના આધારે આ સાંસદોની સુરક્ષા લોખંડી બનાવે. આ સાથે જ જિલ્લા સ્તરની સુરક્ષા સમીક્ષા સમિતિઓને પણ આ સાંસદોની સુરક્ષા વ્યવસ્થા વધારવા, ઘટાડવા અથવા યથાવત રાખવા અંગે સ્વતંત્ર નિર્ણય લેવાની સત્તા આપવામાં આવી છે.

કયા 6 સાંસદોને મળ્યું લોખંડી સુરક્ષા કવચ?

સરકાર દ્વારા જારી કરવામાં આવેલા સત્તાવાર દસ્તાવેજોમાં જે 6 સાંસદોના નામ સામેલ છે, તે તમામ ઉદ્ધવ કેમ્પના મજબૂત સ્તંભ ગણાય છે. સુરક્ષા મેળવનારા સાંસદોની યાદી નીચે મુજબ છે:

• સંજય દેશમુખ (સાંસદ - યવતમાલ)
• સંજય જાધવ (સાંસદ - પરભણી)
• સંજય દીના પાટીલ (સાંસદ - મુંબઈ ઉત્તર-પૂર્વ)
• નાગેશ પાટીલ અષ્ટિકાર (સાંસદ - હિંગોલી)
• ઓમરાજે નિંબાલકર (સાંસદ - ધારાશિવ)
• ભાઉસાહેબ વાઘચૌરે (સાંસદ - શિરડી)

વાયરલેસ મેસેજમાં એવા પણ કડક નિર્દેશ છે કે જ્યારે પણ આ સાંસદો પોતાના મતવિસ્તારની મુલાકાતે જાય અથવા કોઈ જાહેર કાર્યક્રમ કે સભામાં ભાગ લે, ત્યારે સ્થાનિક પોલીસ પ્રશાસને વધારાના સાવચેતીના પગલાં ભરવા જેથી કોઈ પણ પ્રકારની અપ્રિય ઘટના કે હિંસાને રોકી શકાય.

આ પણ વાંચોઃ બેકાબૂ કાર ખીણમાં ખાબકી, મુંડન સમારોહથી પરત ફરતા એક જ ગામના સાત લોકોના મો*ત

મહારાષ્ટ્રના રાજકારણમાં કેમ ગરમાવો આવ્યો?

આ સમગ્ર ઘટનાક્રમ એવા સમયે પ્રકાશમાં આવ્યો છે જ્યારે શિવસેના (UBT) ના આ છ સાંસદો સત્તાધારી એકનાથ શિંદે જૂથના સતત સંપર્કમાં હોવાની અને ટૂંક સમયમાં જ સત્તાવાર રીતે પક્ષથી અલગ થવાની અટકળો રાજકીય વર્તુળોમાં તેજ છે. રાજકીય વિશ્લેષકોના મતે, બળવાની સત્તાવાર જાહેરાત પહેલા જ આ સાંસદોને કેન્દ્ર તરફથી ઉચ્ચ સ્તરીય સુરક્ષા મળવી એ દર્શાવે છે કે મહારાષ્ટ્રના રાજકારણમાં પડદા પાછળ બહુ મોટી સ્ક્રિપ્ટ લખાઈ ચૂકી છે. આગામી દિવસોમાં મહારાષ્ટ્રની આ રાજકીય મેચ વધુ રોમાંચક વળાંક લેશે તે નક્કી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ