કામની વાત / જાણો નિયત તારીખ સુધીમાં IT રિટર્ન ફાઇલ ન કરવાના ગેરફાયદા, સમજી લેશો તો ફાયદામાં રહેશો

કોઈપણ નાણાંકીય કામકાજ નક્કી કરેલી સમયમર્યાદા અથવા તારીખ સુધી પૂરૂં કરવું સમજદારી છે. આવકવેરા રિટર્નના મામલે પણ એ જ સમજદારી રાખવી જોઈએ કે આપણે સમયસર આઈટીઆર ફાઈલ કરી દઈએ. સામાન્ય રીતે તેની છેલ્લી તારીખ 31 જુલાઈ હોય છે, પરંતુ સરકારે આ વર્ષે આઈટીઆર ફાઈલ કરવાની છેલ્લી તારીખ 31 જુલાઈથી વધારીને 15 સપ્ટેમ્બર 2025 કરી છે.

એટલે કે તમારે આ કામ આ તારીખ પહેલાં પૂરું કરી લેવું જ જોઈએ. જો તમે આવું ન કરો તો તમારે નુકસાન પણ ભોગવવું પડી શકે છે. ચાલો, આ વિષય પર વિગતે ચર્ચા કરીએ.

પાંચ હજાર રૂપિયાની લેટ ફાઈલિંગ ફી

આવકવેરા નિયમો મુજબ, ધારા 234F અનુસાર, ધારા 139(1) હેઠળ નક્કી કરેલી તારીખ પછી રિટર્ન ફાઈલ કરવામાં મોડું થાય તો રૂપિયા 5,000 સુધીની લેટ ફાઈલિંગ ફી ચૂકવવી પડે છે. જો વ્યક્તિની કુલ આવક રૂપિયા 5 લાખથી ઓછી હોય, તો ફક્ત રૂપિયા 1,000 ફી ચૂકવવી પડશે.

આ પગલાં લેવાઈ શકે છે

જો વ્યક્તિને નોટિસ અપાય પછી પણ તેણે રિટર્ન ન ભરી હોય, તો આવકવેરા વિભાગ પ્રોસિક્યુશનની કાર્યવાહી શરૂ કરી શકે છે. તેમાં ત્રણ મહિનાથી લઈને બે વર્ષ સુધીની કેદ શક્ય છે. સાથે દંડ પણ લાગી શકે છે. જો કરની રકમ વધુ હોય તો કેદની અવધિ સાત વર્ષ સુધી વધી શકે છે.

દંડ ભરવો પડી શકે છે

જો તમે તમારી આવક ઓછી બતાવો છો, તો આવકવેરા અધિકારી આપવામાં આવેલા કરના 50% સુધી દંડ લગાવી શકે છે. આ સિવાય પણ એવા ઘણા નુકસાનો થઈ શકે છે જે મોડું રિટર્ન ફાઈલ કરવા પર ભોગવવા પડે છે.

ભવિષ્યના લાભમાં નુકસાન

હાઉસ પ્રોપર્ટી સિવાયના નુકસાનો, જેમ કે કેપિટલ લોસ કે બિઝનેસ લોસ, આગળના વર્ષોમાં કાપી શકાય તેમ નથી જો તમે રિટર્ન સમયસર દાખલ નહીં કરો. હાઉસ પ્રોપર્ટી હેઠળ થયેલા નુકસાને આગળ લઈ જવાની છૂટ છે.

વ્યાજ ચૂકવવું પડશે

મોડું રિટર્ન ફાઈલ કરવા પર પેનલ્ટી સિવાય, ધારા 234A હેઠળ બાકી રહેલા કર પર દર મહિને 1% વ્યાજ વસૂલવામાં આવે છે. આ વ્યાજની ગણતરી નક્કી કરેલી તારીખ પછીના દિવસથી શરૂ થાય છે. એટલે કે જેટલું મોડું કરો, તેટલું વધારે ચુકવવું પડશે.

મોડું રિફંડ મળશે

જો તમે સરકારને વધારે ટેક્સ ચૂકવ્યો છે અને રિફંડના હકદાર છો, તો તમારે રિફંડ ઝડપથી મેળવવા માટે રિટર્ન સમયસર ફાઈલ કરવી પડશે.

વધુ વાંચો: ટૂંક સમયમાં લૉન્ચ થવા જઇ રહ્યું છે EPFO 3.0, ઘરે બેઠાં મળશે બેંક જેવી આ 5 સુવિધાઓ

જો તમે તમારા આવકવેરા રિટર્ન સમયસર નહીં ભરો, તો ફક્ત દંડ જ નહીં પણ કાયદાકીય કાર્યવાહી, લેટ રિફંડ, વ્યાજ, ભવિષ્યના લાભમાં નુકસાન જેવી ઘણી સમસ્યાઓ ઊભી થઈ શકે છે. તેથી સમજદારી એ જ છે કે આઈટીઆર સમયસર ભરી દેવો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ