ચેતી જજો / જામનગરમાં હોટલમાંથી મંગાવેલા વેજ ફૂડમાં નોનવેજના ટુકડા નીકળ્યાં, ગ્રાહકનું નિર્જળા એકાદશીનું વ્રત એળે ગયું

જામનગર શહેરમાં ઓનલાઈન મંગાવેલા વેજ પાસ્તામાંથી નોનવેજ જેવા ટુકડા મળ્યાની ફરિયાદ સામે આવતા જામનગર મહાનગરપાલિકાની ફૂડ શાખા હરકતમાં આવી છે. સમગ્ર મામલાને ગંભીરતાથી લઈ અધિકારીઓએ સ્થળ પર પહોંચી પ્રાથમિક તપાસ હાથ ધરી છે.

પરેશ ચુડાસમા, ગ્રાહક

ગ્રાહકે ઝોમેટો મારફતે હોટલમાંથી વેજ પાસ્તાનો ઓર્ડર મંગાવ્યો હતો

મળતી માહિતી મુજબ, ન્યૂ જામનગર વિસ્તારમાં રહેતા એક ગ્રાહકે ઝોમેટો મારફતે ખંભાળિયા હાઈવે પર આવેલી એક હોટલમાંથી વેજ પાસ્તાનો ઓર્ડર આપ્યો હતો. જમતી વખતે પાસ્તામાંથી નોનવેજ જેવા ટુકડા મળી આવ્યા હોવાનો ગ્રાહકે આક્ષેપ કર્યો હતો. ત્યારબાદ તેમણે સંબંધિત તંત્રને ફરિયાદ નોંધાવી હતી.

ફૂડ શાખાના અધિકારીઓ હોટલ પર પહોંચ્યા

ફરિયાદ મળતા જ જામનગર મહાનગરપાલિકાની ફૂડ શાખાના અધિકારીઓ હોટલ પર પહોંચ્યા હતા. પ્રાથમિક તપાસ દરમિયાન શંકાસ્પદ ખાદ્ય પદાર્થના નમૂનાઓ લેવામાં આવ્યા છે, જેને વધુ વૈજ્ઞાનિક તપાસ માટે લેબોરેટરીમાં મોકલવાની કાર્યવાહી હાથ ધરવામાં આવી છે.

અધિકારીઓએ હોટલમાાં તપાસ હાથ ધરી

આ ઉપરાંત અધિકારીઓ દ્વારા હોટલમાં ફૂડ હેન્ડલિંગની પ્રક્રિયા, રસોડાની સ્વચ્છતા તેમજ વેજ અને નોનવેજ ખાદ્ય પદાર્થોની અલગ વ્યવસ્થા સહિતના મુદ્દાઓની પણ ઝીણવટભરી તપાસ કરવામાં આવી રહી છે.

આ પણ વાંચોઃ કારમાં જઈ રહેલા વ્યક્તિને અકસ્માત કરીને લૂંટી લીધો, અમદાવાદના કૃષ્ણનગરમાં 50 લાખની લૂંટ

લેબોરેટરીનો અહેવાલ આવ્યા બાદ કાર્યવાહી હાથ ધરાશે

ફૂડ શાખાના સૂત્રોના જણાવ્યા અનુસાર, લેબોરેટરીનો અહેવાલ પ્રાપ્ત થયા બાદ નિયમો મુજબ યોગ્ય કાર્યવાહી કરવામાં આવશે. નોંધનીય છે કે જામનગર મહાનગરપાલિકાની ફૂડ શાખા સમયાંતરે ફૂડ સેફ્ટી સંબંધિત ફરિયાદોના આધારે વિવિધ ખાદ્ય એકમોમાં ચેકિંગ અભિયાન ચલાવી જરૂરી કાર્યવાહી કરતી રહે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ