નૌકાદળનું સાહસ / ફરી મધદરિયે મદદે આવી ભારતીય નૌસેના: એડનની ખાડીમાં જહાજ પર થયો હતો ડ્રોન ઍટેક, બચાવવા પહોંચ્યું ભારત

એડનના અખાતમાં વેપારી જહાજો પર હુમલા કોઈ નવી વાત નથી. ચાંચિયાઓએ ઘણીવાર આ જહાજોને નિશાન બનાવ્યા છે. દરિયામાં જહાજો પર હુમલાની વધતી સંખ્યા વિશ્વભરના દેશો માટે ચિંતાનો વિષય બની ગઈ છે.  છેલ્લા કેટલાક દિવસોમાં ભારતીય નૌકાદળે અનેક ઓપરેશનમાં વેપારી જહાજોને ચાંચિયાઓથી બચાવ્યા છે. એડનની ખાડીમાં ફરી એકવાર વેપારી જહાજ પર શંકાસ્પદ ડ્રોન દ્વારા હુમલો કરવામાં આવ્યો હતો, જે દરમિયાન એક ભારતીય યુદ્ધ જહાજે જહાજને મદદ કરી હતી. ભારતીય નૌકાદળ ચાંચિયાઓના હુમલા વચ્ચે સતત મદદ કરી રહ્યું છે.

શું છે હુમલાની વિગત ?

શનિવારે આ મામલાની માહિતી આપતા ભારતીય સૈન્ય અધિકારીઓએ જણાવ્યું કે, પલાઉના ધ્વજવાળા જહાજ એમવી આઈલેન્ડર પર ગુરુવારે હુમલો કરવામાં આવ્યો હતો. આ દરમિયાન જહાજના ક્રૂનો એક સભ્ય ઘાયલ થયો હતો. તેમણે કહ્યું કે નૌકાદળની એક ટીમ જહાજ પર ચઢી અને ત્યાં હાજર ક્રૂને બચાવી લીધા. આ તાજેતરની ઘટના લાલ સમુદ્રમાં અનેક વેપારી જહાજો પર હુથી બળવાખોરો દ્વારા હુમલા અંગે વધતી વૈશ્વિક ચિંતા વચ્ચે આવી છે. એમવી આઇલેન્ડર પર સવાર ભારતીય નૌકાદળની એક તબીબી ટીમે ઇજાગ્રસ્ત ક્રૂ મેમ્બરને તબીબી સહાય પૂરી પાડી હતી, એમ તેમણે જણાવ્યું હતું.

ભારતીય નૌકાદળે બહાદુરી બતાવી 

ઘટનાની વિગતો આપતા અધિકારીએ જણાવ્યું હતું કે જહાજમાંથી ઇમરજન્સી કોલ આવ્યો હતો, જેના જવાબમાં ભારતીય નૌકાદળોએ કાર્ગો જહાજને બહાદુરથી બચાવી લીધું હતું. ભારતીય નૌકાદળના પ્રવક્તા કમાન્ડર વિવેક માધવાલે જણાવ્યું હતું કે ભારતીય નૌકાદળના જહાજોના પ્રયાસો વેપારી જહાજો અને નાવિકોની સુરક્ષા અને સલામતી પ્રત્યે ભારતીય નૌકાદળની મજબૂત પ્રતિબદ્ધતાને પુનઃપુષ્ટ કરે છે. છેલ્લા કેટલાક અઠવાડિયામાં, ભારતીય નૌકાદળે પશ્ચિમ હિંદ મહાસાગરમાં હુમલા બાદ અનેક વેપારી જહાજોને મદદ પૂરી પાડી છે.

આ પણ વાંચોઃ 'પત્નીને નામે ખરીદવામાં આવેલી સંપત્તિ પર પરિવારનો હક, ક્યારે ન ગણાય'? HCનો મોટો ચુકાદો

નૌકાદળ અનેક વખત પોતાની વીરતા પૂરવાર કરી ચૂકયુ છે 

ભારતીય નૌકાદળે આ મહિનાની શરૂઆતમાં સોમાલિયાના પૂર્વ કિનારે 11 ઈરાનીઓ અને આઠ પાકિસ્તાની નાગરિકોના ક્રૂ સાથે ઈરાનના ધ્વજવાળા માછીમારીના જહાજ પર ચાંચિયાગીરીના પ્રયાસને નિષ્ફળ બનાવ્યો હતો. જાન્યુઆરીમાં, સોમાલિયાના પૂર્વ કિનારે ચાંચિયાઓએ હુમલો કર્યા પછી ભારતીય યુદ્ધ જહાજે ઈરાની-ધ્વજવાળા માછીમારી જહાજના 19 પાકિસ્તાની ક્રૂ સભ્યોને બચાવ્યા હતા. નેવીએ 5 જાન્યુઆરીએ ઉત્તર અરબી સમુદ્રમાં લાઇબેરિયન ધ્વજવાળા જહાજ એમવી લીલા નોરફોકને હાઇજેક કરવાનો પ્રયાસ નિષ્ફળ બનાવ્યો અને તેના તમામ ક્રૂ સભ્યોને બચાવ્યા. MV કેમ પ્લુટો, 21 ભારતીય ક્રૂ સભ્યો સાથે લાઇબેરિયન ધ્વજ ધરાવતું જહાજ, 23 ડિસેમ્બરે ભારતના પશ્ચિમ કિનારે ડ્રોન હુમલાનું લક્ષ્ય હતું.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો