IPL 2024 / છેલ્લા 12 બોલમાં 56 રન, વિલ જેક્સે ટીમ ગુજરાતને ધોઈ નાખી, RCB 9 વિકેટે જીત્યું

IPL 2024માં રવિવારે વિલ જેક્સ નામનું તોફાન આવ્યું હતું, જેમાં યજમાન ગુજરાત ટાઇટન્સ ટીમ ભૂસાની જેમ ઉડી ગઈ હતી. રોયલ ચેલેન્જર્સ બેંગ્લોરના ઇંગ્લિશ બેટ્સમેન વિલ જેક્સે ગુજરાત ટાઇટન્સ સામે માત્ર 41 બોલમાં સદી ફટકારી હતી. વિલ જેક્સની સદીની સૌથી મોટી ખાસિયત એ હતી કે તેણે તેના છેલ્લા 83 રન માત્ર 24 બોલમાં બનાવ્યા હતા. વિલ જેક્સની આ શાનદાર સદીના કારણે રોયલ ચેલેન્જર્સ બેંગ્લોરે ગુજરાત ટાઇટન્સને 9 વિકેટે હરાવ્યું હતું. જેક્સ IPL 2024માં સદી ફટકારનાર 10મો બેટ્સમેન છે.

IPL 2024માં રવિવારે નરેન્દ્ર મોદી સ્ટેડિયમમાં રોયલ ચેલેન્જર્સ બેંગ્લોર અને ગુજરાત ટાઇટન્સ વચ્ચે મેચ હતી. પ્રથમ બેટિંગ કરતા યજમાન ગુજરાત ટાઇટન્સે 200 રન બનાવ્યા હતા. રોયલ ચેલેન્જર્સ બેંગ્લોર સામે ગુજરાતનો આ સ્કોર ઘણો નાનો સાબિત થયો હતો. આરસીબીએ માત્ર 16 ઓવરમાં એક વિકેટે 206 રન બનાવીને મેચ જીતી લીધી હતી.

રોયલ ચેલેન્જર્સ બેંગ્લોરની જીતના હીરો હતા વિલ જેક્સ અને વિરાટ કોહલી. વિજયનો પાયો વિરાટ કોહલી અને કેપ્ટન ફાફ ડુ પ્લેસિસે નાખ્યો હતો. આ પછી વિલ જેક્સે 41 બોલમાં સદી ફટકારીને ગુજરાત ટાઇટન્સનું કામ પૂરું કર્યું. ઇંગ્લિશ બેટ્સમેન વિલ જેક્સે પોતાની ઇનિંગમાં 5 ફોર અને 10 સિક્સર ફટકારી હતી. વિલ જેકે 16મી ઓવરના છેલ્લા બોલ પર સિક્સર ફટકારીને પોતાની સદી પૂરી કરી હતી. આ છગ્ગા સાથે આરસીબીએ મેચ જીતી લીધી હતી.