જે લોકો પત્નીને નામે સંપત્તિ ખરીદે છે તેમને માટે આ સમાચાર છે. પત્નીને નામે ખરીદવામાં આવેલી સંપત્તિ કંઈ પત્નીની બની જતી નથી તેની પર પરિવારના બાકીના સભ્યોનો પણ એટલો જ હક છે. આ સંબંધમાં એક ચુકાદો સામે આવ્યો છે. સંપત્તિ સંબંધિત ઘર વિવાદ પર એક મહત્વનો આદેશ પાસ કરતાં અલ્હાબાદ હાઈકોર્ટે કહ્યું કે જો કોઈ વ્યક્તિએ તેની પત્નીના નામે સંપત્તિ ખરીદી છે અને રજિસ્ટ્રી કરાવી છે, તો તેના પરિવારનો પણ તેમાં ભાગ હશે.
પત્નીના નામવાળી સંપત્તિ પર પરિવારનો હક ક્યારે ન ગણાય
હાઈકોર્ટે તેનો પણ ખુલાસો કર્યો છે કે મહિલાએ તે મિલકત પોતાની કમાણીમાંથી ખરીદી છે તેવું પુરવાર થાય તો જ પરિવારને તે મિલકતનો હકદાર ગણવામાં આવશે નહીં, પરંતુ જો મહિલા ગૃહિણી હોય અને તેના નામે કોઈ મિલકત ખરીદવામાં આવી હોય તો તેના પર પરિવારના બાકીના સભ્યોનો પણ અધિકાર રહેશે. જસ્ટિસ અરુણ કુમાર સિંહ દેસવાલે એક પુત્ર દ્વારા મૃત પિતાની સંપત્તિમાં અધિકારની માંગ કરતી અરજી પર સુનાવણી કરતા કહ્યું હતું કે અરજદારના પિતા દ્વારા ખરીદવામાં આવેલી સંપત્તિને પારિવારિક સંપત્તિ માનવામાં આવશે કારણ કે સામાન્ય રીતે હિન્દુ પતિ પરિવારના ફાયદા માટે તેની પત્નીના નામે સંપત્તિ ખરીદે છે. કોર્ટે કહ્યું, "જ્યાં સુધી એ સાબિત ન થાય કે સંપત્તિ પત્ની દ્વારા કમાયેલી આવકની રકમમાંથી ખરીદવામાં આવી હતી, ત્યાં સુધી તેને પતિ દ્વારા તેની પોતાની આવકમાંથી ખરીદવામાં આવેલી સંપત્તિ તરીકે ગણવામાં આવશે અને તેના પર પરિવારનો પણ અધિકાર રહેશે.
પુત્રે માતાની સંપત્તિ પર કર્યો હતો દાવો
યુપીમાં સૌરભ ગુપ્તા નામના અરજદારે પિતા દ્વારા ખરીદવામાં આવેલી સંપત્તિમાં ચોથા ભાગનો હિસ્સો મેળવવા માટે એક સિવિલ દાવો દાખલ કર્યો હતો અને કોર્ટને તેને સંપત્તિમાં સહ-શેરહોલ્ડર જાહેર કરવાની માંગ કરી હતી. તેમણે એવી દલીલ કરી હતી કે આ મિલકત તેમના મૃત પિતાએ ખરીદી હોવાથી તેઓ તેમની માતા સાથે તે મિલકતમાં સહ-શેરહોલ્ડર પણ છે. અરજદારે એવો પણ દાવો કર્યો હતો કે આ મિલકત તેની માતા એટલે કે મૃતક પિતાની પત્નીના નામે ખરીદવામાં આવી હોવાથી મિલકત ત્રાહિત પક્ષને તબદીલ કરી શકાય છે.
હાઈકોર્ટે માતાની અરજી ફગાવી
સૌરભની માતાએ લેખિત નિવેદનમાં કોર્ટને જણાવ્યું હતું કે, તેમની પાસે આવકનો કોઈ અલગ સ્રોત ન હોવાથી મિલકત તેમના પતિએ તેમને ભેટમાં આપી હતી. આ કેસમાં ટ્રાયલ કોર્ટે વચગાળાના મનાઈ હુકમ માટેની અરજી ફગાવી દીધી હતી, જેની સામે પુત્રએ હાઈકોર્ટમાં અરજી કરી હતી. અલ્હાબાદ હાઈકોર્ટે 15 ફેબ્રુઆરીના પોતાના ચુકાદામાં કહ્યું હતું કે, પ્રથમ દૃષ્ટિએ આવી સંપત્તિ સંયુક્ત હિંદુ પરિવારની સંપત્તિ બની જાય છે, જે પરિવારના દરેક સભ્યને સોંપવામાં આવે છે.
