રેકોર્ડ / નવસારી સાંસદ અને ગુજરાતના નવા ભાજપ પ્રમુખ પાટીલ ધરાવે છે દેશની આવી પ્રથમ ઓફિસ

• ગુજરાત ભાજપના નવા પ્રદેશ પ્રમુખ તરીકે સી.આર. પાટીલની વરણી
• 70 વર્ષનો રેકોર્ડ તોડી સી.આર.પાટીલ સૌથી વધુ લીડ મેળવનારા સાંસદ બન્યા હતા
• પોતાની ઓફિસમાં ISO લેનાર એ સમગ્ર દેશના પ્રથમ સાંસદ

ગુજરાતની ગત લોકસભાની ચૂંટણીમાં કુલ 26 બેઠકો પર ભાજપનો ભગવો લહેરાયો હતો. જે પૈકી સુરત-નવસારી લોકસભા બેઠકના ઉમેદવાર સીઆર પાટીલે 70 વર્ષનો રેકોર્ડ તોડી દેશના તમામ સાસદોમાંથી એકમાત્ર સૌથી વધુ લીડ મેળવવાર સાંસદ તરીકેનું સ્થાન મેળવ્યું હતું. 70 વર્ષનો રેકોર્ડ તોડી સી.આર.પાટીલ સૌથી વધુ લીડ મેળવનારા સાંસદ બન્યા હતા. મહત્વનું છે કે, દેશમાં ISO લેનારી સી.આર. પાટીલની પ્રથમ ઓફિસ છે.

દેશના પ્રથમ સાંસદ જેમની ઓફિસ ISO 9001:2015 સેર્ટીફાઈડ છે#navsari #surat #bjp #bjp4india #narendramodi #crpatil #crpaatil pic.twitter.com/2jeZ7gsMdk

— C R Paatil (@CRPaatil) December 21, 2018

સી.આર.પાટીલ ફરી ત્રીજી ટર્મ માટે સાંસદ તરીકે ચૂંટાઈ આવેલા છે. સુરત-નવસારી લોકસભા બેઠક પરથી સી.આર.પાટીલે જંગી લીડથી જીત હાંસલ કરી હતી. કોંગ્રેસના ઉમેદવાર ધર્મેશ પટેલને માત આપી કુલ 6,89,000 મતોની જંગી લીડથી સાંસદ સીઆર પાટીલે સતત ત્રીજા ટર્મ માટે બાજી મારી હતી.

ગુજરાત ભાજપના નવા પ્રદેશ પ્રમુખ તરીકે સી.આર. પાટીલની વરણી

રાજ્યમાં ભાજપના નવા પ્રદેશ પ્રમુખને લઇને છેલ્લા કેટલાક સમયગાળાથી અનેક નામોની ચર્ચાઓ ચાલી રહી હતી. ત્યારે હવે ભાજપ હાઇકમાન્ડે નવસારીના સાંસદ અને ભાજપના પીઢનેતા સી.આર.પાટીલને ગુજરાત ભાજપના નવા પ્રદેશ અધ્યક્ષ બનાવવામાં આવ્યા છે. ભારતીય જનતા પાર્ટીના રાષ્ટ્રીય અધ્યક્ષ જેપી નડ્ડા દ્વારા આ જાહેરાત કરવામાં આવી છે.

કોણ છે સી.આર. પાટીલ?

સામાન્ય પરિવારના રઘુનાથજી પાટીલ અને સરૂબાઈ પાટીલના ઘરે 16 માર્ચ 1955ના રોજ મહારાષ્ટ્રના જલગાંવ નજીક એદલાબાદના પીંપરી-અકાઉરાઉત ખાતે સી.આર. પાટીલનો જન્મ થયો હતો. દક્ષિણ ગુજરાતમાં વિવિધ સ્થળે તેમણે શિક્ષણ લીધું હતું. છેલ્લે સુરતની ITIમાં અભ્યાસ કર્યો. વર્ષ 1975માં પિતા અને આસપાસના અનેક લોકોને જોઈને ગુજરાત પોલીસમાં જોડાયા હતા. સરકારી નોકરીમાં એમની અંદર રહેલા નેતૃત્વ અને સંગઠનના ગુણના કારણે અનેક સંઘર્ષ અને તકલીફોનો સામનો કરવો પડ્યો હતો. પોલીસની નોકરી કરતા લોકોનું કોઈ સંગઠન હતું નહી. પોલીસની નોકરી કરતા લોકોના પ્રશ્નો કોઈ ઉજાગર કરતુ નહીં. એ મુદ્દો લઈને સી.આર.પાટીલે 1987મા પોલીસ કર્મચારીઓનું યુનિયન બનાવવાનો પ્રયત્ન કર્યો હતો. પોલીસના ઉચ્ચ અધિકારીઓ અને સરકારને આ ગમ્યું નહી અને સી.આર.પાટીલ સામે સસ્પેન્શનનો કોરડો વીંઝ્યો. પોતાના સહ-પોલીસકર્મીની ભલાઈ માટે અને એમને થતા અન્યાય સામે અવાજ ઉઠાવતા સી.આર.પાટીલે પોતાની સરકારી નોકરી છોડી દીધી અને સંઘર્ષનો માર્ગ લીધો. એમની અંદર રહેલા નેતૃત્વ અને સંગઠનના ગુણ પ્રથમ વખત સામે આવ્યા.

એ પછી જીવન સંઘર્ષ તો ચાલુ રહ્યો. સુરત શહેર ગણેશ ઉત્સવ સમિતિ અને ગોવિંદા સમિતિની સ્થાપનામાં એમની ભૂમિકા પાયાના પથ્થરની છે. આટલું જ નહિ આના જેવા અનેક પ્રકારના વ્યવસાયિક અને સામાજિક સંગઠનોની રચના અને સંચાલનની જવાબદારી નિભાવી ચુક્યા છે. સામાજિક કાર્યોમાં તેઓ સદા અગ્રેસર રહ્યા છે.