ચેતી જજો / અમદાવાદમાં ગરમીના કારણે હિટ ઇલનેસ, 15 દિવસમાં 108 ઈમરજન્સીને મળ્યા 2000 કોલ, હોસ્પિટલમાં વધ્યા ખાટલા

• અમદાવાદમાં ગરમીના કારણે હિટ ઇલનેસના કેસમાં થયો વધારો
• ગરમીને લગતી બીમારીઓમાં ચાલુ માસ દરમિયાન વધારો થયો 
• AMC સંચાલિત હોસ્પિટલમાં પ્રતિદિન 100 ઝાડા ઉલ્ટીના કેસ નોંધાયા

અમદાવાદમાં ગરમીનાં કારણે હિટ ઈલનેસનાં કેસમાં વધારો થયો છે. ગરમીને લગતી બીમારીઓમાં ચાલુ માસ દરમિયાન વધારો થયો છે. ત્યારે એએમસી સંચાલિત હોસ્પિટલમાં પ્રતિદિન 100 ઝાડા ઉલ્ટીનાં કેસ નોંધાઈ રહ્યા છે. પ્રતિદિન ઝાડા ઉલ્ટીનાં 30 જેટલાં દર્દીઓને હોસ્પિટલમાં દાખલ કરવામાં આવ્યા હતા. શહેરમાં 1 મે થી ઝાડા ઉલ્ટીનાં કેસમાં સતત વધારો થતો હોવાનું અનુમાન પણ લગાવવામાં આવી રહ્યું છે. છેલ્લા 15 દિવસમાં 108 ઈમરજન્સી સેવાને 1000 પેટના દુખાવાનાં કોલ મળ્યા છે. ચક્કર આવવા અને અશક્તિ લાગવાના 650 કોલ મળ્યા છે. તેમજ માથાનાં દુખાવાના 50 કોલ 108 ઈમરજન્સી સેવાને મળ્યા છે. ત્યારે 108 ઈમરજન્સી સેવાને વધુ પડતા તાવના 331 કોલ મળ્યા છે.

 ગરમીનું પ્રમાણ વધતા ઝાડા ઉલ્ટીનાં કેસમાં વધારોઃ ર્ડા. ભાવિન સોલંકી
આ બાબતે અમદાવાદ મ્યુનિસિપલ કોર્પોરેશનનાં આરોગ્ય વિભાગના વડા ર્ડા. ભાવિન સોલંકીએ જણાવ્યું હતું કે, વાતાવરણમાં ગરમીનું પ્રમાણ વધતા શહેરનાં અર્બન અને કોમ્યુનીટી હેલ્થ સેન્ટરોમાં ઝાડા ઉલ્ટીનાં 100 જેટલા કેસ નોધાઈ રહ્યા છે. તેમજ રોજના 25 થી વધુ લોકોને હોસ્પિટલમાં દાખલ કરવામાં આવે છે. ત્યારે પાણીજન્ય રોગો જેવા કે ઝાડા ઉલટી, કમળો સહિતનાં કેસ પણ નોંધાવવા પામ્યા છે.