વિવાદ / વિપુલ ચૌધરીને ફરી ગૃહમંત્રી બનાવવા ઈચ્છુ છું : ભાજપ સાંસદના નિવેદન બાદ ઉત્તર ગુજરાતના રાજકારણમાં હડકંપ

• ઉત્તર ગુજરાતના રાજકારણમાં ભાજપ સાંસદના નિવેદનથી ગરમાવો
• ભાજપના સાંસદે અર્બુદા સેનાના કાર્યાલયનું ઉદ્ઘાટન કરતા મામલો ચર્ચામાં
• વિપુલ ચૌધરીને ફરી ગૃહમંત્રી બનાવવા ઈચ્છુ છુ : ભરતસિંહ ડાભી

ઉત્તર ગુજરાતના રાજકારણમાં હડકંપ સર્જતા સમાચાર સામે આવ્યા છે. જેમાં ભાજપના સાંસદ ભરતસિંહ ડાભીએ મહેસાણા જિલ્લાના ખેરાલુમાં અર્બુદા સેનાના કાર્યાલયના ઉદ્ઘાટન કરતા રાજકારણમાં ગરમાવો આવ્યો છે. આ દરમિયાન ભાજપના સાંસદ ભરતસિંહ ડાભીનો વિપુલ ચૌધરી પર સ્નેહ છલકાયો હોય તેમ સાંસદ ભરતસિંહે 
વિપુલ ચૌધરીને ફરી ગૃહમંત્રી બનાવવા ઈચ્છુ છું. આવું  નિવેદન આપતા સમગ્ર પંથકમાં ચર્ચાએ જોર પકડયું છે. 

ભાજપના સાંસદ ભરતસિંહ ડાભીનો વિપુલ ચૌધરી પર સ્નેહ છલકાયો
એક બાજુ ગુજરાત વિધાનસભાની ચૂંટણી માથે છે. જેને લઈને ગુજરાતના રાજકારણમાં નીતનવી ઊથલપાથલ થઇ રહી છે. તેવામાં ઉત્તર ગુજરાતના રાજકારણમાં ભાજપના  સાંસદ ભરતસિંહ ડાભીના નિવેદનથી ગરમાવો આવ્યો છે.સાંસદ ભરતસિંહ ડાભીએ ખેરાલુમાં અર્બુદા સેનાના કાર્યાલય ઉદ્ઘાટન કરતી વેળાએ વિવાદિત સંબોધન કરી નાખ્યું હતું. ખુદ ભાજપના જ સાંસદે પોતાના જ મતવિસ્તારમાં વિપુલ ચૌધરીને સક્રિય રાજકારણમાં ફરી લાવવાની વાત કરી દેતા મુદ્દો ચર્ચાના ચકડોળે ચડયો છે. આ તકે ભરતસિંહ ડાભીએ જાહેરમાં હુંકાર કરતાં જણાવ્યું હતું કે બધા એકઠા થઇને વર્ષ 2022માં વિપુલ ચૌધરીને ફરી રાજકારણમાં લાવીએ. એટલું જ નહીં પોતે વિપુલ ચૌધરીને ફરી ગૃહમંત્રી બનાવવા ઇચ્છતા હોવાનું પણ ભરતસિંહ ડાભીએ ઉમેર્યું હતું.

ભરતસિંહએ ઉદ્ઘાટન દરમિયાન કરેલા સંબોધનથી વિવાદ
ઉલ્લેખનીય છે કે મહેસાણા સહિત ગુજરાતભરમાં ચૌધરી સમાજમાં મોટું નામ ધરાવતા દૂધ સાગર ડેરીના પૂર્વ ચેરમેન અને ગુજરાતના પૂર્વ ગૃહમંત્રી વિપુલ ચૌધરીએ અર્બુદા સેના બનાવી છે. જે પાર્ટી ભાજપ સામે લડવા જ બનાવી હોવાની જે-તે સમયે લોકોમાં ચર્ચા જાગી હતી. ત્યારબાદ હવે ભાજપના સાંસદે અર્બુદા સેનાના કાર્યાલયનું ઉદ્ઘાટન કરી આ પ્રકારનું નિવેદન આપતા સવાલો ઊભા થયા છે.