કવાયત / સુરતમાં દિવાળીએ મનપાની ઈમારતો પર નહીં થાય રોશની, માત્ર 11 બ્રિજ ઝળહળશે

Surat Diwali Power Crisis : રાજ્યમાં વીજ કટોકટીની સ્થિતિને ધ્યાનમાં રાખીને સુરત મહાનગરપાલિકાએ દિવાળીના તહેવારને લઈને મહત્વનો નિર્ણય લીધો છે. આ વર્ષે દિવાળી દરમિયાન SMCની એકપણ ઈમારત પર લાઇટિંગ કરવામાં નહીં આવે. શહેરના મુખ્ય 11 બ્રિજ પર જ રોશની કરવામાં આવશે. આ નિર્ણય મહાનગરપાલિકાની સ્ટેન્ડિંગ કમિટીની બેઠકમાં લેવામાં આવ્યો છે.

માત્ર 11 બ્રિજ પર જ થશે લાઇટિંગ

દર વર્ષે દિવાળીના તહેવાર દરમિયાન સુરત મહાનગરપાલિકાની ઈમારતો સહિત શહેરના વિવિધ સ્થળોએ આકર્ષક લાઇટિંગ કરવામાં આવે છે. જોકે, આ વર્ષે વીજળીની સ્થિતિને ધ્યાનમાં રાખીને ખર્ચ અને વીજ વપરાશ ઘટાડવાનો નિર્ણય લેવાયો છે. આ વખતે મનપાની કોઈપણ ઈમારત પર રોશની નહીં થાય. માત્ર સુરતના મુખ્ય 11 બ્રિજને જ લાઇટિંગથી શણગારવામાં આવશે.

સાંજે 6થી રાત્રે 12 વાગ્યા સુધી જ રોશની

મનપા દ્વારા કરવામાં આવતું લાઇટિંગ પણ મર્યાદિત સમય માટે ચાલુ રાખવામાં આવશે. સામાન્ય દિવસોમાં સાંજે 6 વાગ્યાથી રાત્રે 12 વાગ્યા સુધી જ લાઇટિંગ ચાલુ રહેશે. જોકે, દિવાળીના દિવસે નાગરિકોની ઉજવણીને ધ્યાનમાં રાખીને આખી રાત રોશની ચાલુ રાખવામાં આવશે.

આ પણ વાંચો : અદાણી ગ્રૂપની વૈશ્વિક વિસ્તરણ યોજના, 16 દેશોમાં ઊર્જા સેક્ટરમાં ₹32,000 કરોડનું રોકાણ, નેધરલેન્ડ્સની કંપની ખરીદવા વિચારણા!

₹72 લાખના ખર્ચ સામે હવે માત્ર ₹10 લાખનું આયોજન

અગાઉ સમગ્ર શહેર અને મહાનગરપાલિકાની ઈમારતો પર દિવાળીની રોશની પાછળ આશરે ₹72 લાખનો ખર્ચ થતો હતો. આ વર્ષે માત્ર 11 બ્રિજ પર લાઇટિંગ કરવા માટે આશરે ₹10 લાખ ખર્ચવાનું આયોજન છે. આમ, લાઇટિંગનો વ્યાપ મર્યાદિત કરીને મહાનગરપાલિકા ખર્ચમાં ઘટાડો કરશે. સ્ટેન્ડિંગ કમિટીના ચેરમેન રાજન પટેલે આ નિર્ણય અંગે માહિતી આપતાં જણાવ્યું હતું કે રાજ્યમાં વીજ કટોકટીની સ્થિતિને ધ્યાનમાં રાખીને દિવાળીની રોશની મર્યાદિત રાખવાનો નિર્ણય લેવામાં આવ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ