Heavy rain forecast: ગુજરાતમાં આગામી 5 દિવસ ભારે વરસાદની આગાહી વચ્ચે તંત્ર એલર્ટ, સંભવિત વરસાદની આગાહીવાળા વિસ્તારોમાં અત્યાધુનિક સાધનો સાથે NDRFની ટીમો તૈનાત.
Share
ભારે વરસાદની આગાહી વચ્ચે તંત્ર સતર્ક
સંભવિત વિસ્તારમાં NDRFની 7 ટીમ ડિપ્લોઇડ
વહેલી સવારથી ગુજરાતના 76 તાલુકામાં વરસાદ
ઓફશોર ટ્રફ, વેસ્ટર્ન ડિસ્ટર્બન્સ અને સાયક્લોનિક સર્ક્યુલેશનના કારણે ગુજરાતના વિવિધ વિસ્તારોમાં પાંચ દિવસ સુધી ભારેથી અતિભારે વરસાદની આગાહી કરવામાં આવી કરવામાં છે. હવામાન વિભાગની ભારે વરસાદની આગાહીને પગલે તંત્ર એલર્ટ થઈ ગયું છે. તંત્ર દ્વારા સંભવિત વરસાદની આગાહી વાળા વિસ્તારમાં NDRFની 7 ટીમો ડિપ્લોઈડ કરવામાં આવી છે.
ફાઈલ ફોટો
આ વિસ્તારોમાં NDRFની ટીમ ખડેપગે રખાઈ
ભારે વરસાદની હવામાન વિભાગની આગાહીને પગલે અમરેલી, જૂનાગઢ, જામનગર, કચ્છમાં NDRFની 1-1 ટીમ સ્ટેન્ડબાય રાખવામાં આવી છે. આ ઉપરાંત નવસારી, રાજકોટ અને વલસાડમાં 1-1 ટીમ સ્ટેન્ડબાય રાખવામાં આવી છે. આપને જણાવી દઈએ કે, ગુજરાતમાં વરસાદના કારણે હજુ પણ 34 જેટલા રસ્તા બંધ છે. જેમાં 2 સ્ટેટ હાઇવે, પંચાયત હસ્તકના 30 અન્ય 2 સહિત 34 રસ્તા બંધ છે. તો રાજકોટમાં 1 અને જૂનાગઢમાં 1 સ્ટેટ હાઇવે બંધ છે.
આગામી 5 દિવસ વરસાદની આગાહી
ગુજરાતમાં મેઘરાજાની સવારીનો બીજો રાઉન્ડ શરૂ થયો છે. હવામાન વિભાગે રાજ્યમાં આગામી 5 દિવસ વરસાદની આગાહી કરી છે. આગામી 24 કલાક સૌરાષ્ટ્ર-કચ્છમાં ભારેથી અતિભારે વરસાદની આગાહી કરવામાં આવી છે. ઉત્તર ગુજરાતમાં પણ ભારે વરસાદની સંભાવના છે. જામનગર, દ્વારકા અને પોરબંદરમાં રેડ એલર્ટ જાહેર કરવામાં આવ્યું છે. આ ઉપરાંત પાટણ, બનાસકાંઠા, સાબરકાંઠા, મેહસાણામાં ઓરેન્જ એલર્ટ જાહેર કરવામાં આવ્યું છે. તો અમદાવાદમાં યલો એલર્ટ અપાયું છે.
ગુજરાતમાં આગામી 36 કલાક ભારે વરસાદની સંભાવનાઃ અંબાલાલ
હવામાન વિભાગ ઉપરાંત હવામાન નિષ્ણાંત અંબાલાલ પટેલે પણ વરસાદને લઈને આગાહી કરી છે. અંબાલાલ પટેલના જણાવ્યા અનુસાર, ગુજરાતમાં આગામી 36 કલાક ભારે વરસાદની સંભાવના છે. આગામી 36 કલાક પૂર્વ ગુજરાત, ઉત્તર ગુજરાત સહિત સૌરાષ્ટ્રમાં ભારે વરસાદની સંભાવના છે. તેઓએ જણાવ્યું છે કે, આ સમયગાળા દરમિયાન સિદ્ધપુર, વડનગર સહિત સમગ્ર ઉત્તર ગુજરાતમાં ભારે વરસાદની શક્યતા છે. તો પૂર્વ ગુજરાતમાં દાહોદ સહિતના વિસ્તારોમાં પણ ભારે વરસાદ પડી શકે છે.
નદીઓમાં આવશે પૂર: અંબાલાલ પટેલ
તેમણે કહ્યું છે કે, આગામી 8થી 12 જુલાઈ વચ્ચે પશ્ચિમ સૌરાષ્ટ્રમાં પણ વરસાદ વરસશે. જૂનાગઢ, વેરાવળ સહિતના વિસ્તારમાં હજુ 5 ઈંચથી વધુ વરસાદ નોંધાશે. કચ્છના કેટલાક વિસ્તારમાં ભારે વરસાદની શક્યતા છે. ભારે વરસાદના કારણે બનાસકાંઠાની નદીઓમાં પૂર આવશે. આ સાથે નર્મદા, તાપી, રૂપેણ નદીમાં પૂરની આશંકા છે.
