Republic Day 2026 / જગદીશ વિશ્વકર્માથી લઇને હર્ષ સંઘવીએ કર્યું ધ્વજવંદન, લહેરાવ્યો તિરંગો, કર્યું સંબોધન

Republic Day 2026 : દેશભરમાં આજે 77મા પ્રજાસત્તાક દિવસની ઉજવણી ખૂબ જ ઉત્સાહ અને ગૌરવ સાથે કરવામાં આવી. આ અવસરે ગુજરાતના વિવિધ વિસ્તારોમાં પણ શાનદાર કાર્યક્રમો યોજાયા, જેમાં લોકોમાં દેશપ્રેમ અને એકતાનો ભાવ સ્પષ્ટ જોવા મળ્યો.

ગાંધીનગરમાં રાજ્યસ્તરીય ઉજવણી

ગાંધીનગરના કમલમ ખાતે પ્રજાસત્તાક દિવસ નિમિત્તે ધ્વજવંદન સમારોહ યોજાયો હતો. આ કાર્યક્રમમાં ભાજપ પ્રદેશ પ્રમુખ જગદીશ વિશ્વકર્માએ ત્રિરંગો લહેરાવીને રાષ્ટ્રધ્વજને સલામી આપી. ધ્વજવંદન બાદ પોતાના સંબોધનમાં તેમણે જણાવ્યું કે, આજે ભારતના નાગરિકો “વિકસિત ભારત”ના સંકલ્પ સાથે આગળ વધી રહ્યા છે.

ભાજપ પ્રદેશ પ્રમુખ જગદીશ વિશ્વકર્માએ કહ્યું કે, વડાપ્રધાન નરેન્દ્ર મોદીના નેતૃત્વમાં ગુજરાત અને સમગ્ર દેશ વિકાસની નવી ઊંચાઈઓએ પહોંચ્યો છે.તેમણે મુખ્યમંત્રી ભૂપેન્દ્ર પટેલની પ્રશંસા કરતા કહ્યું કે, રાજ્ય સરકાર સંપૂર્ણ નિષ્ઠાથી વિકાસની દિશામાં કાર્ય કરી રહી છે.

જગદીશ વિશ્વકર્માએ પોતાના ભાષણમાં વધુમાં જણાવ્યું કે, આજે ભારત તમામ ક્ષેત્રોમાં આગળ વધી રહ્યું છે. ખાસ કરીને રક્ષા ક્ષેત્રે દેશ આત્મનિર્ભર બન્યો છે, જે દરેક ભારતીય માટે ગૌરવની બાબત છે. તેમણે કહ્યું કે, નરેન્દ્ર મોદી પ્રધાનમંત્રી બન્યા પછી દેશની સુરક્ષા અને એકતા વધુ મજબૂત બની છે અને જમ્મુ-કાશ્મીરમાંથી કલમ 370 દૂર થવાથી ઐતિહાસિક નિર્ણય લેવાયો છે.

આ પણ વાંચો : 77માં પ્રજાસત્તાક પર્વની ઉજવણીએ દિલ્હીના કર્તવ્યપથ પર ગુજરાતના ટેબ્લો બનશે આકર્ષણનું કેન્દ્ર

અમદાવાદમાં પોલીસ વિભાગ દ્વારા ભવ્ય કાર્યક્રમ

અમદાવાદના મકરબા સ્થિત ગ્રામ્ય પોલીસ હેડક્વાર્ટર ખાતે પણ 77મા પ્રજાસત્તાક દિવસની ઉજવણી કરવામાં આવી. આ કાર્યક્રમમાં નાયબ મુખ્યમંત્રી હર્ષ સંઘવીની ખાસ ઉપસ્થિતિ રહી. કાર્યક્રમ દરમિયાન ગ્રામ્ય જિલ્લા પોલીસના જવાનોએ શિસ્તબદ્ધ પરેડ કરી અને રાષ્ટ્રને સલામી આપી. જિલ્લા કક્ષાના આ કાર્યક્રમમાં સ્કૂલના બાળકો પણ ભાગ લઈને દેશભક્તિની ઝલક રજૂ કરી. સમગ્ર વાતાવરણ રાષ્ટ્રપ્રેમના રંગે રંગાયું હતું.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ