ક્રિકેટ / IND vs AFG: એ 11 ધુરંધર ખેલાડીઓ, જે ટીમ ઇન્ડિયાને બનાવશે ચેમ્પિયન

ક્રિકેટ ચાહકોની આતુરતાનો અંત હવે નજીક આવી ગયો છે. ભારત અને અફઘાનિસ્તાન વચ્ચે રમાનાર એકમાત્ર ટેસ્ટ મેચ ન્યૂ ચંડીગઢના મહારાજા યાદવેન્દ્ર સિંહ આંતરરાષ્ટ્રીય ક્રિકેટ સ્ટેડિયમમાં શરૂ થવા જઈ રહી છે. આ મુકાબલાને લઈને ક્રિકેટ જગતમાં ભારે ઉત્સાહ જોવા મળી રહ્યો છે. ભારતીય ટીમે આ ટેસ્ટ માટે કેટલાક અનુભવી ખેલાડીઓને આરામ આપ્યો છે પરંતુ તેમ છતાં ટીમનું સંતુલન મજબૂત દેખાઈ રહ્યું છે. કેપ્ટન શુભમન ગિલની આગેવાનીમાં ટીમ ઇન્ડિયા જીતના ઇરાદા સાથે મેદાનમાં ઉતરશે.

યશસ્વી અને રાહુલ કરશે ઇનિંગ્સની શરૂઆત

અફઘાનિસ્તાન સામેની ટેસ્ટ મેચમાં ભારત તરફથી યશસ્વી જયસ્વાલ અને કેએલ રાહુલ ઓપનિંગ કરતા જોવા મળી શકે છે. છેલ્લા કેટલાક સમયથી બંને બેટ્સમેન ઉત્તમ ફોર્મમાં છે અને સતત રન બનાવી રહ્યા છે. તાજેતરમાં પૂર્ણ થયેલી IPL સિઝનમાં પણ બંને ખેલાડીઓએ પોતાની ટીમ માટે મહત્વનું યોગદાન આપ્યું હતું. યશસ્વીની આક્રમક બેટિંગ અને રાહુલનો અનુભવ ભારતીય ટીમને મજબૂત શરૂઆત અપાવી શકે છે.

નંબર-3 પર સાઈ સુદર્શનને મળશે મોટી જવાબદારી

યુવા બેટ્સમેન સાઈ સુદર્શનને ત્રીજા ક્રમે બેટિંગ કરવાની તક મળવાની લગભગ ખાતરી માનવામાં આવી રહી છે. ટીમ ઇન્ડિયાના મુખ્ય કોચ ગૌતમ ગંભીરનું માનવું છે કે સુદર્શન પાસે ટેસ્ટ ક્રિકેટમાં લાંબી ઇનિંગ્સ રમવાની ક્ષમતા છે અને તેમને સતત તક મળવી જોઈએ. ટીમ મેનેજમેન્ટ પણ તેમને ભવિષ્યના મહત્વના ખેલાડી તરીકે તૈયાર કરવા માંગે છે. તેથી નંબર-3 પર તેમને મહત્વની જવાબદારી સોંપવામાં આવી શકે છે.

ગિલ, પંત અને જુરેલ પર રહેશે જવાબદારી

ભારતીય ટીમનો મધ્યક્રમ કેપ્ટન શુભમન ગિલ, વિકેટકીપર બેટ્સમેન ઋષભ પંત અને યુવા ખેલાડી ધ્રુવ જુરેલ પર નિર્ભર રહેશે. ગિલ હાલમાં શાનદાર ફોર્મમાં છે અને કેપ્ટન તરીકે પોતાની જવાબદારી નિભાવવા આતુર છે. બીજી તરફ ઋષભ પંત પોતાની આક્રમક બેટિંગથી કોઈપણ સમયે મેચનું પાસું પલટાવી શકે છે. ધ્રુવ જુરેલે પણ તાજેતરમાં પોતાની બેટિંગ અને સંયમથી સૌનું ધ્યાન ખેંચ્યું છે.

બે ઓલરાઉન્ડર સાથે ઉતરી શકે છે ભારત

ભારતીય ટીમ આ ટેસ્ટ મેચમાં બે ઓલરાઉન્ડર ખેલાડીઓને તક આપી શકે છે. વોશિંગ્ટન સુંદરનું સ્થાન લગભગ નિશ્ચિત માનવામાં આવે છે. તેમની સાથે હર્ષ દુબે અથવા માનવ સુથારમાંથી કોઈ એક ખેલાડીને ટેસ્ટ ડેબ્યૂ કરવાની તક મળી શકે છે. બંને ખેલાડીઓએ ઘરેલુ ક્રિકેટમાં શાનદાર પ્રદર્શન કરીને પસંદગીકારોનું ધ્યાન પોતાની તરફ ખેંચ્યું છે.

બોલિંગમાં સિરાજ અને કુલદીપ રહેશે મુખ્ય હથિયાર

ભારતીય બોલિંગ આક્રમણની જવાબદારી મોહમ્મદ સિરાજ અને પ્રસિદ્ધ કૃષ્ણા સંભાળશે. બંને ઝડપી બોલરોએ રેડ-બોલ ક્રિકેટમાં સતત પ્રભાવશાળી દેખાવ કર્યો છે. સ્પિન વિભાગમાં કુલદીપ યાદવ ભારતના મુખ્ય હથિયાર રહેશે. તેમની વિવિધતા અને વિકેટ લેવાની ક્ષમતા અફઘાનિસ્તાનના બેટ્સમેનો માટે પડકારરૂપ બની શકે છે.

ભારતની સંભવિત પ્લેઇંગ-11

• યશસ્વી જયસ્વાલ
• કેએલ રાહુલ
• સાઈ સુદર્શન
• શુભમન ગિલ (કેપ્ટન)
• ઋષભ પંત (વિકેટકીપર)
• ધ્રુવ જુરેલ
• વોશિંગ્ટન સુંદર
• હર્ષ દુબે / માનવ સુથાર
• મોહમ્મદ સિરાજ
• પ્રસિદ્ધ કૃષ્ણા
• કુલદીપ યાદવ

ભારતની આ સંભવિત ટીમમાં અનુભવ અને યુવા પ્રતિભાનો સુંદર સમન્વય જોવા મળે છે. હવે જોવાનું રહેશે કે શુભમન ગિલની આગેવાનીમાં ટીમ ઇન્ડિયા અફઘાનિસ્તાન સામે કેવી શરૂઆત કરે છે અને જીત સાથે ટેસ્ટ સિઝનની શરૂઆત કરવામાં સફળ રહે છે કે નહીં.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ