બિઝનેસ / શેર બજારની જેમ ગોલ્ડ માર્કેટમાં આવશે તોફાની તેજી.! સોનું 6500 રૂપિયા મોંઘું થઈ શકે, આ રહ્યા કારણો

• આવનારા 6 મહિનામાં વધી શકે છે સોના-ચાંદીનાં ભાવ
• હાલનાં લેવલથી 6500 રૂપિયા વધી શકે છે સોનાની કિંમત
• મંદી અને ફુગાવા સહિત અનેક કારણો જવાબદાર

એક્સપર્ટસ્ કહે છે કે આવનારાં 6 મહિના બજાર પર ભારી પડી શકે છે એટલું જ નહીં ગોલ્ડ અને સિલ્વરનાં ભાવ પણ આસમાને પહોંચી શકે છે. જાણકારો જણાવે છે કે સોનાનાં ભાવમાં 6500 રૂપિયા જ્યારે ચાંદીના ભાવમાં 20000 રૂપિયાનો વધારો થઈ શકે છે. આ આંકડાઓ જોતાં સ્પષ્ટ થાય છે કે આવનારાં 180 દિવસોમાં સોનાની કિંમત 65 હજારને ક્રોસ કરી શકે છે જ્યારે ચાંદીનાં ભાવ તો 90 હજારને પાર કરી શકે છે.

હાલનાં લેવલથી 6500 રૂપિયા વધી શકે છે
IIFLનાં વાઈઝ પ્રેસિડેન્ટ અનુજ ગુપ્તા અનુસાર હાલમાં માર્કેટ પીક પર છે. તેમણે કહ્યું કે થોડા સમયમાં મોંઘવારીનાં આંકડાઓમાં વધારો થઈ શકે છે. જેના કારણે ગોલ્ડ પણ મોંઘું થાય તેની શક્યતા જણાઈ રહી છે. તેમણે કહ્યું કે ગોલ્ડની કિંમત હાલનાં લેવલથી 6500 રૂપિયા વધી શકે છે. વર્તમાનમાં મલ્ટી કોમોડિટી એક્સચેન્જ પર ગોલ્ડનાં ભાવ 58500 રૂપિયા પાર અને ચાંદીનાં ભાવ 70300 રૂપિયા પ્રતિ કિગ્રા પહોંચ્યાં છે.

શું છે કારણો?
આમ તો ભાવ વધવા પાછળ અનેક કારણો હોઈ શકે છે પરંતુ તેનું મુખ્ય કારણ ડી-ડૉલરાઈઝેશન જણાઈ રહ્યું છે. વૈશ્વિક અર્થતંત્રમાં ડૉલરની અવગણનાને લીધે ગોલ્ડને વધુ મહત્વ મળી રહ્યું છે. તો બીજી તરફ ઈંફ્લેશન અને રિસેશન (ફુગાવો અને મંદી) આ બે કારણો ગોલ્ડને સપોર્ટ કરતાં દેખાઈ રહ્યાં છે. આ સિવાય રેટ ઓફ રિટર્નની સંભાવના ઘટી જવાને લીધે રોકાણકારોનું ધ્યાન ગોલ્ડ તરફ ખેંચાઈ રહ્યું છે જેના કારણે આવનારા દિવસોમાં સોના-ચાંદીનાં ભાવમાં વધારો નોંધાઈ શકે છે.

મંદીની અસર
અમેરિકા અને યૂરોપ સિવાય ચીનમાં પણ મંદીનું વાતાવરણ વધવાની સંભાવના જણાઈ રહી છે. હાલના મહિનામાં જર્મની, ન્યૂઝીલેન્ડ જેવા દેશોમાં ઓફિશિયલ મંદીની ઘોષણા કરવામાં આવી હતી. અમેરિકામાંથી પણ જે પ્રકારે આંકડાઓ સામે આવી રહ્યાં છે તેને જોઈને મંદીની સંભાવના વધતી દેખાઈ રહી છે. તેવામાં ગોલ્ડની ડિમાન્ડમાં વધારો થઈ શકે છે અને કિંમતો પણ આસમાને પહોંચી શકે છે.

શેરબજારમાં કરેક્શનની અસર
આવનારા દિવસોમાં શેર બજારમાં કરેક્શન જોવા મળી શકે છે. જાણકારો અનુસાર ગ્લોબલ માર્કેટથી લઈને સ્થાનીક શેર બજાર મોંઘી થઈ રહી છે. સેંસેક્સમાં આવનારાં થોડા દિવસોમાં 2000થી 2500 અંકનું કરેક્શન જોવા મળી શકે છે. જેથી ઓવરવેલ્યૂડ માર્કેટમાં રેટ ઓફ રિટર્ન ઓછું થઈ જવાને લીધે ગોલ્ડની કિંમતમાં વધારો જોવા મળી શકે છે.

ફુગાવાની અસર
ગ્લોબલ અને લોકલ લેવલ પર ધીમે-ધીમે મોંઘવારી વધી રહી છે. જૂન જૂલાઈનાં ભારતનાં મોંઘવારીનાં આંકડાઓ પણ ચોંકાવી શકે છે. તેવામાં શેરબજારમાં ઘટાડો અને ગોલ્ડની કિંમતમાં તેજીની શક્યતા વધી જાય છે. મે મહિનામાં રિટેલ મોંઘવારી 4.25%ની આસપાસ છે જે જૂનમાં 4.50% થી વધી શકે છે.