ક્રિકેટમાં ચકચાર / ટીમ ઈન્ડિયાનો 'ટ્યૂટર નાપાસ'! આફ્રિકા ટેસ્ટમાં વ્હાઈટવોશ બાદ ગૌતમ ગંભીરે કર્યું મોટું એલાન, ખેલમાં હડકંપ

દક્ષિણ આફ્રિકા સામે બે મેચની ટેસ્ટ શ્રેણીમાં ભારતના વ્હાઈટવોશ બાદ મુખ્ય કોચ ગૌતમ ગંભીરે એક એલાન કરીને બધાને ચોંકાવી દીધા હતા. પ્રેસ કોન્ફરન્સમાં ગંભીરે કહ્યું કે મારુ ભવિષ્ય હવે બીસીસીઆઈને હવાલે છે, ગંભીરે કહ્યું, "મારું ભવિષ્ય બીસીસીઆઈ નક્કી કરશે, પરંતુ હું એ જ વ્યક્તિ છું જેણે ઇંગ્લેન્ડમાં તમને પરિણામો અપાવ્યા અને ચેમ્પિયન્સ ટ્રોફી જીતી હતી.

હાર માટે બધા જવાબદાર

ગંભીરે હારની જવાબદારી લીધી. તેમણે એક પ્રેસ કોન્ફરન્સમાં કહ્યું, "કોઈ એક ખેલાડી કે કોઈ એક શોટને દોષ આપવો વાજબી રહેશે નહીં. આ હાર માટે બધા જવાબદાર છે, મારાથી શરૂ કરીને. મેં ક્યારેય હાર પછી કોઈ ખેલાડીને દોષ આપ્યો નથી, અને ભવિષ્યમાં પણ આવું કરીશ નહીં. પહેલી ઇનિંગમાં એક સમયે અમારો સ્કોર એક વિકેટે 95 રન હતો, જે સાત વિકેટે 122 રન થઈ ગયો. આ સ્વીકાર્ય નથી. તમે કોઈ એક વ્યક્તિ કે કોઈ ચોક્કસ શોટને દોષી ઠેરવી શકો નહીં. દોષ બધાનો છે. મેં ક્યારેય કોઈ એક વ્યક્તિને દોષ આપ્યો નથી અને ભવિષ્યમાં પણ ક્યારેય નહીં કરું.

ગંભીરની લીડરીશપમાં ભારતની સૌથી મોટી હાર

ગંભીરના નેતૃત્વમાં, ભારતે 18 ટેસ્ટ મેચમાંથી 10 હારી છે, જેમાં ગયા વર્ષે ન્યુઝીલેન્ડ સામે અને હવે ઘરઆંગણે દક્ષિણ આફ્રિકા સામેની હારનો સમાવેશ થાય છે. ગુવાહાટીમાં દક્ષિણ આફ્રિકા સામે ભારતનો પરાજય ટેસ્ટ ક્રિકેટમાં રનની દૃષ્ટિએ તેમની સૌથી મોટી હાર છે.

ગંભીરનું હેડ કોચ પદ હવે ખતરામાં

સાઉથ આફ્રિકા સામેની મોટી હાર બાદ હવે ગંભીરનું હેડ કોચ પદ હવે ખતરામાં આવી ગયું છે. છેલ્લા ઘણા સમયથી ગંભીરને હટાવાનો ગણગણાટ ચાલી રહ્યો છે એટલે હવે બીસીસીઆઈ એક્શન લઈ શકે છે.

વધુ વાંચો : 'સ્મૃતિ મંધાનાના વરે ગર્લફ્રેન્ડને સ્પામાં બોલાવી', ઈન્ટરનેટે ઉઘાડા પાડ્યાં પલાશ મુચ્છલના ભૂતકાળના લફરાં!

ભારતની 408 રનથી શરમજનક હાર

ન્યૂઝીલેન્ડ સામે 0-3થી હારનાર ટીમ ઈન્ડિયા હવે દક્ષિણ આફ્રિકા સામે 2-0થી કચડી ગઈ છે. કોલકાતા ટેસ્ટ 30 રનથી હાર્યા બાદ, ગુવાહાટી ટેસ્ટમાં પણ ટીમ ઈન્ડિયાને 408 રનથી શરમજનક હારનો સામનો કરવો પડ્યો હતો. ગયા વર્ષે ત્રણેય ફોર્મેટમાં ટીમ ઈન્ડિયાના કોચ બનેલા ગંભીરના નેતૃત્વમાં ઘરઆંગણે નવ મેચોમાં આ ભારતીય ટીમનો પાંચમો પરાજય છે. તેમાંથી ફક્ત ચાર જીત બાંગ્લાદેશ અને વેસ્ટ ઈન્ડિઝ જેવી નબળી ટીમો સામે આવી હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ