સ્વાસ્થ્ય / જિંદગીનાં કોઈ પણ તબક્કે એક્સર્સાઇઝ થશે ફાયદાકારક, અનેક સમસ્યાઓથી મળશે છૂટકારો

સંશોધકોએ એક અભ્યાસ હાથ ધરીને આ દાવાની પુષ્ટિ પણ કરી છે. તેમણે કહ્યું કે, એક્સર્સાઇઝ (Exercise) ફક્ત યુવાવસ્થામાં જ કરવાની હોય છે એ સાવ ખોટી વાત છે. કસરત કોઈ પણ ઉંમરે કરીને તેનો લાભ મેળવી શકાય છે. આ અભ્યાસના મુક્ય સંશોધક અને બર્મિંગહામ યુનિવર્સિટીનાં લેહ બ્રિને જણાવ્યું કે, તમે તમારી જિંદગીમાં નિયમિત રીતે એક્સર્સાઇઝ કરી છે કે નહીં તેનાથી કોઈ ફરક પડતો નથી.

તમે જિંદગીના કોઈ પણ તબક્કે એક્સર્સાઇઝ શરૂ કરી શકો છો અને તેનો ફાયદો પણ મેળવી શકો છો. જોકે, સ્પષ્ટરૂપે સારા સ્વાસ્થ્ય માટે લાંબા સમય સુધી વ્યાયામ કરવો બહુ જરૂરી હોય છે, પરંતુ આમ છતાં પણ તમે કોઈ પણ ઉંમરે ડર્યા વગર એક્સર્સાઇઝની શરૂઆત કરી શકો છો. પાછલી ઉંમરે નિયમિત એક્સર્સાઇઝ કરવાથી ઉમંર સાથે જોડાયેલી તમામ પરેશાનીઓ અને માંસપેશીઓની નબળાઈ જેવી સમસ્યાઓથી તમે છૂટકારો પણ મેળવી શકો છો.

‘ફ્રન્ટિયર્સ ઈન ફિઝિયોલૉજી’ નામની પત્રિકામાં પ્રકાશિત થયેલા આ અભ્યાસમાં વૃદ્ધ લોકોના બે જૂથો વચ્ચે માંસપેશીઓનાં નિર્માણની ક્ષમતાની સરખામણી કરવામાં આવી હતી. પહેલા જૂથમાં ગત સદીના સાતમા અને આઠમા દાયકાના ઉચ્ચ શ્રેણીનાં ઍથ્લીટને સામેલ કરવામાં આવ્યા હતા. આ એવા લોકો હતા, જેમની લગભગ આખી જિંદગી નિયમિત એક્સર્સાઇઝ સાથે જોડાયેલી હતી.

બીજા જૂથમાં આઠ એવા લોકો સામેલ કરવામાં આવ્યા, જેમણે તેમના જીવનમાં ક્યારેય પણ એક્સર્સાઇઝ કરી જ ન હોતી. સંશોધકોએ 48 કલાકના સમયગાળામાં તમામ પ્રતિયોગીઓની તપાસ હાથ ધરી હતી. એક્સર્સાઇઝથી પહેલા અને બાદમાં માંસપેશીઓની ઊંડી તપાસ કરવામાં આવી હતી કે તેમાં કેવા પ્રકારની પ્રતિક્રિયા થઈ રહી છે.
સંશોધકોને એવી આશા હતી કે, પહેલા જૂથની પ્રતિક્રિયા બહુ શાનદાર રહેશે, કેમ કે એ ગ્રુપમાં જાણીતા ઍથ્લીટ સામેલ હતા, પરંતુ પરિણામો બહુ ચોંકાવનારા મળ્યા હતા. તેમને જાણવા મળ્યું કે, બંને જૂથોમાં માંસપેશીઓના નિર્માણની ક્ષમતા એક જેવી જ હતી અને તેમનામાં બહુ મોટો ફરક ન હોતો.