મોટો ફટકો / બૅન્કરપ્ટ થઈને સૌથી મોટી રિયલ એસ્ટેટ કંપનીએ ચીનની હાલત કરી ખરાબ, અમેરિકાની ઈકોનોમી હલાવી નાંખી

• ચીનની અર્થવ્યવસ્થા મંદીનો સામનો કરી રહી છે
• રિયલ એસ્ટેટ કંપની એવરગ્રાન્ડે ગ્રૂપે નાદારી જાહેર કરી
• જાહેરાત બાદ અમેરિકામાં હલચલ મચી ગઈ હતી
• ચીનની અર્થવ્યવસ્થાને મોટો ફટકો પડ્યો

કોવિડ રોગચાળા દરમિયાન પાટા પરથી ઉતરી ગયેલી ચીનની અર્થવ્યવસ્થા મંદીનો સામનો કરી રહી છે. હવે ચીનની બગડતી અર્થવ્યવસ્થાની પકડમાં તેની મોટી કંપનીઓ આવવા લાગી છે અને તેની અસર માત્ર ચીન પુરતી જ સીમિત નથી. તાજેતરમાં ચીનની સૌથી મોટી રિયલ એસ્ટેટ કંપની એવરગ્રાન્ડે ગ્રૂપે પોતાને નાદાર જાહેર કર્યા. કંપનીની આ જાહેરાત બાદ અમેરિકામાં હલચલ મચી ગઈ હતી. કારણ કે એવરગ્રાન્ડે ગ્રુપે ન્યૂયોર્કની કોર્ટમાં ચેપ્ટર-15 હેઠળ નાદારી સુરક્ષા માટે અરજી કરી છે. ચીની જાયન્ટની નાદારી સ્પષ્ટપણે તેના બગડતા આર્થિક સ્વાસ્થ્યને વ્યાખ્યાયિત કરી રહી છે, તે અર્થતંત્રના મોરચે કેવા સંકટનો સામનો કરી રહી છે.

બે વર્ષમાં 582 બિલિયન યુઆન ડૂબ્યા 

છેલ્લા છ મહિનામાં Evergrande Groupના $4.5 બિલિયનનો નાશ થયો છે. કંપનીએ બે વર્ષમાં 582 બિલિયન યુઆન ડૂબ્યા છે. ભારે દેવાના બોજ હેઠળ દબાયેલી આ કંપની પર 330 અબજ ડોલરથી વધુનું દેવું છે. Evergrande Group ના નાદારીના સમાચાર એવા સમયે આવ્યા છે જ્યારે ચીનની અર્થવ્યવસ્થા પાટા પર પાછા આવવાના રસ્તાઓ શોધી રહી છે. બીજી તરફ ચીનમાં રિયલ એસ્ટેટ માર્કેટની હાલત કફોડી છે. કારણ કે ઘણી કંપનીઓએ તેમના પ્રોજેક્ટ પૂરા કર્યા છે. પરંતુ તેમને ખરીદનાર નથી મળી રહ્યો. થોડા સમય પહેલા ચીનની અન્ય એક રિયલ એસ્ટેટ કંપની કન્ટ્રી ગાર્ડને જણાવ્યું હતું કે પ્રથમ છ મહિનામાં તેને 7.6 અબજ ડોલર સુધીનું મોટું નુકસાન થયું છે.

ચીનની અર્થવ્યવસ્થાને મોટો ફટકો

ચીનના જીડીપીમાં એકલા રિયલ એસ્ટેટ ક્ષેત્રનો હિસ્સો 30 ટકા છે. આવી સ્થિતિમાં એવરગ્રાન્ડ જેવી દિગ્ગજ કંપનીની નાદારી ચીનની અર્થવ્યવસ્થા માટે મોટો ફટકો છે. કારણ કે તેની અસર સમગ્ર રિયલ એસ્ટેટ સેક્ટર પર પડી છે. ચેપ્ટર-15 કે જેના હેઠળ એવરગ્રાન્ડ ગ્રુપે યુએસમાં નાદારી સુરક્ષા માટે અરજી કરી છે, જેના દ્વારા યુએસમાં વિદેશી કંપનીઓની સંપત્તિ સુરક્ષિત છે. બિન-યુએસ કંપનીઓને લેણદારો પાસેથી રક્ષણ આપે છે જેઓ તેમની પર દાવો માંડવાનો અથવા તેમની યુ.એસ.માં સંપત્તિ જપ્ત કરવાનો પ્રયાસ કરે છે. એવરગ્રાન્ડે 2021માં લોનની ચુકવણી કરી શકી નથી. પછી તેણે તેનું કારણ કોવિડ સંક્રમણને જણાવ્યું. આ પછી અમેરિકામાં હલચલ મચી ગઈ હતી.

ચીનમાં બેરોજગારીનો દર રેકોર્ડ સ્તરે પહોંચ્યો 

કોવિડ બાદ ચીન અર્થવ્યવસ્થાના મોરચે સંઘર્ષ કરી રહ્યું છે. તેના જીડીપી દરની વૃદ્ધિ અનુમાન કરતાં સતત ઓછી નોંધાઈ રહી છે. ચીનમાં બેરોજગારીનો દર રેકોર્ડ સ્તરે પહોંચ્યો છે. આવી સ્થિતિમાં રિયલ એસ્ટેટ સેક્ટરની સતત નિષ્ફળતા તેના માટે મુશ્કેલી ઊભી કરી રહી છે. કારણ કે તેની અસર હવે અન્ય ક્ષેત્રો પર દેખાઈ રહી છે. ચીનના બજારમાં તેની અસર દેખાવા લાગી છે અને કંપનીનો શેર તૂટ્યો અને 2010 પછી પ્રથમ વખત તેના લઘુત્તમ સ્તરે પહોંચ્યો. સ્થિતિ એટલી ખરાબ થઈ ગઈ કે શેરનું ટ્રેડિંગ બંધ કરવું પડ્યું. નિષ્ણાતો કહે છે કે એવરગ્રાન્ડનું દેવું અને તેની નાદારી વિશ્વભરના બજારોમાં ગભરાટ પેદા કરી શકે છે.

Evergrande ચીનમાં લાખો નોકરીઓ આપે છે

Evergrande પર દેવાના બોજમાં વધારો થવાનું મુખ્ય કારણ તેની આક્રમક નીતિ રહી છે. છેલ્લા કેટલાક વર્ષોમાં આ રિયલ એસ્ટેટ જાયન્ટે તેના પરના દેવાના બોજને અવગણીને વિસ્તરણ પર ધ્યાન કેન્દ્રિત કર્યું હતું. કંપનીની આર્થિક સ્થિતિ બહાર ન આવવાને કારણે લોકોનો ભરોસો કંપની પર જ રહ્યો. પરંતુ 2020 માં જ્યારે ચીની સરકારે કંપનીઓની નાણાકીય સ્થિતિ પર દેખરેખ વધાર્યું, ત્યારે એવરગ્રાન્ડની વાસ્તવિકતા સામે આવી. રિપોર્ટ અનુસાર કંપનીમાં લગભગ 2 લાખ કર્મચારીઓ કામ કરે છે અને આ કંપની ચીનમાં દર વર્ષે 38-40 લાખ નોકરીઓ બનાવે છે.