ઇલેક્શન 2022 / આ વખતે ભાજપની 32 બેઠકો આવે તો પણ સારું, VTV Conclaveમાં બોલ્યા પરેશ ધાનાણી

• VTV Conclave - Election 2022નું આયોજન
• કોંગ્રેસ નેતા પરેશ ધાનાણી સાથે ખાસ વાતચીત
• તમામ વર્ગના લોકોએ કમળને કચડી નાખવાનો કર્યો છે સંકલ્પઃ ધાનાણી

ગુજરાત વિધાનસભાની ચૂંટણીને લઈ રાજકીય પક્ષોની હલચલ વધી ગઈ છે. ચૂંટણીની તારીખ જાહેર થવાની તૈયારી છે ત્યારે રાજકીય પક્ષોની ગતિવિધીઓ તેજ થઈ રાજકીય માહોલ જામતો નજરે ચડતો જોવા મળી રહ્યો છે. રાજકીય પક્ષોની અંદરો-અંદર ખેચાતાણ શરૂ થઈ ગઈ છે. આગામી વિધાનસભાની ચૂંટણીને લઈને રાજકોટ ખાતે VTV Conclave - Election 2022નું આયોજન કરવામાં આવ્યું હતું. જેમાં અમરેલીના કોંગ્રેસના ધારાસભ્ય અને પૂર્વ વિપક્ષ નેતા પરેશ ધાનાણીએ ભારતીય જનતા પાર્ટી પર આકરા પ્રહારો કર્યા હતા. 

ગરીબ, ગામડુ અને મધ્યમવર્ગીય પરિવારો મુદ્દાઓ આધારિત કરશે મતદાનઃ ધાનાણી
તેમણે જણાવ્યું હતું કે, 'નરેન્દ્રભાઈ આવ્યા ત્યારે ગુજરાતમાં ભાજપની 123 સીટો આવી હતી. જેમાં બાદમાં ઉતરોત્તર ઘટાડો થતો ગયો. ભાજપની 119 સીટો થઈ, પછી 115 થઈ અને 2017માં તો ભારતીય જનતા પાર્ટી 90એ આઉટ થઈ ગઈ હતી. આ વખતે મને સંપૂર્ણ વિશ્વાસ છે કે ગુજરાતના ગરીબ, ગામડુ અને મધ્યમવર્ગીય પરિવારો મુદ્દાઓ આધારિત મતદાન કરવાના છે.' 

તમામ વર્ગના લોકોએ કમળને કચડી નાખવાનો કર્યો છે સંકલ્પઃ ધાનાણી
પરેશ ધાનાણીએ ચેલેન્જ આપતા કહ્યું હતું કે, 'જો મુદ્દાઓ આધારિત મતદાન થશે, તો 149 સીટોનો જે સર્વોચ્ચ ગ્રાફ હતો એ ગ્રાફ 2022માં કોંગ્રેસ કદાચ તોડી શકે છે અને અમે કદાચ 149નો ગ્રાફ તોડવામાં નિષ્ફળ જઈ તો માફ કરજો. પરંતુ 1990માં કોંગ્રેસની 32 સીટો આવી હતી સાહેબ આ વખતે ગુજરાતના તમામ વર્ગના લોકોએ સંકલ્પ કર્યો છે કે કમળને કચડી નાખવું છે. આ વખતે આ ભાજપવાળાની 32 સીટો આવે તો પણ સારું.' તેનો વીડિયો નીચે છે.