ક્રિકેટ / ભારત-ન્યુઝીલેન્ડ T20 સિરીઝ પહેલા ભારતને મોટો ફટકો, તિલક વર્મા ત્રણ મેચમાંથી બહાર

India vs New Zealand: ભારત-ન્યુઝીલેન્ડ શ્રેણી પહેલા ટીમ ઈન્ડિયાને મોટો ફટકો પડ્યો છે. તિલક વર્મા પાંચ મેચની શ્રેણીની પ્રથમ ત્રણ મેચમાંથી બહાર થઈ ગયો છે. તિલકને ગુરુવારે સવારે હોસ્પિટલમાંથી રજા આપવામાં આવી હતી અને તેની તબિયત સારી છે. તે કાલે હૈદરાબાદ પરત ફરશે. તેના લક્ષણો ઓછા થયા પછી અને તેના ઘા રૂઝાયા પછી તે ધીમે ધીમે શારીરિક તાલીમ અને કૌશલ્ય પ્રેક્ટિસમાં પાછો ફરશે. જોકે તે ન્યૂઝીલેન્ડ સામેની પ્રથમ ત્રણ ટી20 મેચમાંથી બહાર થઇ ગયો છે. અંતિમ બે ટી20 માટે તેની ઉપલબ્ધતા તાલીમ અને કૌશલ્ય પ્રેક્ટિસમાં તેની પ્રગતિ પર આધારિત રહેશે.

તિલક વર્માનું બહાર થવું એ ભારતના વર્લ્ડ કપ મિશન માટે પણ એક મોટો ફટકો છે. એશિયા કપ 2025 ફાઇનલના હીરો અને મિડલ ઓર્ડરમાં તેજતરાર બેટ્સમેન તિલક વર્મા વર્લ્ડ કપને એક મહિના કરતાં પણ ઓછો સમય બાકી છે એવા સમયે ઘાયલ થયો છે.

પેટની સમસ્યાને કારણે હોસ્પિટલમાં પહોંચ્યા

23 વર્ષીય ડાબા હાથના બેટ્સમેન તિલક વર્મા રાજકોટમાં વિજય હજારે ટ્રોફીમાં હૈદરાબાદ તરફથી રમી રહ્યા હતા ત્યારે તેમને અચાનક ભારે દુખાવો થયો. તેમને તાત્કાલિક ગોકુલ હોસ્પિટલમાં લઈ જવામાં આવ્યા, જ્યાં ટેસ્ટિક્યુલર ટોર્સન હોવાનું જાણવા મળ્યું. ડોક્ટરોએ તાત્કાલિક સર્જરીની ભલામણ કરી. જોકે તિલકની સર્જરી સફળ રહી અને તે હવે ઠીક છે.

તિલક છેલ્લા એક વર્ષથી ભારતના ટી20 સેટઅપનો મુખ્ય ભાગ રહ્યો છે. તેમણે એશિયા કપ 2025 ફાઇનલમાં પાકિસ્તાન સામે અણનમ 69 રન બનાવીને ટીમને ટાઇટલ સુધી પહોંચાડી હતી.

આ પણ વાંચોઃ T20 વર્લ્ડ કપ પહેલા જ ટીમ ઇન્ડિયાને મોટો ઝટકો, આ સ્ટાર ખેલાડી થયો ઘાયલ

શ્રેયસ ઐયર સંપૂર્ણપણે ફિટ

ભારતના વન ડે વાઇસ-કેપ્ટન અને મિડલ ઓર્ડર બેટ્સમેન શ્રેયસ ઐયરને બેંગલુરુમાં સેન્ટર ઓફ એક્સેલન્સ ખાતે મેડિકલ ટીમ દ્વારા મેચ ફિટ જાહેર કરવામાં આવ્યો છે. જયપુરમાં વિજય હજારે ટ્રોફી લીગ મેચમાં હિમાચલ પ્રદેશ સામે મુંબઈ માટે શ્રેયસ ઐયરે 53 બોલમાં 82 રન બનાવ્યા હતા. ઓસ્ટ્રેલિયા પ્રવાસ દરમિયાન કેચ કરતી વખતે તેને બરોળમાં ઈજા થઈ હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ