પશ્ચિમ બંગાળ / છોકરીઓને રાત્રે બહાર ન મોકલવી જોઈએ..', દુર્ગાપુર ગેંગરેપ કેસમાં CM મમતાનું અજીબ નિવેદન

પશ્ચિમ બંગાળના દુર્ગાપુર ગેંગરેપ કેસમાં પોલીસે ત્રણ આરોપીઓની ધરપકડ કરી છે, પરંતુ બે હજુ પણ ફરાર છે. આ દરમિયાન, મુખ્યમંત્રી મમતા બેનર્જીએ જે નિવેદન આપ્યું છે તે ખુબ ચર્ચાસ્પદ બન્યું છે. મમતા બેનર્જીએ કહ્યું છે કે છોકરીઓને રાત્રે બહાર જવાની મંજૂરી ન આપવી જોઈએ. તેમણે ઉમેર્યું હતું કે આ મામલામાં તેમની સરકારને ઘસડવી એ અન્યાયી છે, કારણ કે મેડિકલ કોલેજ છોકરીની સુરક્ષા સુનિશ્ચિત કરવાની જવાબદારી ધરાવે છે.

બેનર્જીએ કહ્યું કે, ખાસ કરીને છોકરીઓને રાત્રે બહાર જવા દેવી જોઈએ નહીં. તેમણે પોતાનું રક્ષણ પણ કરવું જોઈએ. મમતા બેનર્જીએ આ ઘટનાને આઘાતજનક ગણાવી અને કહ્યું કે આ ઘટનામાં સામેલ લોકોને બક્ષવામાં આવશે નહીં. "આવા ગુનાઓ માટે અમારી પાસે શૂન્ય સહિષ્ણુતાની નીતિ છે. ત્રણ આરોપીઓની ધરપકડ કરવામાં આવી છે, અને પોલીસ અન્ય લોકોને શોધી રહી છે. કોઈને પણ બક્ષવામાં આવશે નહીં."

તેમણે કહ્યું, "આ એક ખાનગી કોલેજ છે. ત્રણ અઠવાડિયા પહેલા ઓડિશાના એક બીચ પર ત્રણ છોકરીઓ પર બળાત્કાર થયો હતો. ઓડિશા સરકાર શું કાર્યવાહી કરી રહી છે? આ છોકરી એક ખાનગી મેડિકલ કોલેજમાં અભ્યાસ કરતી હતી. તે રાત્રે 12:30 વાગ્યે કેવી રીતે બહાર નીકળી ગઈ? જ્યાં સુધી મને ખબર છે, આ ઘટના જંગલવાળા વિસ્તારમાં બની હતી. મને ખબર નથી કે ત્યાં શું થયું. કોલેજે છોકરીઓની સુરક્ષા માટે સતર્ક રહેવું જોઈએ અને તેઓએ રાત્રે બહાર ન નીકળવું જોઈએ. આ વિસ્તાર જંગલની નજીક છે. પોલીસ બધાની પૂછપરછ કરી રહી છે. કોઈને પણ છોડવામાં આવશે નહીં. ગુનેગારોને કડક સજા કરવામાં આવશે."

આ પણ વાંચોઃ રાહુલ ગાંધી માટે નોબેલ પુરસ્કારની માગ? કોંગ્રેસના નેતાએ મારિયા કોરિના સાથે કરી તુલના

પશ્ચિમ બંગાળના દુર્ગાપુરમાં એક ખાનગી મેડિકલ કોલેજમાં બીજા વર્ષની વિદ્યાર્થિની પર શુક્રવારે રાત્રે સામૂહિક બળાત્કાર થયો હતો. ઓડિશાના જલેશ્વરની રહેવાસી પીડિતા દુર્ગાપુરના શોભાપુર વિસ્તારમાં આવેલી એક ખાનગી મેડિકલ કોલેજમાં MBBS ડિગ્રીનો અભ્યાસ કરી રહી હતી. દુર્ગાપુર ગેંગરેપ કેસના ત્રણેય આરોપીઓને દસ દિવસની પોલીસ કસ્ટડીમાં મોકલી દેવામાં આવ્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ