- જંતર-મંતર ખાતે ભારતીય રેસલિંગ ફેડરેશન સામે કુસ્તીબાજોની હડતાળ
- ભારતીય કોમ્યુનિસ્ટ પાર્ટી (માર્કસવાદી)ના નેતા વૃંદા કરાત પહોંચ્યા જંતર-મંતર
- કુસ્તીબાજોએ વૃંદા કરાતને સ્ટેજ પર આવતા અટકાવ્યા
- રેસલર બજરંગ પુનિયાએ કહ્યું કે, તેને રાજકારણનું કેન્દ્ર ન બનાવો
દિલ્હી જંતર-મંતર ખાતે ભારતીય રેસલિંગ ફેડરેશન સામે કુસ્તીબાજોની હડતાળ ચાલુ છે. તેવામાં આજે એક અજીબોગરીબ ઘટના સામે આવી છે. વાત જાણે એમ છે, વિરોધ કરી રહેલા કુસ્તીબાજોએ રેસલિંગ ફેડરેશનના પ્રમુખ બ્રિજભૂષણ શરણ સિંહ અને કેટલાક કોચ પર મહિલા કુસ્તીબાજોની જાતીય સતામણીનો આરોપ લગાવ્યો છે. ફેડરેશનની કામગીરી પર પણ સવાલો ઉઠાવ્યા હતા. આ દરમ્યાન ભારતીય કોમ્યુનિસ્ટ પાર્ટી (માર્કસવાદી)ના નેતા વૃંદા કરાતને પણ કુસ્તીબાજોના સમર્થનમાં જંતર-મંતર પહોંચ્યા હતા. જોકે કુસ્તીબાજોએ વૃંદા કરાતને સ્ટેજ પર આવતા અટકાવ્યા. રેસલર બજરંગ પુનિયાએ તેમને કહ્યું કે, તેને રાજકારણનું કેન્દ્ર ન બનાવો.
વૃંદા કરાતનો આભાર માન્યો પણ સ્ટેજ પર ન આવવા દીધા
કુસ્તીબાજ બજરંગ પુનિયાએ જંતર-મંતર પહોંચીને કુસ્તીબાજોને સમર્થન આપવા બદલ વૃંદા કરાતનો આભાર માન્યો હતો. બજરંગ પુનિયાએ તેમને હાથ જોડીને વિનંતી કરી કહ્યું, તમને સ્ટેજની સામે બેસવાની વિનંતી છે, કોઈને માઈક નહીં મળે. મેડમ, તમને વિનંતી છે, મહેરબાની કરીને સ્ટેજ પરથી નીચે આવો. તેને રાજકીય મુદ્દો ન બનાવો. તમે નીચે જાઓ આ ખેલાડીઓની હડતાળ છે. આ કોઈ રાજકીય લડાઈ નથી.
કુસ્તીબાજો કેમ કરી રહ્યા છે વિરોધ?
કુસ્તીબાજોએ બુધવારે જંતર-મંતર ખાતે રેસલિંગ ફેડરેશન ઓફ ઈન્ડિયા સામે વિરોધ પ્રદર્શન કર્યું હતું. આ પછી રમતવીરો હડતાળ પર બેસી ગયા. જંતર-મંતર પર વિરોધ કરી રહેલા કુસ્તીબાજોએ પ્રેસ કોન્ફરન્સ યોજી હતી અને રેસલિંગ ફેડરેશનના પ્રમુખ બ્રિજભૂષણ શરણ સિંહ અને કેટલાક કોચ પર મહિલા કુસ્તીબાજોની જાતીય સતામણીનો આરોપ લગાવ્યો હતો. ફેડરેશનની કામગીરી પર પણ સવાલો ઉઠાવ્યા હતા. કુસ્તીબાજોનો આરોપ છે કે, રેસલિંગ ફેડરેશન નવા નિયમો બનાવીને ખેલાડીઓને હેરાન કરે છે.
રમતગમત મંત્રાલય પણ એક્શનમાં આવ્યું
કુસ્તીબાજોના આરોપોની નોંધ લેતા રમત મંત્રાલયે રેસલિંગ ફેડરેશનને 72 કલાકની અંદર આરોપોનો જવાબ આપવા માટે કહ્યું હતું. મંત્રાલયનું કહેવું છે કે, આ મામલો એથ્લેટ્સના કલ્યાણ સાથે જોડાયેલો છે, તેથી મંત્રાલયે તેને ગંભીરતાથી લીધો છે. એટલું જ નહીં મંત્રાલયે 18 જાન્યુઆરીથી લખનૌમાં યોજાનાર મહિલા રાષ્ટ્રીય કુસ્તી શિબિરને પણ રદ્દ કરી દીધો છે. જેમાં 41 કુસ્તીબાજો, 13 કોચ અને સપોર્ટ સ્ટાફ ભાગ લેવાનો હતો.
તપાસ માટે કમિટી બની શકે
મહત્વનું છે કે, ભારતીય રેસલિંગ ફેડરેશનના પ્રમુખ બ્રિજભૂષણ શરણ સિંહે રમતગમત મંત્રી અનુરાગ ઠાકુર સાથે ફોન પર વાત કરી હતી. કહેવામાં આવી રહ્યું છે કે, મંત્રાલય કુસ્તી મહાસંઘથી ખુશ નથી. મંત્રાલય રેસલિંગ એસોસિએશન પર પગલાં લેવાનું વિચારી રહ્યું છે. મંત્રાલય મામલાની તપાસ માટે એક કમિટી બનાવી શકે છે.
