કુદરતી આફત / VIDEO : વાવાઝોડામાં ઝાડ ઉખડે એમ બિલ્ડિંગો ઉખડી, જુઓ કોલંબિયાના વિનાશકારી ભૂકંપનો વીડિયો, 111 લોકોના મોત

કોલંબિયામાં 7.4 ની તીવ્રતાના શક્તિશાળી ભૂકંપમાં 111થી વધુ લોકોના મોત થયા છે. પશ્ચિમ કોલંબિયાના કાલી, ક્વિબ્ડો, પેરેરા અને આસપાસના વિસ્તારોમાં કાટમાળ નીચે ફસાયેલા લોકોને શોધવા માટે બચાવ ટીમો શોધ કરી રહી હતી. મૃતાંક વધવાની સંભાવના છે કારણ કે સેંકડો લોકો હજુ પણ ધરાશાયી થયેલી બિલ્ડિંગના કાટમાળમાં દટાયેલા પડ્યાં છે. ભૂકંપની તીવ્રતા એટલી હતી કે બિલ્ડિંગો વાવાઝોડાના ઝાડની જેમ ઉખડીને ધરાશાયી થઈ હતી.

1,600 ઇમારતોને નુકસાન

ભૂકંપથી લગભગ 1,600 ઇમારતોને નુકસાન થયું હતું અથવા તેઓ ધરાશાયી થયા હતા. સોમવારે બપોર સુધીમાં ઓછામાં ઓછા 111 લોકો મૃત્યુ પામ્યા હતા. ઘણા પરિવારો તેમના ઘરોના કાટમાળમાં પ્રિયજનોને શોધી રહ્યા છે. નાગરિકોએ ગુમ થયેલા લોકો વિશે માહિતી શેર કરવા માટે ઓનલાઈન પ્લેટફોર્મ પણ બનાવ્યા છે.

બાળકોને બચાવવા પડકાર

રાહત એજન્સીઓ ખાસ કરીને બાળકોને મદદ કરવા પર ધ્યાન કેન્દ્રિત કરી રહી છે. વર્લ્ડ વિઝન કોલંબિયાના કોમ્યુનિકેશન કોઓર્ડિનેટર બાર્બરા મેલોએ જણાવ્યું હતું કે અસરગ્રસ્ત વિસ્તારોમાં બાળકો માટે સલામત જગ્યાઓ બનાવવામાં આવી રહી છે.

ભૂકંપનું કેન્દ્રબિંદુ 400 કિલોમીટર દૂર

ભૂકંપનું કેન્દ્ર રાજધાની બોગોટાથી લગભગ 400 કિલોમીટર પશ્ચિમમાં પાલમાર વિસ્તારમાં હતું. તેના આંચકા પડોશી દેશો ઇક્વાડોર અને વેનેઝુએલા સુધી અનુભવાયા હતા. ઘણા વિસ્તારો ગાઢ જંગલોમાંથી પસાર થઈને ફક્ત હોડી અથવા વિમાન દ્વારા જ પહોંચી શકાય છે, જેના કારણે રાહત અને બચાવ ટીમો માટે અસરગ્રસ્ત લોકો સુધી પહોંચવું મુશ્કેલ બને છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ