નિવેદન / મોદી સરકાર આ મુદ્દાથી લોકોનું ધ્યાન હટાવવા માટે ઍપ્સ બૅન કરી રહ્યું છે : ચીન

• ભારતે ચીનની 118 એપ્સ પર પ્રતિબંધ મુક્યો 
• અર્થવ્યવસ્થા તરફ ધ્યાન હટાવવા માટે મોદી સરકારે આ નિર્ણય લીધો

ચીનની સરકાર ગ્લોબલ ટાઇમ્સના મુખપત્રએ નિષ્ણાંતને ટાંકીને કહ્યું છે કે ઍપ્સ પર પ્રતિબંધનો નિર્ણય કોરોના મહામારી અને ઘટતી અર્થવ્યવસ્થા તરફ ધ્યાન હટાવવા માટે મોદી સરકારે આ નિર્ણય લીધો છે.

ભારત પોતાની સમસ્યાઓને છૂપાવવા ઍપ્સ બૅન કરી રહી છે : ડ્રેગન

મોદી સરકારના નિર્ણયથી ચીનનું ગુસ્સે ભરાવું સ્વાભાવિક છે, કારણ કે તે જાણે છે કે ભારતે તેના અર્થતંત્રને નુકસાન પહોંચાડવા માટે એક મોટું પગલું ભર્યું છે. ગ્લોબલ ટાઇમ્સે કહ્યું હતું કે ભારતની 118 ચાઇનીઝ એપ્સ પર પ્રતિબંધ લગાવવાનું પગલું મોદી સરકારની સાહસિકતા અને તકવાદ બતાવવાનું છે. ભારત સરકારે આ નિર્ણય કોરોના મહામારી અને ઘટતી અર્થવ્યવસ્થા તરફ ધ્યાન હટાવવા માટે લીધો છે.

ચીનનો બફાટ સતત સામે આવી રહ્યો છે

ચીનનો બફાટ સતત સામે આવી રહ્યો છે. આ અગાઉ પણ ગ્લોબલ ટાઇમ્સે લખ્યું હતું કે ભારત તેની ઘરેલુ સમસ્યાઓથી પરેશાન છે, ખાસ કરીને કોરોના વાયરસની સ્થિતિથી, જે સંપૂર્ણપણે નિયંત્રણ બહાર છે. અર્થવ્યવસ્થાની સ્થિતિ પણ ખરાબ છે. ભારત સરહદ વધારવાની પ્રવૃત્તિઓ હાથ ધરીને તેની સ્થાનિક સમસ્યાઓથી ધ્યાન હટાવવા માંગે છે.

ઉલ્લેખનીય છે કે ચીન તરફથી સતત ઘૂસણખોરીના પ્રયાસો બાદ મોદી સરકારે બુધવારે PUBG સહિત 118 મોબાઇલ એપ્સ પર પ્રતિબંધ મૂકવાનો નિર્ણય કર્યો છે. માહિતી ટેકનોલોજી મંત્રાલયે સેક્શન 69A હેઠળ આ મોબાઇલ એપ્સ પર પ્રતિબંધ મૂકવાનો નિર્ણય લીધો છે. બુધવારે સાંજે સરકારે જાહેર કરેલા એક નિવેદનમાં કહેવામાં આવ્યું છે કે આ એપ્સ રાષ્ટ્રીય સુરક્ષા માટે ખતરો છે.

અત્યાર સુધી 224 ચાઈનીઝ ઍપ્સ પર પ્રતિબંધ

મહત્વનું છે કે 15 જૂને ગાલવાન ખીણમાં હિંસક અથડામણ થયા બાદ પણ ભારતે ચીનની 59 એપ્સ પર પ્રતિબંધ મૂકવાનો નિર્ણય લીધો હતો. ભારત સરકારે ટિકિટોક સહિત ચીનની ઘણી એપ્સ પર પ્રતિબંધ મૂક્યો હતો. બાદમાં, જુલાઈના અંતમાં, વધુ 47 ચાઇનીઝ એપ્લિકેશનો પર પ્રતિબંધ મૂકવામાં આવ્યો હતો. આમ ભારતે અત્યાર સુધી કુલ 224 ચાઈનીઝ ઍપ્સ પર પ્રતિબંધ મૂક્યો છે.