અમદાવાદ / કોલ કરવાના બહાને iPhone લીધો, પછી મહિલાની સોનાની બુટ્ટી ઉતરાવી લૂંટ ચલાવી

કલાપીનગર ખાતે આવેલી ખાડાવાળીની ચાલીમાં રહેતા કરણ કુશવાહે ચાંદખેડા પોલીસ સ્ટેશનમાં બે અજાણ્યા શખ્સો વિરુદ્ધ લૂંટની ફરિયાદ નોંધાવી છે. ફૂલ વેચીને ગુજરાન ચલાવતા યુવાનને કોલ કરવાના બહાને વિશ્વાસમાં લઈને મોબાઇલ અને સોનાની બુટ્ટી લૂંટી લેવાતાં પોલીસે તપાસ શરૂ કરી છે. ફરિયાદ મુજબ કરણ કુશવાહ ચાંદખેડા વિસ્તારમાં પેડલ સાઈકલ પર ફૂલ વેચવાનું કામ કરે છે.

થોડા દિવસ પહેલાં બપોરના આશરે ત્રણ વાગ્યાના સમયે તે પોતાના કામ પર હાજર હતો ત્યારે બે અજાણ્યા શખ્સો તેની પાસે આવ્યા હતા. બંનેએ પોતાને તાત્કાલિક ફોન કરવાની જરૂર હોવાનું કહી કરણ પાસે મોબાઇલ માગ્યો હતો. વિશ્વાસ રાખી કરણે પોતાનો આઇફોન તેમને આપી દીધો હતો. આરોપ છે કે મોબાઇલ હાથમાં મળતાં જ બંને શખ્સોએ કરણને ધમકી આપવાનું શરૂ કર્યું હતું. તેમણે કહ્યું હતું કે તારી પાસે જે પણ પૈસા હોય તે આપી દે, નહીં તો તારો ફોન પાછો નહીં આપીએ. કરણ ગભરાઈ જતાં બંનેએ તેની પાસે રહેલી સોનાની બુટ્ટી પણ ઊતરાવી લીધી હતી.

આ પણ વાંચોઃ પતિની પ્રેમિકાએ મહિલાને આપી ધમકી: ‘તને તારાં બાળકો નહીં મળે’, મામલો પહોંચ્યો પોલીસ સુધી

લૂંટ કર્યા બાદ બંને શખ્સો ત્યાં આવેલી એક રિક્ષામાં બેસીને મોબાઇલ અને સોનાની બુટ્ટી સાથે ફરાર થઈ ગયા હતા. ઘટના બાદ કરણે સમગ્ર બનાવ અંગે ચાંદખેડા પોલીસ સ્ટેશનમાં ફરિયાદ નોંધાવી છે.પોલીસે આસપાસના વિસ્તારમાં લાગેલા સીસીટીવી કેમેરાના ફૂટેજ મેળવવાની કાર્યવાહી હાથ ધરી છે. રિક્ષા અને બંને આરોપીઓની ઓળખ મેળવવા માટે તપાસ શરૂ કરવામાં આવી છે. પોલીસને આશા છે કે તકનીકી પુરાવા અને સીસીટીવીના આધારે આરોપીઓને ઝડપવામાં સફળતા મળશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ