બિઝનેસ / 60,000 કર્મચારીઓને માઇક્રોસોફ્ટની સ્વૈચ્છિક રીતે જૉબ છોડવાની ઓફર, કંપનીએ કેમ લીધો આ નિર્ણય?

આર્ટિફિશિયલ ઇન્ટેલિજન્સ (AI) ની દુનિયામાં ઝડપથી રોકાણ કરી રહેલી ટેક જાયન્ટ માઇક્રોસોફ્ટે તેના કર્મચારીઓ માટે એક મહત્વપૂર્ણ નિર્ણય લીધો છે. કંપનીએ ભારત સહિત ચાર દેશોના કર્મચારીઓને સ્વૈચ્છિક રીતે નોકરી છોડવાના બદલામાં આર્થિક સહાયની ઓફર કરી છે. વિશ્વભરમાં આશરે 60,000 કર્મચારીઓ આ કાર્યક્રમ માટે પાત્ર છે. આ પગલું એવા સમયે લેવામાં આવ્યું છે જ્યારે કંપની એઆઇ અને ક્લાઉડ ઇન્ફ્રાસ્ટ્રક્ચર પર અબજો ડોલર ખર્ચ કરી રહી છે. જોકે આનો અર્થ એ નથી કે બધા પાત્ર કર્મચારીઓ તેમની નોકરી ગુમાવશે.

માઇક્રોસોફ્ટે સોમવારે સ્વૈચ્છિક રીતે નોકરી છોડવાની ઓફરની જાહેરાત કરી હતી. આ યોજના ભારત, અમેરિકા, બ્રિટેન અને કેનેડામાં પસંદગીની ટીમોના કર્મચારીઓ માટે ઉપલબ્ધ રહેશે. માઇક્રોસોફ્ટના ભારતમાં આશરે 23,000 કર્મચારીઓ છે. જો કે આમાંથી કેટલા કર્મચારીઓને આ ઓફર દ્વારા આવરી લેવામાં આવશે તે હજુ સુધી સ્પષ્ટ નથી. ઉપલબ્ધ માહિતી અનુસાર ભારતમાં લાયક કર્મચારીઓને 1 ડિસેમ્બર સુધી આ ઓફર સ્વીકારવી કે નહીં તે નક્કી કરવાનો સમય મળશે.

નોકરી છોડવા પર શું આપવામાં આવશે?

આ ઓફર હેઠળ કર્મચારીઓને તેમની નોકરી છોડ્યા પછી નાણાકીય સહાય અને કારકિર્દી સંબંધિત સેવાઓ પૂરી પાડવામાં આવશે. પેકેજમાં દરેક પૂર્ણ થયેલા સેવા વર્ષ માટે એક મહિનાનો મૂળ પગાર, આરોગ્ય વીમો અને કારકિર્દી ટ્રાંજિશન સાથે જોડાયેલ સહાયનો સમાવેશ થાય છે. જો કે આ ઓફર બધા કર્મચારીઓ માટે ઉપલબ્ધ નથી. માઈક્રોસોફ્ટના ચીફ એચઆર ઓફિસર એમી કોલમેન અનુસાર આ લાભ પસંદગીના વિભાગોમાં 70 અને તેનાથી નીચેના લાયક કર્મચારીઓને ઉપલબ્ધ થશે. લાયક કર્મચારીઓને ઈમેલ દ્વારા ઓફરની શરતો વિશે જાણ કરવામાં આવશે.

કંપનીએ આ પગલું કેમ ભર્યું?

એમી કોલમેને જણાવ્યું હતું કે આ કાર્યક્રમનો હેતુ કંપનીની બહાર કારકિર્દીનો વિચાર કરતા કર્મચારીઓને સહયોગ આપવાનો છે. આ કંપનીમાં વિવિધ વિભાગોને બદલાતી જરૂરિયાતોને પહોંચી વળવા માટે તેમના સ્ટાફિંગ અને વર્કલોડને સમાયોજિત કરવાનો વિકલ્પ પણ આપશે. કંપનીએ સ્પષ્ટતા કરી કે આ યોજના બધા વિભાગોમાં સમાન રીતે લાગુ કરવામાં આવશે નહીં. આ નિર્ણય વ્યવસાયિક જરૂરિયાતો, ગ્રાહક પ્રતિબદ્ધતાઓ અને કર્મચારીઓની ઉપલબ્ધતાના આધારે લેવામાં આવશે.

આ પણ વાંચોઃ બિઝનેસ / 1 નવેમ્બરથી બદલાઈ શકે છે GSTના નિયમો, નાના વેપારીઓને મળી શકે છે રાહત

ભારતમાં AI પર 20.5 અરબ ડોલરનું રોકાણ

એક તરફ માઇક્રોસોફ્ટ સ્વૈચ્છિક રીતે નોકરી છોડવાની ઓફર કરી રહ્યું છે, ત્યારે તે ભારતમાં મોટા રોકાણની પણ યોજના બનાવી રહ્યું છે. કંપનીએ 2025 થી 2029 દરમિયાન ભારતમાં ક્લાઉડ અને AI ઇન્ફ્રાસ્ટ્રક્ચર, કૌશલ્ય તાલીમ અને કામગીરીમાં 20.5 અરબ ડોલરનું રોકાણ કરવા માટે પ્રતિબદ્ધતા વ્યક્ત કરી છે. કંપની 2030 સુધીમાં ભારતમાં 2 કરોડ લોકોને AI સંબંધિત કૌશલ્યો સાથે તાલીમ આપવાનું પણ લક્ષ્ય રાખે છે. માઇક્રોસોફ્ટે જણાવ્યું છે કે તે કર્મચારીઓને નવી કુશળતા શીખવામાં અને કંપનીમાં અન્ય કારકિર્દીની તકો શોધવામાં મદદ કરવાનું ચાલુ રાખશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ