સોળ આની? / ગુજરાતમાં કપાસ સહિત આ પાકોનું બમ્પર વાવેતર, જ્યારે મગફળીનાં વાવેતરમાં ઘટાડો, જુઓ કયા ખરીફ પાકનું કેટલું વાવેતર

• ચાલું વર્ષે રાજ્યમાં કપાસનું વાવેતર વધ્યું
• ચાલું વર્ષે મગળીનું વાવેતર ઘટ્યું
• ખરીફ પાકનું વાવેતર 91% થયું

હાલ ચોમાસાની સીઝન ચાલી રહી છે. રાજ્યમાં સચરાચર મેઘમહેર બાદ થોડા દિવસથી રાજ્યમાં વરસાદે વીરામ લીધો છે. ત્યારે હાલ સિઝનમાં સારા વરસાદ બાદ ધરતી પુત્રો પણ ઉત્સાહમાં આવી ગયા છે અને આશાભેર કપાસ, મગફળી સહિતના પાકનું વાવેતર કર્યું છે. આવકારદાયક વરસાદને લઈને રાજ્યમાં ખરીફ પાકના વાવેતરમાં વધારો થયો છે. મગફળી, કપાસની રાજ્યના મુખ્ય ખરીફ પાકમાં ગણના થાય છે. ત્યારે હાલ મગફળીની સરખામણીએ કપાસના વાવેતરમાં વધારો નોંધાયો છે.

કપાસનું 26.76 લાખ હેક્ટરમાં વાવેતર

ગુજરાત રાજ્યમાં ખરીફ પાકનું વાવેતર 91 ટકા થયું હોવાનું તંત્રના ચોપડે નોંધાયું છે. જ્યારે રાજ્યમાં કપાસના વાવેતરમાં વધારો થયો છે. તથા મગફળીનાં વાવેતરમાં ઘટાડો નોંધાયો હોવાનું પણ સત્તાવાર રીતે જાહેર થવા પામ્યું છે. હેકટર વાઇઝ વાત કરવામાં આવે તો રાજ્યમાં ગત વર્ષે 25.81 લાખ હેક્ટરમાં કપાસનું વાવેતર વાવેતર થયું હતું.  જેની સરખામણીએ ચાલુ વર્ષે કપાસનું 26.76 લાખ હેક્ટરમાં વાવેતર થયું છે. જે 113 ટકા થયું છે.

મગફળીનું 85 ટકા વાવેતર નોંધાયું

બીજી તરફ મગફળીનું વાવેતર ગત વર્ષે 16.93 લાખ હેક્ટરમાં વાવેતર નોંધાયું હતું. જેની સામે આ વખતે થોડા ખેડૂતોએ  મગફળી તરફથી મ્હો ફેરવ્યું હોય તેવું લાગી રહ્યું છે અને ચાલુ વર્ષે 16.25 લાખ હેક્ટર સાથે મગફળીનું 85 ટકા વાવેતર નોંધાયું છે. બીજી બાજુ ચોમાસાને લઈને રાજ્યમાં 8.19 લાખ હેક્ટર સાથે 97 ટકા ડાંગરનું વાવેતર થયું છે. વધુમાં બાજરીનું વાવેતર 1.86 લાખ હેક્ટર વિસ્તારમાં થયું છે અને 2.81 લાખ હેક્ટર વિસ્તાર સાથે મકાઈનું 97 ટકા વાવેતર થયું છે. તે જ રીતે શાકભાજીનું 2.13 લાખ હેક્ટર વિસ્તારમાં 82 ટકા વાવેતર થયું હોવાનું તંત્રના ચોપડે સત્તાવાર  રીતે જાહેર થવા પામ્યું છે.