ઇલેક્શન 2022 / સૌરાષ્ટ્રમાં કોંગ્રેસને પરાસ્ત કરવા ભાજપની રણનીતિ તૈયાર, નહીં કરે 2017 જેવી ભૂલ, જાણો શું હતી સ્થિતિ

• સૌરાષ્ટ્રમાં કોંગ્રેસને પરાસ્ત કરવા ભાજપે ઘડી રણનીતિ
• નબળા પરિણામો ધરાવનારી બેઠકો પર વધુ ધ્યાન આપશે
• સૌરાષ્ટ્રની 48 બેઠકો આગામી વિધાનસભા ચૂંટણી માટે નિર્ણાયક રહેશે

લાભપાંચમ બાદ રાજ્ય (Gujarat) માં ગમે ત્યારે ગુજરાત વિધાનસભા ચૂંટણી (Gujarat Elections 2022) ની તારીખો જાહેર થઇ શકે છે. ચૂંટણી નજીક આવતા જ તમામ રાજકીય પાર્ટીઓ તડામાર તૈયારીઓમાં જોતરાઇ ગઇ છે. ત્યારે ભાજપ હવે 2017માં જ્યાં નબળા પરિણામો હતા તે બેઠકો પર સૌથી વધુ ધ્યાન આપશે.

2017માં સૌરાષ્ટ્રની 48 બેઠકો પરથી ભાજપને 18 અને કોંગ્રેસને 30 બેઠકો મળી હતી

સૌરાષ્ટ્રમાં કોંગ્રેસને પરાસ્ત કરવા ભાજપે આ વર્ષે ખાસ રણનીતિ બનાવી છે. સૌરાષ્ટ્રની 48 બેઠકો આગામી વિધાનસભા ચૂંટણી માટે નિર્ણાયક રહેશે. કારણ કે આ વર્ષે ભાજપ ચૂંટણી જીતવા કોઇ કસર છોડવા નથી માંગતા. 2017માં સૌરાષ્ટ્રની 48 બેઠકો પરથી ભાજપને 18 અને કોંગ્રેસને 30 બેઠકો મળી હતી. ભાજપને શહેરી તેમજ કોંગ્રેસને ગ્રામ્ય વિસ્તારમાં સૌથી વધુ બેઠકો મળી હતી.

2017માં ભાજપને અમરેલી, મોરબી, સોમનાથ જિલ્લાની એક પણ બેઠક ન હોતી મળી

2017માં ભાજપને અમરેલી, મોરબી અને સોમનાથ જિલ્લાની એક પણ બેઠક ન હોતી મળી. જેમાં વાત કરીએ જૂનાગઢ જીલ્લાની 5 બેઠકોમાંથી કોંગ્રેસને 4 તેમજ ભાજપને ફક્ત એક જ બેઠક મળી હતી. પોરબંદર અને બોટાદ જિલ્લામાં ભાજપ-કોંગ્રેસને એક-એક બેઠક મળી હતી. જ્યારે રાજકોટની 8 પૈકીની 6 બેઠક પર ભાજપ અને બે બેઠકો કોંગ્રેસને ફાળે આવી હતી. ભાવનગરની 7 બેઠકોમાંથી 6 બેઠકો ભાજપ અને એક બેઠક કોંગ્રેસને ફાળે આવી હતી.

સૌરાષ્ટ્રની મોટા ભાગની બેઠકો પર પાટીદાર અને કોળી મતદારોનો દબદબો

સૌરાષ્ટ્રની 48 બેઠકોમાંથી મોટા ભાગની બેઠકો પર પાટીદાર અને કોળી મતદારોનો દબદબો રહ્યો છે. રાજકોટ, જામનગર, જૂનાગઢ, અમરેલી અને મોરબી જિલ્લાની બેઠકો પર લેઉવા પાટીદાર મતદારોનું વર્ચસ્વ રહેલું છે. ગીર સોમનાથ જિલ્લાની ચાર વિધાનસભા બેઠકો પર કોળી મતદારો પ્રભાવી પરિબળ રહ્યાં છે. પોરબંદર અને કુતિયાણા વિધાનસભા બેઠક પર મેર જ્ઞાતિના લોકોનું વર્ચસ્વ રહેલું છે.