સૂત્રોચ્ચાર / ગુજરાતભરમાં પાક.ના વિદેશમંત્રીનો ઉગ્ર વિરોધ: PM મોદી વિરૂદ્ધ આપ્યું હતું આપત્તિજનક નિવેદન, જુઓ ભાજપના આગેવાનોએ શું કહ્યું

• ગુજરાતમાં ભાજપનું વિરોધ પ્રદર્શન
• પાક.ના વિદેશમંત્રીનો ઉગ્ર વિરોધ
• PM મોદી વિરૂદ્ધ આપ્યું હતું આપત્તિજનક નિવેદન

વડાપ્રધાન નરેન્દ્ર મોદી વિરુદ્ધ પાકિસ્તાનના વિદેશ મંત્રી બિલાવલ ભુટ્ટોની 'અપમાનજનક' ટિપ્પણીને લઇને આજે દેશભરમાં ભાજપના લોકો ઉગ્ર વિરોધ કરી રહ્યાં છે. ત્યારે તેના પડઘા ગુજરાતમાં પણ પડ્યા છે. ગુજરાતમાં ઠેર-ઠેર ભાજપના કાર્યકરો સૂત્રોચ્ચાર દ્વારા પાકિસ્તાનના વિદેશમંત્રીનો વિરોધ કરી રહ્યાં છે.

તમને જણાવી દઇએ કે, પાકિસ્તાનના વિદેશમંત્રી બિલાવલ ભુટ્ટો ઝરદારીએ PM મોદી વિરૂદ્ધ અત્યંત નિંદનીય ભાષાનો ઉપયોગ કર્યો હતો. ભુટ્ટોએ વડાપ્રધાનને ‘ગુજરાતના કસાઈ’ કહ્યાં હતા. આથી, દેશભરમાં આજે ભાજપના લોકો પાકિસ્તાનના વિદેશમંત્રીનો ઉગ્ર વિરોધ કરી રહ્યાં છે.

ગુજરાતભરમાં કઇ-કઇ જગ્યાએ થઇ રહ્યો છે વિરોધ?

પોરબંદરમાં ભાજપે સૂત્રોચ્ચાર કરી પાકિસ્તાનના વિદેશમંત્રીનો વિરોધ કર્યો. શહેરના રાણીબાગ નજીક જિલ્લા ભાજપ દ્વારા પાકિસ્તાન વિરૂદ્ધ સૂત્રોચ્ચાર કરવામાં આવ્યા. બિલાવલ ભુટ્ટો દ્વારા PM મોદી પર અભદ્ર ટિપ્પણીને લઇને ભાજપ દ્વારા ઠેર-ઠેર વિરોધ કરવામાં આવી રહ્યો છે.

અમદાવાદના RTO સર્કલ ખાતે પણ ભાજપના ધારાસભ્યો અને કાર્યકર્તાઓ દ્વારા વિરોધ
બિલાવલ ભુટ્ટોની PM મોદી પર અભદ્ર ટિપ્પણી પર અમદાવાદના RTO સર્કલ ખાતે પણ ભાજપના ધારાસભ્યો અને કાર્યકર્તાઓ દ્વારા વિરોધ કરવામાં આવ્યો. ધારાસભ્ય જીતેન્દ્ર પટેલ અને અમિત શાહ સહિતના નેતાઓ વિરોધ પ્રદર્શનમાં જોડાયા. ભાજપ નેતાઓએ પાકિસ્તાન મુર્દાબાદના સૂત્રોચ્ચાર પણ કર્યા.

રાજકોટમાં બિલાવલ ભૂટ્ટોનું પૂતળા દહન કરાયું
બીજી બાજુ રાજકોટ શહેર ભાજપ દ્વારા પણ પાક. વિદેશ મંત્રી બિલાવલ ભુટ્ટોના વિરોધમાં બિલાવલ ભૂટ્ટોનું પૂતળા દહન પણ કરાયું. ભાજપના કાર્યકરોએ સૂત્રોચ્ચાર કરી કલેક્ટરને આવેદન પત્ર પણ પાઠવ્યું.

ભારતે પણ આપ્યો જડબાતોડ જવાબ 
ભારતે આ મુદ્દે કહ્યું કે અમે 26 11 મામલે પાકિસ્તાનની પોલ ખોલી તેના કારણે ત્યાંનાં નેતાઓ હવે ગભરાઈ ગયા છે, અનેક લોકોના જીવ બચાવનાર નર્સના તીખા હુમલા બાદ પાકિસ્તાન પરેશાન છે અને આતંકી હાફિસ સઇદ અને લખવી અત્યારે પણ પાકિસ્તાનમાં આઝાદીથી ફરી રહ્યા છેઃ, પાકિસ્તાન મુંબઈ હુમલા મામલે કોઈ કાર્યવાહી કરી શક્યું નહીં.