ક્રાઈમ / રિક્ષામાં બેસતા પહેલા ચેતજો! નહીં તો પાકીટ થઈ જશે ગાયબ, ભરૂચમાં 3ની ધરપકડ

ભરૂચ શહેરમાં રિક્ષામાં મુસાફરોને બેસાડી પર્સ અને પૈસા ખંખેરતી ટોળકી ઝડપાઈ છે. ભરૂચ પોલીસે 89 હજારના મુદ્દામાલ સાથે ત્રણ ઈસમોને ઝડપી પાડ્યા છે. આરોપીઓ મુસાફરોના પાકીટ અને રોકડા રૂપિયા કાઢી લેતા હતા. 

આ ટોળકી રોજ શહેરમાં આવી તેમની રીક્ષામાં બેસતા મુસાફરોને નિશાન બનાવતા હોવાની ફરિયાદ ઉઠી હતી. જેમાં ડિવિઝન પોલીસ વિસ્તારના રેલ્વે સ્ટેશન સર્કલથી ફ્રૂટ માર્કેટની સામે રોટરી કલબ સુધીમાં જૂના તવરા ગામના યુવાનને રિક્ષામાં બેસાડી રિક્ષા ચાલક સહિત તેના બે સાગરીતોએ ગત તારીખ 3 એપ્રિલના રોજ ખિસ્સામાંથી 15 હજાર રોકડા કાઢી લઈ ફરાર થયા હતા. જ્યારે ભરૂચના શક્તિનાથ સર્કલ પાસેથી એસટી ડેપો સુધીમાં દંપતીને બેસાડી તેઓના રોકડા 2 હજાર અને દસ્તાવેજોની ચોરી કરી હોવાની ઘટના સામે આવી હતી.

વાંચવા જેવું: ભાજપ નેતાએ કરી રૂપાલાની ઉમેદવારી પરત ખેંચી લેવાની માંગ, દિલ્હી સુધી વાત પહોંચી

પોલીસે કુલ 89 હજારનો મુદ્દામાલ કબજે કર્યો હતો
આ બંને ગુનાઓ અંગે ભરુચ શહેર એ ડિવિઝન પોલીસ મથકે ફરિયાદ નોંધાઈ હતી. ગુનાની ગંભીરતા જોઈ એ ડીવીઝન પોલીસ મથકના પીઆઈએ સ્ટાફના માણસોને આ ટોળકીને ઝડપી પાડવા સૂચના આપી હતી. એ ડીવીઝન સર્વેલન્સનો સ્ટાફ પેટ્રોલિંગમાં હતો. તે દરમિયાન બાતમી મળી હતી કે, રિક્ષામાં મુસાફરોને બેસાડી લૂંટની ઘટનાને અંજામ આપતા ઇસમો સ્ટેશન રોડ પર સુપર માર્કેટ સામે રોડ ઉપર રીક્ષા નંબર GJ 16 W 0192 લઈ ઉભેલા છે. પોલીસે વોચ ગોઠવી કોસંબાની સોસાયટીમાં રહેતો કાદર અબ્દુલ શેખ, અમીન હનીફ નાનાબાવા તેમજ ઇમરાન યાકુબ પટેલને પકડી પાડ્યા હતાં. પોલીસે તેમની પાસેથી ઓટો રીક્ષા, 3 મોબાઈલ ફોન તેમજ રોકડા 18 હજાર સહિત કુલ 89 હજારના મુદ્દામાલ સાથે ઝડપી પાડ્યા હતા.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો