અમદાવાદ / પાણી ઓસર્યાં છતાં બ્રિજ અને મુખ્ય માર્ગો પર બંધ પડેલાં વાહનો ન હટતાં સવારથી કિલોમીટર લાંબો ટ્રાફિકજામ, વાહનચાલકો પરેશાન

ગઈ રાતે પડેલા અતિભારે વરસાદ બાદ શહેરના અનેક વિસ્તારોમાં જનજીવન પર વ્યાપક અસર જોવા મળી છે. વરસાદી પાણીના કારણે અનેક ટુ-વ્હીલર અને ફોર-વ્હીલર રસ્તા વચ્ચે જ બંધ પડી ગયાં હતાં. જોકે સવાર સુધીમાં મોટાભાગના વિસ્તારોમાંથી પાણી ઓસરી ગયું, પરંતુ રસ્તા અને બ્રિજ પર છોડી દેવાયેલાં વાહનોને કારણે ટ્રાફિક વ્યવસ્થા ખોરવાઈ ગઈ છે.

માણેકબાગ વિસ્તાર, ૧૩૨ ફૂટ રિંગ રોડ પર આવેલા એઈસી બ્રિજ સહિત અનેક મુખ્ય માર્ગો પર બંધ પડેલાં વાહનો યથાવત્ રહેતાં સવારના વ્યસ્ત સમયે ભારે ટ્રાફિકજામ સર્જાયો હતો. નોકરી-ધંધા, શાળાઓ અને અન્ય કામકાજ માટે નીકળેલા લોકોને લાંબા સમય સુધી વાહનોની કતારોમાં અટવાઈ રહેવું પડ્યું. કેટલાંક સ્થળોએ વાહનોની કિલોમીટર લાંબી લાઈનો જોવા મળી હતી, જેના કારણે દૈનિક અવરજવરમાં મોટો વિક્ષેપ સર્જાયો હતો.

સ્થાનિક નાગરિકો અને વાહનચાલકોએ તંત્રને તાત્કાલિક કાર્યવાહી કરવાની માગ કરી છે. તેમના મતે રસ્તા વચ્ચે પડેલાં વાહનોને ક્રેનની મદદથી વહેલી તકે ખસેડવામાં આવે તો ટ્રાફિકની સમસ્યામાં રાહત મળી શકે. જો આગામી કલાકોમાં ફરી ભારે વરસાદ પડશે અને આ વાહનો સમયસર દૂર નહીં કરવામાં આવે તો શહેરમાં ટ્રાફિકની સ્થિતિ વધુ ગંભીર બની શકે છે. સાથે જ એમ્બ્યુલન્સ, ફાયર બ્રિગેડ અને અન્ય ઇમર્જન્સી સેવાઓની અવરજવર પણ પ્રભાવિત થવાની શક્યતા વ્યક્ત કરવામાં આવી રહી છે.