અમદાવાદ / શહેરમાં મુખ્ય રસ્તાઓ રોશનીથી ઝળહળે છે, પરંતુ અનેક આંતરિક-જોડાણ માર્ગો સ્ટ્રીટલાઇટના અભાવે અંધકારમાં

અમદાવાદના અનેક વિસ્તારોમાં રસ્તાઓ પર પૂરતી સ્ટ્રીટલાઈટ ન હોવાના કારણે ખાસ કરીને મહિલાઓમાં અસલામતીની લાગણી વધી રહી છે. મુખ્ય માર્ગો અને રહેણાક વિસ્તારોમાં પૂરતી લાઈટિંગ હોવા છતાં તેમને જોડતા અનેક રસ્તાઓ અને આંતરિક માર્ગો અંધારામાં રહે છે, પરિણામે રાતના સમયે વિઝિબિલિટી, સલામતી અને લોકો ક્યાં અને કેવી રીતે અવરજવર કરે છે તેના પર અસર પડી રહી છે.

જાહેર પરિવહનના પોઈન્ટ સુધી ચાલીને જવું અથવા ત્યાંથી ઘરે પરત ફરવું પડે ત્યારે આ ચિંતા વધુ ગંભીર બને છે. નવરાત્રી દરમિયાન આ મુદ્દો વધુ મહત્ત્વનો બની જાય છે, કારણ કે રાતે લોકોની અવરજવર સૌથી વધુ હોય છે અને તેઓ જે રસ્તાનો ઉપયોગ કરે છે ત્યાં પૂરતી લાઈટિંગ છે કે નહીં તે અંગે ચિંતા રહે છે. વાસણામાં રહેતી મહિલાઓ જણાવે કે મુખ્ય માર્ગ સારી રીતે પ્રકાશિત અને વ્યસ્ત રહે છે, પરંતુ મેટ્રો સ્ટેશન તરફ જતા રસ્તા પર સ્ટ્રીટલાઈટ નથી. એ રસ્તા પરથી ચાલીને જતાં કોઈને સલામતીનો અનુભવ થતો નથી. શહેરભરમાં અનેક નાગરિકોએ અંધારા અથવા ઓછા પ્રકાશવાળા રસ્તાઓ અંગે સત્તાવાળાઓ સમક્ષ ફરિયાદો કરી છે.

અનેક વિસ્તારોમાં આવી ફરિયાદો સામે આવી

ધરણીધરથી પીપળજ-પીરાણા બ્રિજ તરફ જતા રસ્તા, ખોડિયારનગર, એનઆઈડી અને પીઆરએલ રોડની પાછળના રસ્તાઓ સહિત અનેક વિસ્તારોમાં આવી ફરિયાદો સામે આવી છે. બોપલના રહેવાસીઓએ બોપલ હનુમાન મંદિરથી સેલિબ્રેશન સેન્ટર તરફના અંધારા માર્ગ અંગે પણ ધ્યાન દોર્યું છે. ઘુમા તરફ જતો વીઆઈપી રોડ, શીલજ સર્કલ, નાંદોલી રોડ અને ભાડજ આ તમામ વિસ્તારોમાંથી પણ નાગરિકોએ ફરિયાદો કરી છે. એસબીઆર, રાજપથ-રંગોલી રોડ અને કર્ણાવતી ક્લબની પાછળનો વિસ્તાર પણ આ યાદીમાં સામેલ છે, જ્યાં સ્ટ્રીટલાઈટ કાં તો બંધ છે અથવા ખામીયુક્ત છે. ચાંદખેડા-ગાંધીનગર રોડ અને વિશ્વકર્મા એન્જિનિયરિંગ કોલેજ રોડની પણ ફરિયાદો સામે આવી છે.

પાંચ વર્ષમાં સ્ટ્રીટલાઈટ પાછળ રૂ. 117.5 કરોડનો ખર્ચ

વિરોધાભાસ એ છે કે અમદાવાદ મ્યુનિસિપલ કોર્પોરેશન પાસે સ્ટ્રીટલાઈટ માટે ખર્ચની અછત નથી. છેલ્લાં પાંચ વર્ષમાં કોર્પોરેશને આશરે રૂ. ૧૧૭.૫ કરોડના ખર્ચે ૩૪,૯૮૨ નવી સ્ટ્રીટલાઈટ લગાવી છે. આ જ સમયગાળામાં સ્ટ્રીટલાઈટ અંગે મળેલી ફરિયાદોની સંખ્યા ૪.૩૩ લાખ સુધી પહોંચી છે.

આ પણ વાંચો : સાહિત્ય જગતને ખોટ, જાણીતાં ગુજરાતી નવલકથાકાર ઇલા આરબ મહેતાનું અવસાન, ‘બત્રીસ પૂતળીની વેદના’ ખૂબ ફેમસ

આ વર્ષે અત્યાર સુધીમાં સ્ટ્રીટલાઈટ અંગે 90,974 ફરિયાદો

એએમસીના સ્ટ્રીટલાઈટ ડેશબોર્ડ મુજબ આ વર્ષે ૧ જાન્યુઆરીથી ૬ ઓક્ટોબર સુધીમાં ૯૦,૯૭૪ ફરિયાદો નોંધાઈ છે, તેમાંથી ૯૦,૧૩૧ ફરિયાદોનો નિકાલ કરવામાં આવ્યો છે. ફરિયાદોના નિકાલમાં સરેરાશ ૧.૯ દિવસનો સમય લાગ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ