ગુજરાત / પૂર્વ અમદાવાદના SP રિંગ રોડની હાલત બેહાલ, તૂટેલા સર્વિસ રોડ, દબાણો અને અધૂરા સિક્સ-લેન કામથી વાહનચાલકો પરેશાન

પૂર્વ અમદાવાદને જોડતો સરદાર પટેલ (એસપી) રિંગ રોડ લાંબા સમયથી જાળવણી અને માળખાકીય કામગીરીના અભાવે મુશ્કેલીનું કારણ બન્યો છે. પીપળજ ગાય સર્કલથી ભાટ સર્કલ સુધીના માર્ગ પર અનેક સ્થળે રોડની હાલત ખરાબ છે, જ્યારે તૂટેલા સર્વિસ રોડ અને દબાણોને કારણે વાહનચાલકોની મુશ્કેલી વધી છે.

ઔડા દ્વારા આશરે બે વર્ષ પહેલાં રિંગ રોડને સિક્સ-લેન કરવાની જાહેરાત કરવામાં આવી હતી, પરંતુ પૂર્વ અમદાવાદના આ હિસ્સામાં કામગીરી હજુ આગળ વધી નથી. બીજી તરફ, હાથીજણ, વસ્ત્રાલ, કઠવાડા અને દાસ્તાન સર્કલ પર સૂચિત ઓવરબ્રિજની કામગીરીમાં પણ વિલંબથી પીક અવર્સ દરમિયાન ટ્રાફિકનું ભારણ વધે છે.

હાલતમાં હોવાથી મુખ્ય માર્ગ પર જ ટ્રાફિકનું દબાણ

રિંગ રોડની બંને બાજુ સર્વિસ રોડ પર લારી-ગલ્લા, પથારા અને વાહનોનાં પાર્કિંગનાં દબાણો છે. અનેક સ્થળે સર્વિસ રોડ તૂટેલી હાલતમાં હોવાથી મુખ્ય માર્ગ પર જ ટ્રાફિકનું દબાણ વધે છે. નરોડા, કઠવાડા, ઓઢવ, નિકોલ, વસ્ત્રાલ, રામોલ, વટવા અને નારોલ સહિતના વિસ્તારોને જોડતા આ મહત્ત્વના માર્ગની સ્થિતિ સામે હવે નાગરિકોમાં સવાલો ઊઠી રહ્યા છે.

આ પણ વાંચો : ડુંગળી રૂ.70 અને લસણ રૂ.350એ પહોંચ્યું, દિવાળી સુધી ભાવ ઊંચા રહેવાની શક્યતા

વાહનચાલકો અને સ્થાનિકોની માગ છે કે પીપળજથી ભાટ સુધીના માર્ગની તાત્કાલિક મરામત સાથે સિક્સ-લેનનું કામ શરૂ કરવામાં આવે, ઓવરબ્રિજની કામગીરી ઝડપી બનાવાય અને સર્વિસ રોડ પરથી દબાણો દૂર કરવામાં આવે. રિંગ રોડ પરથી ટોલ વસૂલાતો હોવા છતાં જરૂરી જાળવણી અને સુવિધાઓમાં વિલંબ કેમ થઈ રહ્યો છે તે અંગે પણ તંત્રએ સ્પષ્ટતા કરવી જોઈએ.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ