ચોમાસુ / પ્રિમોન્સૂન કામગીરી નિષ્ફળ, કરોડોના ખર્ચ બાદ પણ કમર તોડ રસ્તાએ તંત્રની પોલ ખોલી

રાજ્યભર સહિત અમદાવાદમાં મેઘરાજાએ મહેરબાની કરી છે પરંતુ દર વર્ષની જેમ આ વર્ષે પણ અમદાવાદ મહાનગરપાલિકા પ્રિમોન્સૂન પ્લાનિંગમાં નિષ્ફળ સાબિત થયું છે. શહેરમાં પડેલા ભારે વરસાદથી રોડ રસ્તાની હાલત બિસ્માર થઇ ગઈ છે. 

શહેરના થલતેજ, હેલ્મેટ સર્કલ, વાડજ વિસ્તારમાં રોડ પર ખાડા પડતાં વાહનચાલકોએ ભારે હાલાકીનો સામનો કરવો પડી રહ્યો છે. રોડ લોકોની કમરભાંગી તેવા જતાં અહીંથી પસાર થતા વાહન ચાલકો જાણે જીવના જોખમે વાહન ચલાવી રહ્યા હોય તેવું લાગે છે.   

ઉલ્લખનીય છે કે, તંત્ર પ્રિમોન્સૂન કામગીરી પાછળ કરોડો રૂપિયાનો ખર્ચ કરે છે. પરંતુ આ ખર્ચો માત્ર કાગળ પર જ હોય તેવું આ રોડ રસ્તાની હાલત જોઈ લાગી રહ્યું છે. આટલા વરસાદ માત્રથી વાડજનો બીઆરટીએસ કોરિડોર પણ ધોવાઈ ચૂક્યો છે જેના કારણે બસમાં બેઠલા મુસાફરોને પણ ભારે મુશ્કેલી પડી  રહી છે.  

સ્થાનિક લોકોને પણ આ ખાડાને કારણે અવર જ્વર કરવામાં મુશ્કેલી પડી રહી છે. પરંતુ કોર્પોરેશન તંત્ર હજુ સુધી અહીં સમારકામ કરવા પહોંચ્યું નથી. લોકોનો આક્ષેપ છે કે, મીડિયામાં અહેવાલ પ્રસિદ્ધ થાય પછી કોર્પોરેશન દ્વારા ખાડામાં માત્ર કાંકરી પાથરી દેવામાં આવે છે.

ગત વર્ષે રોડ રસ્તા મામલે હાઇકોર્ટે પણ ટકોર કરી હતી અને ત્યાર બાદ તંત્ર જાગ્યું હતું પરંતુ કામગીરી માં નિષ્ફ રહ્યું હતું.  કોર્પોરેશન તંત્ર આ વર્ષે પણ નિષ્ફળ રહ્યું છે ત્યારે આ બિસ્માર રોડ રસ્તાનું સમારકામ ક્યારે થશે તે જોવાનું રહ્યું.