- અમદાવાદમાં આજે એર ક્વોલિટી ઇન્ડેક્સ ર૩પ નોંધાયો
- રાયખડમાં ૩૦૬ ઈન્ડેક્સથી વાયુ પ્રદૂષણ વધ્યું
- દર વર્ષે શિયાળામાં શહેરમાં વાયુ પ્રદૂષણ ભયજનક બને છે
કોરોનાકાળમાં ફટાકડા ફોડવાથી પ્રદૂષણની સાથે-સાથે કોરોના વાઇરસનું સંક્રમણ ફેલાવાની ભીતિ છે એટલે એનજીટીએ દિલ્હીમાં ગત તા.૧૦ નવેમ્બરથી આગામી તા.૩૦ નવેમ્બર સુધી ફટાકડા ફોડવા પર પ્રતિબંધ લગાવ્યો છે. એર મોનિટરિંગ એજન્સી 'સફર'ના જણાવ્યા અનુસાર દિલ્હીમાં આજે સવારે એર ક્વોલિટી ઇન્ડેક્સ (એક્યૂઆઇ) ૭ર૪ નોંધાયો છે. આ ઇન્ડેક્સ લોકોના આરોગ્ય માટે વધારે ભયજનક છે.
અમદાવાદમાં આજે એર ક્વોલિટી ઇન્ડેક્સ ર૩પ નોંધાયો
જ્યારે અમદાવાદમાં આજે એર ક્વોલિટી ઇન્ડેક્સ ર૩પ નોંધાયો છે, જે હવાની ગુણવત્તા ખરાબ હોવાનું દર્શાવે છે. હજુ ત્રણ દિવસ પહેલાં શહેરનો ઈન્ડેક્સ ૧૭પની આસપાસ હતો કે જે હવાની ગુણવત્તાને મધ્યમ દર્શાવતો હતો એટલે છેલ્લા ૭ર કલાકમાં હવાની ગુણવત્તા મધ્યમથી ખરાબ સ્તર સુધી આવી છે, જોકે આમાં શહેરમાં લઘુતમ તાપમાન ૧૬.૩ નોંધાતાં પ્રદૂષણ વધ્યું હોવાની પણ ચર્ચા ઊઠી છે, કેમકે શિયાળામાં ઠંડીના કારણે ભેજ ઓછો થવાથી હવા સૂકી થાય છે અને સવારે તેમજ રાતે ધૂળ અને ધૂળના રજકણ જમીન નજીક હવામાં રહે છે.
રાયખડમાં ૩૦૬ ઈન્ડેક્સથી વાયુ પ્રદૂષણ વધ્યું
જોકે શહેરમાં કચરાના ડુંગરના કારણે પીરાણામાં ઝેરી હવાની માત્રા સ્વાભાવિકપણે સૌથી વધુ છે. પીરાણા ડમ્પ સાઇટ ૮૪ એકર જમીનમાં ફેલાયેલી છે. આ કચરાના ડુંગરમાં વારંવાર આગ લાગે છે તેમજ શિયાળામાં આગના કારણે થતો ધુમાડો જમીનની નજીક રહેવાથી તેની અસર સમગ્ર અમદાવાદમાં થાય છે. આજે પીરાણામાં એર ક્વોલિટી ઇન્ડેક્સ ૩૩૬ નોંધાતાં આ બાબત હવાની ગુણવત્તા ખરાબ સ્તરની દર્શાવે છે, જ્યારે રાયખડમાં ૩૦૬ ઈન્ડેક્સથી વાયુ પ્રદૂષણ વધ્યું છે.
ગિફ્ટ સિટીમાં ૧ર૪ એટલે કે મધ્યમ નોંધાયું
શહેરના અન્ય વિસ્તારના વાયુ પ્રદૂષણની વિગત તપાસતાં નવરંગપુરામાં ૧પ૯ ઈન્ડેક્સ એટલે કે મધ્યમ, રખિયાલમાં ૧૭૩ એટલે કે મધ્યમ, ચાંદખેડામાં ૧૯૩ એટલે કે મધ્યમ, બોપલમાં ૧૯૦ એટલે કે મધ્યમ, સેટેલાઇટમાં ર૦૮ એટલે કે ખરાબ, એરપોર્ટમાં ર૩૯ એટલે કે ખરાબ, ગાંધીનગરના લેકાવાડામાં ૩૦ર એટલે કે ખરાબ અને ગિફ્ટ સિટીમાં ૧ર૪ એટલે કે મધ્યમ નોંધાયું છે.
ખુલ્લા પ્લોટમાંથી ઊડતી ધૂળ પણ શહેરની હવાને દૂષિત કરે છે
શહેરની કેમિકલ ફેકટરીઓ પણ પ્રદૂષણ ફેલાવે છે. તાજેતરમાં બહેરામપુરાની સાહિલ કેમિકલ ફેક્ટરીના અગ્નિકાંડથી મ્યુનિ. તંત્ર અને જીપીસીબીની પોલ ખૂલી છે, જેના કારણે હવે ગેરકાયદે ધમધમતાં ફેક્ટરી કે ગોડાઉન સામે તંત્રે લાલ આંખ કરી છે, પરંતુ કેમિકલ ફેક્ટરીની નિયમિત ચકાસણી થશે કે કેમ તે બાબત શંકાસ્પદ છે. શહેરમાં અસરકારક જાહેર પરિવહન સર્વિસ ન હોઇ અંગત વાહનનો વપરાશ સતત વધી રહ્યો છે, જેના કારણે પિકઅવર્સમાં હવામાં ધુમાડાનું પ્રમાણ વધતું જાય છે. બાંધકામના ડિમોલિશન કે ડેવલપમેન્ટના કારણે ધૂળ ઊડીને પ્રદૂષણ ફેલાવે છે. આ ઉપરાંત ખુલ્લા પ્લોટમાંથી ઊડતી ધૂળ પણ શહેરની હવાને દૂષિત કરે છે.
જોકે સત્તાધીશોએ પીરાણા ડમ્પ સાઇટની બંને તરફ પ૦૦ એર પ્યોિરફાયર મશીન મૂકવા માટેના પ્રોજેક્ટનો બજેટમાં સમાવેશ કર્યો છે. એર પ્યોરિફાયરનાે પાઇલટ પ્રોજેક્ટ સફળ નીવડ્યો હોવાનો તંત્રનો દાવો છે.
દર વર્ષે શિયાળામાં શહેરમાં વાયુ પ્રદૂષણ ભયજનક બને છે
વાયુ પ્રદૂષણ અસ્થમા કે દમ સહિત શ્વાસના દર્દી તેમજ કોરોનાના સંક્રમણથી બહાર આવેલા દર્દી માટે જોખમી છે. આવા દર્દીનાં ફેફસાં પર વાયુ પ્રદૂષણની અસર થાય છે. હવે અમદાવાદમાં ઠંડીનું પ્રમાણ વધતું જશે. આની સાથે-સાથે હવાની ગુણવત્તા વધુ ને વધુ કથળતી જશે. આગામી ડિસેમ્બર, જાન્યુઆરી અને ફેબ્રુઆરીમાં ફટાકડા ફોડ્યા વિના માત્ર ઠંડા હવામાનના કારણે શહેરમાં હવાની ગુણવત્તા સતત બગડતી જશે. દર વર્ષે શિયાળામાં શહેરમાં વાયુ પ્રદૂષણ ભયજનક બને છે તે નક્કર વાસ્તવિકતા હોઇ દિવાળી સિવાય પણ આ મામલે તંત્રે ગંભીર બનવું પડશે.
