તપાસ / રાજકોટમાં આગની ઘટના બાદ દરેક જિલ્લામાં તંત્રની આંખો ખુલી, ગેમઝોનમાં તપાસનો ધમધમાટ શરુ

રાજકોટ ટીઆરપી ગેમઝોન ઘટના બાદ તંત્ર દ્વારા સમગ્ર રાજ્યમાં તપાસનાં આદેશ આપવામાં આવ્યા છે. ત્યારે બનાસકાંઠામાં ફાયર વિભાગ અધિકારી તેમજ પોલીસ દ્વારા તપાસ હાથ ધરવામાં આવી હતી. પાલનપુર ન્યુ બસપોર્ટની અંદર પશ્ચિમ પોલીસ અને ફાયરનાં અધિકારીઓએ તપાસ હાથ ધરી હતી. જ્યારે ન્યુ બસ પોર્ટની અંદર વોર ગેમ ઝોન બંધ હાલતમાં જોવા મળ્યું હતું. પાલનપુર શહેર તેમજ જીલ્લામાં કોઈ પણ જગ્યાએ ચાલતા ગેમઝોનની પોલીસ અને ફાયર અધિકારીઓએ તપાસ હાથ ધરી હતી.

મામલતદાર સહિતના અધિકારીઓએ ગેમઝોનની કરી તપાસ

દાહોદનાં છાબ તળાવ પાસે આવેલા ગેમઝોનમાં વહીવટી તંત્ર દ્વારા તપાસ હાથ ધરવામાં આવી છે. છાબ તળાવ આગળ આવેલા 6 પોકેટ ગેમઝોન સીલ કરવામાં આવ્યા છે. મામલતદાર સહિતનાં અધિકારીઓએ ગેમઝોનની તપાસ કરી હતી. તેમજ ગેમઝોનમાં ફાયર અને સેફ્ટી સહિતનાં માપદંડોને લઈ તપાસ હાથ ધરવામાં આવી હતી. તેમજ ગેમઝોનમાં કાર્બન ડાયોક્સાઈડનાં બે સિલિન્ડ પણ મળ્યા હતા. ગેમઝોનમાં અવર જવર માટે માત્ર 1 ગેટ હોવાથી સીલ કરાયું છે. રાજકોટની ઘટનાને પગલે રાજ્યભરમાં ગેમઝોનમાં તપાસ હાથ ધરવામાં આવી છે.

મંજૂરી તેમજ ફાયર સેફ્ટીની સુવિધાને લઈ ચેકિંગ કરાયું

રાજકોટ ગેમિંગ ઝોન દુર્ઘટનાને લઈ આખા રાજ્યમાં તપાસનો ધમધમાટ શરૂ થયો છે. જૂનાગઢમાં ગેમઝોન તેમજ એન્યુઝમેન્ટ પાર્કમાં ચકાસણી શરૂ કરવામાં આવી છે. તેમજ ફાયર વિભાગની ટીમ, પોલીસ તેમજ મનપાનાં અધિકારી સહિતનો સ્ટાફ ચેકિંગ કરી રહ્યો છે. મંજૂરી તેમજ ફાયર સેફ્ટીની સુવિધાને લઈ ચેકિંગ કરાયું છે.

વધુ વાંચોઃ રાજકોટ આગકાંડમાં નોંધાઈ ફરિયાદ, યુવરાજસિંહ સોલંકી અને પ્રકાશ જૈન સહિત 6 આરોપી સામે નોંધાયો ગુનો

વ્યારા ફાયર વિભાગે તપાસ શરૂ કરી

રાજકોટમાં ગેમિંગ ઝોનનુ દુર્ઘટનાં બાદ તાપીમાં પણ ગેમઝોનમાં ચેકિંગ હાથ ધરાયું હતું. વ્યારાનાં ટિચકપૂરા ખાતે આવેલ ગેમઝોન અને સિનેમાઘરોમાં તપાસ કરાઈ હતી. ફાયરનાં સાધનો તેમજ ફાયર એક્ઝિટની ચકાસણી કરાઈ હતી. વ્યારા ફાયર વિભાગે તપાસ શરૂ કરી હતી.