ઉત્તરપ્રદેશના મેરઠમાં એક અનોખો કિસ્સો જોવા મળ્યો. જેમાં એક જુનિયર ઍન્જિનિયરને ટ્રાફિક મેમો આપવાનું પોલીસને એટલું ભારે પડી ગયું કે પોલીસ ચોકીમાં 5 કલાક સુધી વીજળી વગર રહેવું પડ્યું.
હેલ્મેટ અને PUCના કારણે જુનિયર ઍન્જિનિયરને ફટકાર્યો દંડ
લાઈટ બિલના પૈસા બાકી હોવાના કારણે કનેક્શન કાપ્યુંઃ ઍન્જિનિયરે
હકીકતમાં હાલમાં ટ્રાફિક નિયમો તોડવા પર ટ્રાફિક પોલીસ લોકો પાસેથી 10 ગણો સુધી વધારાનો દંડ વસૂલી રહી છે. આવામાં લોકો પોલીસના ડરથી ટ્રાફિક નિયમોનું પાલન તો કરે છે પરંતુ આજે એક એવી ઘટના સામે આવી છે જે તમને દંગ કરી દેશે.
મેરઠમાં ટ્રાફિક ચલાણને લઈને પોલીસ અને વીજળી વિભાગ આમને-સામને આવી ગયું. જેના પગલે પોલીસ ચોકીમાં 5 કલાક સુધી વીજળીનું કનેક્શન કાપી દેવાયું હતું.
હેલ્મેટ અને PUCના કારણે જુનિયર ઍન્જિનિયરને ફટકાર્યો દંડ
ઉત્તર પ્રદેશમાં મેરઠના તેજગઢી પોલીસ ચોકી પાસે પોલીસ વાહનોનું ચૅકિંગ કરી રહી હતી. આ દરમ્યાન JE સોમ પ્રકાશ પોતાની સ્કૂટી પર જઈ રહ્યાં હતાં. જ્યાં પોલીસ તરફથી તેમને ચૅકિંગ માટે રોકવામાં આવ્યાં. સોમ પ્રકાશે DL (ડ્રાઈવિંગ લાયસન્સ) અને RC (રજિસ્ટ્રેશન સર્ટિફિકેટ) સહિત કાગળો દેખાડ્યાં, પરંતુ આ દરમ્યાન તેમની પાસે હેલ્મેટ અને PUC (પૉલ્યુશન અંડર કન્ટ્રોલ) સર્ટિફિકેટ નહોતું. ત્યાર બાદ હાજર પોલીસ ઈન્સ્પેક્ટરે હેલ્મેટ અને PUC માટે તેમને દંડ ફટકાર્યો હતો.
શું સોમપ્રકાશે આ કારણે નહોતું પહેર્યુ હેલ્મેટ?
JE સોમ પ્રકાશના જણાવ્યા પ્રમાણે તેમને માથામાં એલર્જી થઈ હતી જેના કારણે તેમણે હેલ્મેટ પહેર્યુ નહોતું. જુનિયર ઍન્જિનિયરે આ દરમ્યાન પોલીસને મેમો ફાડવા ન કહ્યું પરંતુ હાજર પોલીસ અધિકારીએ કાયદાની વાત કરી અને બંને વચ્ચે બોલાચાલી થઈ.
જુનિયર ઍન્જિનિયરે લીધો બદલો
મેમો મળ્યા બાદ ઍન્જિનિયરે પોતાના ડિપાર્ટમેન્ટના નિયમોનું પાલન શરૂ કર્યુ. તેણે સંબંધિત પોલીસ ચોકી અને પોતાના વિસ્તારના પોલીસ ચોકીનું વીજળી કનેક્શન કાપી નાંખ્યું. ત્યાર બાદ પોલીસને પાંચ કલાક સુધી લાઈટ વગર રહેવું પડ્યું હતું. આ મામલે ઍક્ઝિક્યુટીવ ઍન્જિનિયરે કહ્યું કે લાઈટ બિલના પૈસા બાકી હોવાના કારણે કનેક્શન કાપવામાં આવ્યું હતું.