માર્કેટ / 3 રાજ્યોમાં કેસરિયો લહેરાતા શેર બજારમાં લીલોતરી: રોકાણકારોને 6 લાખ કરોડનો ફાયદો, આ શેરોમાં કમાણી

• આજે શેરમાર્કેટમાં ઐતિહાસિક ઊછાળો
• માર્કેટ કેપ 343 લાખ કરોડને પાર
• રોકાણકારોની સંપત્તિમાં 6 લાખ કરોડનો વધારો

દેશનાં 5 રાજ્યોમાં થયેલ વિધાનસભાની ચૂંટણીમાં ભાજપે 3 રાજ્યોમાં ભવ્ય વિજય મેળવ્યો જેની અસર આજના માર્કેટ પર જોવા મળી છે. આજે ભારતીય શેરબજારમાં રેકોર્ડ તેજીની સાથે બંધ થયું છે. સેંસેક્સમાં 1400 અંકો અને નિફ્ટીમાં 430 અંકોનો ઐતિહાસિક ઊછાળો થયો છે. આજનાં સત્રમાં બેંકિંગની સાથે સરકારી કંપનીઓનાં શેરોમાં જોરદાર તેજી જોવા મળી હતી. 

6 લાખ કરોડનો નફો
રોકાણકારોની સંપત્તિમાં આજે 6 લાખ કરોડ રૂપિયાનો નફો જોવા મળ્યો છે. આજનું ટ્રેડિંગ પૂર્ણ થવા પર BSE સેંસેક્સ 1383 અંકોનાં ઊછાળાની સાથે 68865 અંકો પર બંધ થયું જ્યારે NSE નિફ્ટી 419 અંકોનાં ઊછાળા સાથે 20686 અંકો પર બંધ થયું છે.

સેક્ટરની સ્થિતિ
આજનાં સેશનમાં સેંસેક્સ-નિફ્ટી ઐતિહાસિક હાઈ પર પહોંચ્યું. તો બેંક નિફ્ટી પણ 1668 અંકોનાં ઊછાળા સાથે ઐતિહાસિક હાઈ 46484 અંકો પર પહોંચી ગયું છે. નિફ્ટી મિડ કેપ ઈંડેક્સ અને સ્મૉલ ઈંડેક્સ પણ પોતાના લાઈફટાઈમ હાઈ પર જઈને ક્લોઝ થયું છે. આજનાં ટ્રેડમાં સરકારી અને પ્રાઈવેટ બંને બેંકોનાં શેરોમાં તેજી જોવા મળી છે. સરકારી કંપનીઓમાં પણ મોટી ખરીદી નોંધાઈ છે. સેંસેક્સનાં 30 શેરોમાં 25માં તેજી સાથે અને 5 ઘટીને બંધ થયો. જ્યારે નિફ્ટીનાં 50માંથી 45 શેરોમાં તેજીની સાથે જ્યારે 5માં ઘટાડો થયો.