સત્ય શું? / 'પતાવટ કર્યા વગર તારે જગ્યા ઉપર જવાનું નથી', જમીન વિવાદમાં MLA લવિંગજી પર ગંભીર આરોપ, બચાવમાં જુઓ શું કહ્યું

• લવિંગજી ઠાકોર પર વેપારીના આરોપ
• `MLAના લોકો જમીન પર ન જવા દેવા આપે છે ધમકી'
• આરોપ સાબિત થશે તો જાહેર જીવન છોડી દઈશઃ MLA લવિંગજી 

રાધનપુરના ધારાસભ્ય લવિંગજી ઠાકોર પર એક વેપારીએ ગંભીર આક્ષેપ કર્યા છે. લવિંગજી ઠાકોરના લોકો જમીન પર ન જવા માટે ધમકી આપતા હોવાનો વેપારીએ આરોપ લગાવ્યો છે. આ મામલે મનોજ ઠક્કર નામના વેપારીએ પ્રધાનમંત્રી નરેન્દ્ર મોદીને પત્ર લખી ન્યાયની માગ કરી છે તો બીજી તરફ ધારાસભ્ય લવિંગજી ઠાકોરે તમામ આરોપને પાયાવિહોણા ગણાવ્યા છે. તેમણે કહ્યું કે, વેપારીને હું ઓળખતો નથી. મારા પર લાગેલા તમામ આરોપ ખોટા છે. જો આ આરોપ સાબિત થશે તો હું જાહેર જીવન છોડી દઈશ.

લવિંગજી ઠાકોરની પ્રતિક્રિયા
લવિંગજી ઠાકોરે જણાવ્યું કે, હું મનોજ ઠક્કર કોણ છે તેને હું ચહેરાથી ઓળખતો નથી, જે મારા પર આક્ષેપો થયા છે અને ખંડણીની વાત કરી છે તે વાહીયાત વાત છે તેમજ તદ્દન ખોટી વાત છે. તે આક્ષેપનો પુરવાર કરશે તો હું મારો જાહેર જીવન છોડી દેવા તૈયાર છું. પરંતુ કોઈ ગરીબોની જમીન પચાવી પાડવાની તે દેવી પૂજક સમાજની જમીન હતી જેના 7-12ના ઉતારા છે, જેની કોર્ટ મેટર પણ થયેલી છે. આ લોકોના બદ ઈરાદાથી કબજો પચાવી પાડવા તેમજ દેવીપૂજકોને હેરાન કરવા પરેશાન કરતા હોય છે. જે માટે મેં પી આઈને વાત કરી કે, સાચુ હોય તે કરજો એમની હોય તો એમને આપી દેજો.

મનોજ ઠક્કરના આક્ષેપ
મનોજ ઠક્કરે જણાવ્યું કે, એમના પીએ સુરેશભાઈ ઠાકોર વકીલ મને રાજગઠી મળવા આવે છે, ત્યાં મને બોલાવીને એવું કહે છે કે તારે જગ્યા પર જવાનું નથી. મારે માપણી થઈ ગઈ હતી જેથી બીજા દિવસે જગ્યા પર જવાનુ હતું પોલીસ પ્રોટેક્શન સાથે. મેં કારણ પૂછ્યું ત્યારે કહ્યું કે, ધારાસભ્ય લવિંગજીની પતાવટ સિવાય તારે જગ્યા પર જવાનું નથી અને પતાવટનો અર્થ ખંડણી થઈ.