અમદાવાદ / રખડતા ઢોર પકડવા ગયેલા કર્મચારીને યુવકે ઝીંક્યા તલવારના ઘા, પોલીસે યુવકને વૉન્ટેડ જાહેર કર્યો

• ઢોર પકડવા ગયેલા કર્મચારી પર હુમલો
• કર્મચારીને તલવારના ઘા ઝીંકી મારી નાખવાની ધમકી અપાઈ 
• નિકોલ પોલીસ સ્ટેશનમાં નોંધાઈ ફરિયાદ 

અમદાવાદના નિકોલ વિસ્તારમાં ઢોર પકડવા ગયેલા કર્મચારી પર યુવકે સરકારી કામમાં રુકાવટ કરી તલવારના ઘા ઝીંકી જાનથી મારી નાખવાની ધમકી આપી હોવાનો કિસ્સો પ્રકાશમાં આવ્યો છે. આ મામલે અમદાવાદના શાહીબાગની ગવર્નમેન્ટ કોલોનીમાં રહેતા અને કેટલ કેચર ઢોર ત્રાસ અંકુશ વિભાગમાં ફરજ બજાવતા ઈકરામમુદ્દીન અયુબખાન પઠાણે નિકોલ પોલીસ સ્ટેશનમાં  ફરિયાદ નોંધાવી છે. 

રખડતી ગાયને પકડવા જતાં બબાલ
ગઈકાલે ઈકરામમુદ્દીન તથા ઢોર પાર્ટીના માણસો સેનેટરી સબ ઇન્સ્પેક્ટર તેમજ પોલીસ, એસઆરપી જવાન સહિતના કર્મચારીઓ પૂર્વ ઝોનમાં મનમોહન ચાર રસ્તાથી નિકોલ ખોડિયાર માતાના મંદિર તરફથી પસાર થઇ રહ્યા હતા. આ વેળાએ મનમોહનચોકીની સામેના જાહેર રોડ ઉપર રખડતાં ઢોર પકડવાની કામગીરી કરતા હતા ત્યારે ઈકરામમુદ્દીનની ટીમ આ વિસ્તારની રખડતી એક ગાયને કોર્ડન કરી પકડતી હતી. 

નિકોલ પોલીસે યુવકને વોન્ટેડ જાહેર કર્યો
આ દરમિયાન  મહેશ રબારીની બે ગાયને ગોમતીપુર શાકમાર્કેટથી ઈકરામમુદ્દીનની ટીમે પકડીને ટેલરમાં પૂરી હતી, જેથી ઈકરામમુદ્દીનની ટીમ ગાયને પકડવાની કામગીરી કરતી હતી. આ સમયે સરકારી કામગીરી ચાલુ હતી તેમ છતાં અચાનક મહેશે તલવારથી ઈકરામમુદ્દીનને પાછળથી ઘા ઝીંકી દીધો હતો. જે ને લઇને નિકોલ પોલીસે યુવકને વોન્ટેડ જાહેર કરી તેની શોધખોળ શરૂ કરી છે.