ન્યાયિક / પત્નીને ખાવાનું બનાવતાં ન આવડતું હોય એ છૂટાછેડાનો આધાર ન બની શકે- હાઈકોર્ટનો ચુકાદો

• અબુ ધાબીના કપલના કિસ્સામાં કેરળ હાઈકોર્ટનો ચુકાદો 
• પતિએ છૂટાછેડા લેવા માટે કરી અરજી
• પત્નીને ખાવાનું બનાવતાં નથી આવડતું એવું આપ્યું કારણ 

કેરળ હાઈકોર્ટે મંગળવારે કહ્યું હતું કે રસોઈની કુશળતાના અભાવને કારણે પત્ની તેના પતિ માટે ભોજન રાંધતી નથી, તે લગ્નનો અંત લાવવાના હેતુથી ક્રૂરતા સમાન નથી. જસ્ટીસ અનિલ કે નરેન્દ્રન અને સોફી થોમસની ખંડપીઠે ક્રૂરતાના આધારે છૂટાછેડાની માંગ કરતી એક વ્યક્તિ દ્વારા દાખલ કરવામાં આવેલી અરજીને ફગાવી દેતા આ ટીપ્પણી કરી હતી. 
ખંડપીઠે કહ્યું કે પત્નીને રસોઈ બનાવતા આવડતું ન હતું અને તેથી તે તેના પતિ માટે રસોઈ બનાવતી નહોતી. બંને પાર્ટીઓએ 7 મે, 2012ના રોજ લગ્ન કર્યા હતા અને તેઓ અબુધાબીમાં પતિ-પત્ની તરીકે રહેતા હતા. પતિએ દલીલ કરી હતી કે પત્નીએ તેનું અપમાન કર્યું હતું અને તેના સંબંધીઓની હાજરીમાં તેની સાથે દુર્વ્યવહાર કર્યો હતો. પતિએ કહ્યું કે તે ક્યારેય તેનું સન્માન કરતી નથી અને તેનાથી અંતર રાખતી હતી. પતિએ આક્ષેપ કર્યો હતો કે લગ્ન વ્યવહારિક અને ભાવનાત્મક રીતે સમાપ્ત થઈ ગયા છે અને તેઓ છેલ્લા 10 વર્ષથી અલગ રહે છે અને પુનઃમિલનનો કોઈ અવકાશ નથી.

હાઈકોર્ટે શું આપ્યો નિર્ણય?
કોર્ટે કહ્યું કે પત્ની સામેની કથિત ક્રૂરતાનો મુખ્ય આધાર એ હતો કે તેણે અરજીકર્તાના એમ્પ્લોયરને એક મેઇલ મોકલીને તેની નોકરીને સમાપ્ત કરવાની માંગ કરી હતી. મેઈલને જોઈને કોર્ટે કહ્યું કે મહિલાએ આ ઈરાદાથી મેઈલ મોકલ્યો હતો કે તે ઈચ્છે છે કે તેનું લગ્નજીવન સારું થાય. કોર્ટે વધુમાં કહ્યું કે મહિલા સંબંધને ઠીક કરવા અને તેને સામાન્ય જીવનમાં પરત લાવવા માંગતી હતી અને તે તેના ઉતાર-ચઢાવમાં તેની સાથે રહેવા તૈયાર હતી. તેથી લગ્ન સમાપ્ત કરવા માટે કોઈ કારણ નથી.

ખાવાનું બનાવતાં ન આવડવું ક્રૂરતા નથી 
કોર્ટે વધુમાં જણાવ્યું હતું કે મેજિસ્ટ્રેટ કોર્ટ સમક્ષ ફરિયાદ દાખલ કરવી એ ક્રૂરતા સમાન નથી કારણ કે જો તેનો પતિ તેને આશ્રય અને ભરણપોષણ પૂરું પાડતો ન હોય તો તેમ કરવાનો તેનો કાયદેસરનો અધિકાર છે. કોર્ટે આદેશમાં કહ્યું કે ખાવાનું બનાવતાં ન આવડવું એ ક્રૂરતા નથી અને એ છૂટાછેડા માટેનું કારણ નથી. આ સાથે હાઈકોર્ટે પતિની અપીલ ફગાવી દીધી હતી.