ખેડૂતો ત્રાહિમામ / ઉનાળાની શરૂઆતમાં જ પાણીનો પોકાર: ભાવનગરના 6 ડેમો તળિયા ઝાટક, ખેડૂતોએ કરી આ માંગ

• ભાવનગર જિલ્લાના 6 ડેમો તળિયા ઝાટક
• પાણીનો 30થી 40 ટકા જેટલો જ જથ્થો બાકી
• સૌની યોજનાનો લાભ આપવા ખેડૂતોની માંગ

દર વર્ષની જેમ આ વર્ષે પણ થશે પાણીની પારાયણ!
ઉનાળાની શરૂઆતમાં જ પાણીનો પોકાર શરૂ થઈ ગયો છે. દર વર્ષની જેમ આ વર્ષે પણ પાણીની પારાયણ થશે તેવા સંકેતો જોવા મળી રહ્યા છે. રાજ્યના ડેમમાં જળસ્તર નીચા જઈ રહ્યા છે. ભાવનગર જિલ્લાની વાત કરવામાં આવે તો ભાવનગર જિલ્લામાં 13 ડેમોમાંથી 6 ડેમ તળિયા ઝાટક થઈ ગયા છે. બાકીના અન્ય ડેમમાં પાણીનો 30 ટકા જેટલો જ જથ્થો બચ્યો છે. આ કારણોસર ખેડૂતોએ સરકાર પાસે જે ડેમ સૌની યોજના સાથે જોડાયેલ તે ડેમને સૌની યોજના સાથે જોડવા માટે માંગ કરી છે.

ડેમમાં પાણીનો સીમિત જથ્થો જ બાકી 
ભાવનગરના શેત્રુંજ્ય ડેમમાં પાણીનો 50 ટકા જથ્થો બાકી રહ્યો છે. આ શેત્રુંજ્ય જળસિંચાઈ યોજના ભાવનગર જિલ્લાની આધારભૂત યોજના છે. શેત્રુંજ્ય ડેમનું જળસ્તર ચિંતાનું કારણ બન્યું નથી, પરંતુ 12 જેટલા ડેમમાં પાણીનો 30 ટકા જથ્થો જ બચ્યો છે, આ કારણોસર ખેડૂતોમાં ઉનાળુ પાકની વાવણી માટે ચિંતા જોવા મળી રહી છે. બીજી તરફ નાગરિકોમાં પાણી બાબતે ચિંતા ઊભી થઈ છે. ગત વર્ષની વાત કરવામાં આવે તો 6 જેટલા ડેમ સંપૂર્ણપણે ભરાયા ન હતા, જેથી આ વર્ષે ઉનાળાની શરૂઆતમાં જ આ ડેમ ખાલી થઈ ગયા છે. અન્ય ડેમમાં પાણીનો સીમિત જથ્થો જ બાકી રહ્યો છે, જે થોડા દિવસ સુધી જ ચાલી શકે તેમ છે. આ પરિસ્થિતિમાં ખેડૂતો અને નાગરિકોએ ખાલી થયેલ ડેમને સૌની યોજના સાથે જોડીને તેમાં પાણી ઠાલવવાની માંગ કરી છે.

મોટાભાગના ગામડાઓમાં સિંચાઈ આધારિત ખેતી
ભાવનગર જિલ્લામાં કુલ 13 ડેમ આવેલા છે. શેત્રુંજ્ય ડેમ અનેક વાર ઓવરફ્લો થયો હતો, પરંતુ અન્ય ડેમ સંપૂર્ણપણે ભરાઈ શક્યા નથી. ખરો ડેમ, બગડ ડેમ, રોજકી ડેમ, રંઘોળા ડેમમાં પાણીનો 30 થી 40 ટકા જેટલો જ જથ્થો બાકી છે. બીજીબાજુ પીંગળી ડેમ, હણોલ ડેમ, જસપરા માંડવા ડેમ, લાખણકા ડેમ અને હમીરપર ડેમ તળિયા ઝાટક થઈ ગયા છે. ભાવનગર જિલ્લામાં મોટાભાગના ગામડાઓમાં સિંચાઈ આધારિત ખેતી કરવામાં આવે છે, તો કેટલાક ગામડાઓમાં વરસાદ આધારિત ખેતી કરવામાં આવે છે.  ભાવનગર જિલ્લાના મોટાભાગના ડેમ સૌની યોજના સાથે જોડાયેલા નથી, જેથી ઉનાળો આવતા ખેડૂતોમાં ચિંતા જોવા મળી રહી છે. આ બાબતે સિંચાઈ યોજના સાથે જોડાયેલા અધિકારીઓ જણાવી રહ્યા છે કે, જે ડેમ સૌની યોજના સાથે જોડાયેલ નથી તે ડેમને સૌની યોજના સાથે જોડવા માટેનું કામ ચાલું છે.