VTV Ajab Gajab / Rajasthanનું અનોખુ મંદિર, જ્યાં થાય છે બુલેટની પૂજા અને પ્રસાદ તરીકે ચઢાવવામાં આવે છે દારૂ

રાજસ્થાનના જોધપુર શહેરમાં લોકો એક બુલેટને ભગવાન માનીને તેની પૂજા કરે છે અને આ મોટર સાયકલ માટે એક મંદિર પણ બનાવવામાં આવ્યું છે. આ મંદિર જોધપુર-પાલી હાઈવેથી 20 કિમીના અંતરે આવેલું છે.

જ્યારે તમે અમદાવાદ જોધપુર હાઈવે પર પ્રવાસ કરશો તો રસ્તામાં ઓમ બન્નાનું મંદિર જોવા મળશે. ઓમ બન્નાની પાછળ જ તમને RNJ 7773 નંબરનું એક બુલેટ ઊભેલું જોવા મળશે જેના પર લોકો ફૂલ ચડાવે છે અને પૂજા પણ કરે છે.  

આ મંદિરને લઈને લોકોમાં એક માન્યતા છે કે, આજ સ્થળે ઓમ બન્ના નામના એક વ્યક્તિનું મોત થઈ ગયું હતું. વર્ષ 1988માં ચોટિલા ગામના ઓમ બન્ના અહીંથી પસાર થઈ રહ્યા હતા ત્યારે અકસ્માતમાં તેમનું મોત થઈ ગયું હતું. એ ઘટના બાદ પોલીસ એમના બુલેટને પોલીસ સ્ટેશન લઈને જતી રહી હતી પણ બીજા દિવસે બાઇક પોલીસ સ્ટેશનમાંથી ગાયબ હતું. 

શોધખોળ કરતાં એ બાઇક જ્યાં અકસ્માત થયો હતો,તે જગ્યા પર મળ્યું તો પોલીસ ફરી એક વખત બાઇકને પોલીસ સ્ટેશન લઇ આવી હતી. પરંતુ બીજા દિવસે ફરીથી બાઈક અકસ્માતવાળા સ્થળે મળી આવ્યું.. તે પછી લોકોમાં એ વાત ફેલાઈ ગઈ કે બાઈક રોજ રાત્રે જાતે જ સ્ટાર્ટ થઈ જાય છે અને જે જગ્યાએ અકસ્માત થયો હતો ત્યાં જઈને ઊભી રહી જાય છે. 

કહેવાય છે કે પોલીસે આ વાતથી પરેશાન થઈને ભંગારવાળાને બુલેટ વેચી દીધું. પરંતુ એમ છતાં બુલેટ ફરી અકસ્માતવાળી જગ્યાએ જોવા મળતું હતું. લોકવાયકા પ્રમાણે આ ઘટનાઓ બાદ ઓમ બન્નાની દાદીને એક સપનું આવ્યું કે બુલેટ અને ઓમબન્ના માટે એક ચબૂતરો બાંધવામાં આવે. એ પછી એમની દાદીએ ત્યાં ચબૂતરો બાંધ્યો અને બુલેટ સ્થાપિત કરવામાં આવ્યું. આ જ જગ્યાએ આજે બુલેટ મંદિર છે. 

વધુ વાંચો: VIDEO:આ મંદિરમાં કોઈ બળતણ વિના પ્રગટી રહી છે જ્યોત, અકબરથી લઈને અંગ્રેજો કોઈ ઓલવી ન શક્યું

જો કે વાતો એવી પણ છે કે આ ચમત્કાર વિશે સાંભળીને ગામના લોકો એ અકસ્માતવાળી જગ્યા પર મંદિર બનાવ્યું હતું. કહેવાય છે કે પૂજા કરવાથી અને દારૂનો પ્રસાદ ચઢાવવાથી મનોકામના પૂરી થાય છે. હાલમાં આ મંદિરની  દેખભાળ ઓમ બન્નાના પરિવારજનો જ કરે છે.