મહેસાણા / અંતે વિઠ્ઠલ પટેલની હાર: બહુચરાજી APMC પેટાચૂંટણીમાં કિરીટ પટેલે મારી બાજી, જાણો કેટલા મતથી આપ્યો પરાજય

• APMCમાં વિઠ્ઠલ પટેલના દબદબાનો અંત
• APMCની ચૂંટણીમાં વિઠ્ઠલ પટેલની હાર 
• કિરીટ પટેલ સામે વિઠ્ઠલ પટેલ 54 મતથી હાર્યા 

Bahucharaji APMC By-Election: મહેસાણાના બહુચરાજી APMCમાં 88 વર્ષના પીઢ સહકારી અગ્રણી વિઠ્ઠલ પટેલના દબદબાનો અંત આવ્યો છે. બહુચરાજી APMCની પેટા ચૂંટણીમાં ભાજપના મેન્ડેટ ધરાવતા કિરીટ પટેલ સામે વિઠ્ઠલ પટેલ 54 મતથી હારી ગયા છે. APMCની પેટા ચૂંટણીમાં કિરીટ પટેલને 158 મત મળ્યા છે, જ્યારે વિઠ્ઠલ પટેલને 104 મત મળ્યા છે. મહત્વનું છે કે, 1974થી બહુચરાજી APMCમાં વિઠ્ઠલ પટેલ દબદબો હતો.

એક બેઠક ખાલી પડતા જાહેર કરાઈ હતી પેટાચૂંટણી 
બહુચરાજી APMC આમ તો સાવ નજીવી આવક ધરાવતું ખેત ઉત્પાદન બજાર છે. આ APMCની આખા વર્ષની માંડ 40 લાખ જેટલી માર્કેટ ફીની આવક છે. એટલે કે આ APMC રાજ્યની અન્ય APMCની તુલનામાં ખૂબ નાનું બજાર કહી શકાય. પણ આ નાના ખેત ઉત્પાદન બજારની ચૂંટણી એટલી રસપ્રદ બની જાય છે કે આખા રાજ્યના સહકારી રાજકારણનું ધ્યાન આ ચૂંટણી તરફ ખેંચાઈ જાય છે. અગાઉ ભાજપના પૂર્વ ગૃહમંત્રી રજની પટેલે આ બજારમાં પેનલ ઉતારી અને તેમણે ચૂંટણી જીતવા એડીચોટીનું જોર લગાવ્યું. પણ રજની પટેલની પેનલ ચૂંટણી ન જીતી શકી. હવે આ બજારમાં ખેડૂત વિભાગમાં એક બેઠક ખાલી પડતા પેટાચૂંટણી જાહેર કરવામાં આવી હતી. 

કિરીટ પટેલ સામે વિઠ્ઠલ પટેલે નોંધાવી હતી ઉમેદવારી
ભાજપને હતું કે મેન્ડેડ આપ્યું એટલે ઉમેદવાર બિન હરીફ થઈ જશે. પણ ભાજપની તમામ ગણતરી તેમના જ પીઢ સહકારી અગ્રણી વિઠ્ઠલ પટેલે ખોટી પાડી હતી. ભાજપે આ ચૂંટણીમાં અગાઉ વિધાનસભાની ચૂંટણી લડી ચૂકેલા અને મોટા ગજાના નેતા ગણાતા કિરીટ પટેલ દેવગઢને મેન્ડેડ આપ્યું હતું. તો કિરીટ પટેલની સામે મહેસાણા જિલ્લા સહકારી સંઘના ચેરમેન અને પીઢ સહકારી અગ્રણી ગણાતા 88 વર્ષીય વિઠ્ઠલ પટેલે ઉમેદવારી નોંધાવી હતી. વિઠ્ઠલ પટેલે ભાજપના ઉમેદવાર સામે ઉમેદવારી નોંધાવતા નાની ગણાતી આ ચૂંટણી મોટી બની ગઈ છે. તો બીજી તરફ ભાજપે વિઠ્ઠલ પટેલને પક્ષમાંથી સસ્પેન્ડ કરી દીધા હતા.

264 લોકોએ કર્યું હતું મતદાન 
જે બાદ બહુચરાજી એપીએમસીની આ ચૂંટણીમાં વિજય મેળવવા માટે બંને જૂથોએ તનતોડ મહેનત શરૂ કરી હતી. એક તરફ વિઠ્ઠલ પટેલ તો બીજી તરફ ભાજપના સત્તાવાર ઉમેદવાર. આ ચૂંટણી જીતવા ભાજપે આખા તાલુકાના કાર્યકરોને કામે લગાડી દીધા હતા. જે બાદ ચૂંટણીના દિવસે કુલ 269 મતદારોમાંથી 264 લોકોએ મતદાન કર્યું હતું. આજની મતગણતરીમાં ભાજપના મેન્ડેટ ધરાવતા કિરીટ પટેલ સામે વિઠ્ઠલ પટેલ 54 મતથી હાર્યા છે. બહુચરાજી APMCની પેટા ચૂંટણીમાં વિઠ્ઠલ પટેલની હાર થઈ છે.