BIG NEWS / ગુજરાત વિધાનસભાની ચૂંટણી લડવા અંગે વિજય રૂપાણીનું સૂચક નિવેદન, કહ્યું '...તો હું ચૂંટણી લડીશ'

• CM વિજય રૂપાણી પરિવાર સાથે સોમનાથ મહાદેવના દર્શને
• આગામી વિધાનસભા ચૂંટણીને લઇને આપ્યું મહત્વનું નિવેદન 
• પાર્ટી જો ટિકિટ આપશે, તો ચૂંટણી લડીશ: વિજય રૂપાણી

આજ રોજ શ્રાવણ મહિનાનો અંતિમ દિવસ હોવાથી ગુજરાતના પૂર્વ CM વિજય રૂપાણી પરિવાર સાથે સોમનાથના પ્રવાસે ગયા હતા. જ્યાં તેઓએ સોમનાથ દાદાના ચરણોમાં શિશ ઝુકાવ્યું હતું. પરંતુ અહીં તેઓએ ચૂંટણીલક્ષી મોટું નિવેદન આપ્યું છે.

પાર્ટી જો ટિકિટ આપશે, તો ચૂંટણી લડીશ: વિજય રૂપાણી

વિજય રૂપાણી શ્રાવણ મહિનાના અંતિમ દિવસે સોમનાથ મહાદેવના દર્શન કરવા ગયા હતા એ દરમ્યાન તેઓએ ગુજરાતમાં ચૂંટણી લડવા અંગે નિવેદન આપતા જણાવ્યું કે, 'પાર્ટી જો ટિકિટ આપશે, તો ચૂંટણી લડીશ.'

અમે કોઇ પદ માટે કામ નથી કરતા, ચૂંટણી લડવાનું કહે તો લડીએ અને ન કહે તો..: રૂપાણી

વિજય રૂપાણીએ નિવેદન આપતા જણાવ્યું કે, 'અમે કોઇ પદ માટે કામ કરતા નથી. કોઇ ટિકિટો માટે કામ કરતા નથી. એક સ્વપ્ન છે કે ભારતમાતા શક્તિશાળી ભારતમાતા બને. પરમવૈભવના શિખર પર ભારત પહોંચે એ માટે એક સ્વપ્નથી કામ કરીએ છીએ. પાર્ટી જે કંઇ કામ સોંપે છે એ હંમેશા અમે કરતા આવ્યા છીએ. ચૂંટણી લડવાનું કહે તો લડીએ, ચૂંટણી ન લડવાનું કહે તો ચૂંટણી જીતવા માટે કામ કરીએ છીએ. આ અમારી એક પદ્ધતિ રહી છે.'

જૂના જોગીઓને રિપીટ કરવા અંગે વિજય રૂપાણીનું મહત્વનું નિવેદન

એ સિવાય ભાજપે તાજેતરમાં જે ખાતાકીય ફેરબદલી કરવામાં આવી હતી તેમજ ફરી જૂના જોગીઓને રિપીટ કરવા માટે ભાજપ વિચારી રહી છે એવી એક વાત ચાલી રહી છે જે અંગે વિજય રૂપાણીએ નિવેદન આપતા જણાવ્યું કે, 'હજુ સુધી ભારતીય જનતા પાર્ટીએ કોઇ પોલીસી નક્કી નથી કરી. પરંતુ ભારતીય જનતા પાર્ટી વિકાસના આધાર પર પોતાની રીતે સ્વતંત્ર, કોઇના પણ દબાવમાં આવ્યા વગર અમે આગળ વઘીશું અને યોગ્ય નિર્ણયો અમારું નેતૃત્વ કરશે.'

ભાજપમાં કોઇ જ જૂથવાદ નથી: વિજય રૂપાણી

તદુપરાંત વિજય રૂપાણીએ ભાજપમાં જૂથવાદ અંગે નિવેદન આપતા કહ્યું કે, 'ભાજપમાં કોઇ જ જૂથવાદ નથી. આ બધી વાતો હવામાં છે. અમે સૌ કોઇ એક છીએ અને ભારતીય જનતા પાર્ટી આ બધી બાબતોથી ઉપર ઉઠીને કાર્યકર્તાઓ સાથે મળીને મે પહેલા કીધું એમ કે એક સ્વપ્ન સાથે આ ભારતમાતા શક્તિશાળી બને, નરેન્દ્રભાઇ જેવું જબરદસ્ત નેતૃત્વ, એમના માર્ગદર્શન નીચે ભાજપ આગળ વધશે. અમારે ત્યાં કોઇ જૂથવાદ નથી. કશો જ પ્રોબ્લેમ નથી. કોઇથી અમે ગભરાતા પણ નથી. અમે અમારી રીતે આગળ વધીશું.'